Yoáni 15 - Ɔngana á Kɛ̌kɛ

Yéso ande me á mujabíbu á ɗoni

¹ Nende mujabíbu á ɗoni, Abɛ ande gǎkɛ ngubi.

² Aotena ntabi bui nnde ajúkani n'eme na nnaɔgɔmba. A gǎkɛ ɔɓɔngisiaga nnde aɔgɔmba ka gea te, ágɔmbɛ goto phɛɛ.

³ Cɔ, ɓenu ɓánosokosei ye tɔ ka měma ka nyɔngɔ á ɓɔphɛi nde ɗénóphɛí.

⁴ Ikani suɓi ani, n'eme, neikɛ phɔtɔ suɓi anu. Ntabi nnaɔgɔmba sasakɛ na kájúkani na me á mujabíbu. Ɓo phɔtɔ ɓó. Nga, ɓókó phɔtɔ ɔtɔka na ɓɔgɔmbi ka měma, aoɓá na ɓókóiki suɓi ani.

⁵ Eya, nende ɓea me á mujabíbu ndɔɔ. Ɓonde gǎkɛ ɓea ntabi í. Mmbé aiki suɓi ani, néoika suɓi akɛ, agɔmbande phɛɛ ka měma. Nga, ɓókótɔtɔkisɛku ka kema aoɓá na ɓókó tɔ kimoci n'eme.

⁶ Mmbé káiki suɓi ani, ande ɓea ntabi nde ɓáteni, ɓáomaka, áɔɔmɔkaka. Mpɔ, ɓáoɓoa ntabi nde aɔmɔkaki, ɓaómaka ka nsa, áosiɗa.

⁷ Aoɓá na ɓoiki suɓi ani, nyɔngɔ nɛmɔ n'aiki suɓi anu, cɔ, mɛmani kema bui nde ɓokondi, na ɓɔtɔande.

⁸ Aoɓá na ɓɔgɔmbi phɛɛ ka měma, ɓánɗokomisande Abɛ, na ɓoɓande ɓagoigi nɛmɔ ɗoni.

⁹ Ɓindɔ Abɛ ɗánókondi, eme nenókondi phɔtɔ ɓó. Ikani k'ékondi nɛmɔ.

¹⁰ Aoɓá na ɓoambi ɛɔphi nɛmɔ, ɓoikande k'ékondi nɛmɔ, ɓíndɔ ɗéambi ɛɔphi ndea Abɛ na ika k'ékondi nɛkɛ.

¹¹ Ɗɛ́nɔtɔ̌mi nndɔ ka gea, maseye nɛmɔ áikɛ suɓi anu, maseye nɛnu átɔtɔkɛanɛ phɔtɔ phɛɛ.

¹² Ɛɔphi nɛmɔ a ɓe: Kondanagani sɔsɔɓɛ anu, ɓíndɔ ɗénókondi.

¹³ Nna na nkpa nde ana ekondi ángbó phɛɛ, kɔnyɛ́nya mmbé aɓeeki kukuwa ka phɔa ɓadakɛ.

¹⁴ Ɓenu, ɓonde ɓadani, aoɓá na ɓogi nnde nenósosi.

¹⁵ Ne ye tɔ ɔnɔɔphana ɓadani nga, nenóphangigi kema bui nde Abɛ ɗámongoɗi. Kaɓondɔ unge, ké ye ɔnɔɔphana ɓakɔɓɛ nga, nkɔɓɛ nnaoúba kema nde mɔkɔta nɛkɛ aogea.

¹⁶ Ɓókómɔsɔmbu, eme aámbé nɛnɔsɔmbu ndiu, na néonoteka ka gea, ɓógɛgɔmbisɛ mbuka á ka měma, nnde aoiphia phɛɛ. Kaɓondɔ, Abɛ anóphande kema bui nnde ɓɔmɛmande yɛ k'ína ani.

¹⁷ Cɔ, ɛɔphi nde nenósosi ande gea, Kondanagani sɔsɔɓɛ anu.

Ɓato á ka mokonda ɓánkangei Yéso na ɓagoigi nɛkɛ

¹⁸ Aoɓá ɓato á ka mokonda na ɓánokangei, úbani phɔ́ gea, eme aámbé ɓámokangei mosá.

¹⁹ Ɓotúoɓá ɓato á ka mokonda, ámbé ɓánokondigi. Ɓato á ka mokonda ɓánokangei gǎkɛ ka nyɔngɔ nde, nɛnɔsɔmbu, néonotokisa sɔsɔɓɛ aɓɔ.

²⁰ Kanisiani phɔ́ nyɔngɔ nde ɗénóngoɗi gea: ‹Nna na mbɛɗanigi nde, ana ɓoombia kɔnyɛ́nya mɔkɔta nɛkɛ.› Ɓî ɓámotambisigi, ɓánotambisagande phɔtɔ ɓó. Atúoɓá na ɓáambi nyɔngɔ nɛmɔ, ámbé ɓáambande phɔtɔ nɛnu.

²¹ Cɔ, ɓánotambisagande ɓó ka nyɔngɔ ani. Nga, ɓánaomúba mmbé amoteki.

²² Aoɓá na ɗékébiki, na ɗékěngoɗi nyɔngɔ nɛmɔ, ámbé ɓákátóɓɛku na ɓojeɗe. Kɛ̌kɛnde gǎkɛ, ɓákánganɛku ye ɓojeɗe nɛɓɔ.

²³ Nkpa nde amokangei, ankangei phɔtɔ Abɛ.

²⁴ Atúoɓá na kɛ́tɔtɔtɔkisi ketangaɔ sɔsɔɓɛ aɓɔ, nnde nkpa kátɔtɔkisimbɛ mɔnɔ, ámbé ɓákátóɓɛku na ɓojeɗe. Kɛ̌kɛnde, ɓáɔni ye ketangaɔ ndɔ, ɓáotútuisa kangea asu, eme na Abɛ.

²⁵ Ɓági gǎkɛ ɓó ka gea, nyɔngɔ nde ɓáɗundu suɓi ɛ́ɔphi nɛɓɔ átɔtɔkɛanɛ: ‹Ɓámokangei ecici.›

²⁶ Nenotekisiande Nengi n'atóki ka Abɛ. Ande Měma á ɗoni, mmbé atóki mɔtɛ á Abɛ. Mbenɔ nde akiɗiande, yɛ aámbé amoɗigimisande.

²⁷ Ɓenu phɔtɔ, ɓomoɗigimisande nga, ɗóɓotú kimoci n'eme ka nkpangeɔ.