Yoáni 14 - Ɔngana á Kɛ̌kɛ

Yéso ande aphe á gǎ mɔtɛ á Abɛ

¹ Yéso áǒngoɗea ɓagoigi ɓe: «Ɓókotambɛgɛmbɛ ka měma. Mɓeekeani Mokonga, ɓómoɓeekeɛ phɔtɔ eme.

² Endu ndea Abɛ, ana ɔma á ɓoiki ásii. Atúoɓá na nna ɓó, ámbé kétónóngoɗi, nege ɔɓɔngisiaga kanu ɔma á ɓoiki.

³ Ɓî nege ɔɓɔngisiaga kanu ɔma á ɓoiki, nebikaeka goto ɔnɔbɛɗa ka gea, ɔma nde neiki, ɓenu ɓóikɛ phɔtɔ ɓei.

⁴ Cɔ, ɓoúbi ye aphe á kuɓî nege.»

⁵ Tɔmá áongea: «Mɔkɔta, ɓékéoúba ɔma nde oge. Cɔ, ɓeúbande gǎkɛ aphe ɓo?»

⁶ Yéso áonsikisia gea: «Nende aphe, ɗoni, na enda. Nkpa nnaobika mɔtɛ á Abɛ, na kányɛ́nyi k'eme.

⁷ Atúoɓá na ɓomoúbi, ámbé ɓotómúbi phɔtɔ Abɛ ɓó. Kɛ̌kɛnde gǎkɛ, ɓo ye múbi yɛ, na ɔna akɛ.»

⁸ Philípɔ áongea: «Mɔkɔta, ósophangia Abɛ mpɔ, ɔ́gɔɓɛ siki asu.»

⁹ Yéso áongea ɓe: «Philípɔ, esa ásii nde ɓeiki n'oɓɛ, kómoúbimbɛ mɔnɔ? Mmbé ɗámɔɔni k'eme, ɗámɔni phɔtɔ Abɛ. Cɔ, ogi, nékophangiɛ Abɛ ka ɓo?

¹⁰ Kóoɓeekea gea te, ne suɓi á Abɛ, Abɛ â phɔtɔ oɓá suɓi ani? Yɔnga nde neonongoɗea, nna tɔ otóka k'eme, a ndiu otóka ka Abɛ mmbé a suɓi ani ka tɔtɔkisa ekuma nɛkɛ.

¹¹ Ómoɓeekeani ɓî neonongoɗea gea, ne suɓi á Abɛ, yɛ â phɔtɔ oɓá suɓi ani. Kángá ɓondɔ, ɓeekeani ye phɔ́ ka nyɔngɔ ékuma nɛmɔ.

¹² Nenóngoɗi ɗoni, nkpa nde amoɓeeki, abɛɗanagande ekuma ɓíndɔ nɛbɛɗanigi. Atɔtɔkisande phɔtɔ kema ángbó kɔmɔnyɛ́nya. Nga, nege ye mɔtɛ á Abɛ.

¹³ Nɛtɔtɔkisande phɔtɔ kema bui nde ɓɔɔmɛma k'ína ani. Kaɓondɔ unge, ɓánɗokomisande Abɛ ka Anakɛ.

¹⁴ Aoɓá na ɓɔmɛmi kema sina k'ína ani, nɛtɔtɔkisande.

Yéso aɔku teka á Měma á kanga ɓojeɗe

¹⁵ Aoɓá na ɓomokondi, ɓoambande ɛɔphi nɛmɔ.

¹⁶ Eme, nɛmɛmande Abɛ, ánophɛ Nengi ɓaangbo ka gea, áikɛ na ɓenu esa bui.

¹⁷ Ande Měma á ɗoni, mmbé ɓato á ka mokonda ɓánáɔtɔka na ɓámɓeeki nga, ɓákáɔtɔka na ɓámɔni na úba akɛ. Ɓenu gǎkɛ, ɓoomúba nga, yɛ aoika kimoci na ɓenu, aɓande phɔtɔ suɓi anu.

¹⁸ Kénoɗeketɛku ɓaniki á jiga, nebikande goto mɔtɛ-anu.

¹⁹ Ka mbenɔ ábɔa, ɓato á ka mokonda ɓákámɔɔnɛku ye. Ɓenu ndiu ɓáunge ɓɔmɔɔnande ka nyɔngɔ nde, eme neoenda na ɓenu phɔtɔ ɓoendande.

²⁰ K'ésa ndɔ unge ɓoengekisande gea, eme ne suɓi á Abɛ, ɓenu suɓi ani, n'eme suɓi anu.

²¹ Nkpa nde aoɓeekea ɛɔphi nɛmɔ na amba í, aámbé amokondi. Nkpa nde amokondi, Abɛ ankondande, n'eme phɔtɔ nenkondande, něphangiande ka yɛ.»

²² Mpɔ, Yúda (nna mmbɔ Isikaliɔ́ta) áongea: «Mɔkɔta, ka nyɔngɔ sina nde ɔ tɔ ǒphangia ka ɓesu, kǒphangiɛ gǎkɛ ka ɓato á ka mokonda?»

²³ Yéso áonsikisia: «Aoɓá nkpa n'amokondi, aámbande nyɔngɔ nɛmɔ, Abɛ ankondande. Eme na Abɛ, ɓebikande mɔtɛ-akɛ na ika kimoci na yɛ.

²⁴ Nkpa nde nnaomokonda, nna gǎkɛ oamba nyɔngɔ nɛmɔ. Nga, nyɔngɔ nde ɓɔɔ́ka, nna nɛmɔ, a ndiu ndea Abɛ, mmbé amoteki.

²⁵ Ɗénóngoɗi nndɔ, ɓî ɗé phɔ́tɔ na ɓenu.

²⁶ Abɛ anotekisiande Nengi, n'ande Měma á kanga ɓojeɗe k'ína ani. Anophangiagande kema bui na kanisia anu nyɔngɔ bui nde ɗénongoɗi.

²⁷ Nenóɗeketei ɓujɛjɛ, nenophi ɓujɛjɛ nɛmɔ. Kénóphi ɓíndɔ ɓato á ka mokonda ɓáonópha. Cɔ, měma anu kaágatanɛmbɛ, ɓókóɓɛmbɛ na kɔɓɔɓɔkɔ.

²⁸ Ɓɔɔ́kima ɓî nenóngoɗima gea: ‹Nege, nejande gǎkɛ mɔtɛ-anu.› Atúoɓá na ɓomokondi, ámbé ɓona maseye, ka nyɔngɔ nde, nege mɔtɛ á Abɛ. Nga, Abɛ amɔnyɛ́nyi.

²⁹ Cɔ, kɛ̌kɛnde, nenóngoɗi nndɔ bui mosá á tɔtɔkɛana í, ka gea, a ye ɔtɔtɔkɛana, ɓôɓeekea.

³⁰ Kéyɔngɛku ye ásii na ɓenu nga, moamɛ á ka mokonda abiki. Nna tanda na kɔkɔta gǔ ani,

³¹ akeni gǎkɛ ɓato á ka mokonda ɓáúbɛ gea, nenkondi Abɛ, neogea nnde amososi. Cɔ, ómesiani, ɓégɛ.