Yoáni 12 - Ɔngana á Kɛ̌kɛ

Malía aɗuki nkoki k'écinji á Yéso

¹ Esa ngianjaga (6) mosá á jaí á Pasáka, Yéso ɗáge na Bɛtanía, ka nji nde Lajálɔ, mmbé ɗánjujúkisi ka kukuwa ɗátú kau.

² Kó, ɗáɓáɔ́mbi kakɛ eea á ɔgɔgɔ, Maatá áɔ̌únaneaga ka mɛja. Lajálɔ ɗátú ka ɓakpa nde ɗáɓáigi kimoci na Yéso.

³ Malía â gǎkɛ ɔbɛɗa ngbanda á nkoki moci nnde ɓáɓɔngisigi ánjá na maya nde ɓáɔɔphana Nadɔ esombi í n'ákpɛ. Áosia ú k'écinji á Yéso, áɔkɔmbɛa ú na sekamɔ̌ akɛ. Endu áotúma na su á nkoki.

⁴ Mpɔ, ka ɓagoigi ndea Yéso, ina akɛ Yúda Isikaliɔ́ta, mmbé antɔngande Yéso, áogea,

⁵ «Ka nyɔngɔ éke nde ɓékésombisi nkoki nde ka imɔna mia isaɔ (300) na gabea á ɓaúki?»

⁶ Ɗákáyɔngi gǎkɛ ɓó ka nyɔngɔ á ngomi á ɓaúki, ɗátú ndiu ka nyɔngɔ nde ɗátú nkukuɓa. Yɛ, aámbé ɗáokumbaga njombi á imɔna, na bɛɗa kau ka phɔakɛ sasakɛ.

⁷ Mpɔ, Yéso â gǎkɛ ogea: «Nɗeketani nke ndɔ caa! Nga, agi ɓó ka ɓɔngisiaga esa á úmba ani.»

⁸ Ɓoɓande na ɓaúki esa bui, eme gǎkɛ, kéɓɛku na ɓenu esa bui.

Maca á mowa á Lajálɔ

⁹ Cɔ, usɛsɛ ángbó á Ɓayúda ɓáɔɔ́ka gea, Yéso ɗátú na Bɛtanía. Kaɓondɔ, ɓáoga kó, nna tɔndɔ ka nyɔngɔ á Yéso, ɗátú gǎkɛ phɔtɔ ka nyɔngɔ á ɔna ka Lajálɔ, mmbé Yéso ɗánjujúkisi ka kukuwa.

¹⁰ Ɓagbɛga á ɓatoɓeigi-phɛ́a, ɓâ phɔtɔ obisa moangɔ á mowa á Lajálɔ.

¹¹ Nga, Ɓayúda ɓásii ɗáɓěɗu ka nyɔngɔ á Lajálɔ, ɓáomɓeekea Yéso.

Yéso angí ka Yɛusalɛ́ma

¹² Mama í, usɛsɛ ángbó á ɓakpa ɓunde ɗáɓákiɗi ka jaí á Pasáka ɓáɔɔ́ka gea, Yéso aobika na Yɛusalɛ́ma.

¹³ Ɓâ gǎkɛ ɔbɛɗa kasa á mbia, ɓáoga omɓondeaga ka ngba, na ɓáɔyɔnga k'ɛ́sɔ akpɛ te: «Obebɔ ka Mokonga! Ambe Mokonga ábisɛ njaga akɛ gǔ á mmbé abiki k'ína á Mɔkɔta! Mokonga ábisɛ njaga akɛ gǔ á moamɛ ndea Ɓaisilaɛ́li!»

¹⁴ Wa, Yéso áondonda miki á mponda, áokambea gǔ akɛ, ɓíndɔ ɗáɓáɗundu suɓi á Ɓuku á Mokonga gea:

¹⁵ «Ɓato á ka Sayúni, ɓókóɓangɛmbɛ! Moamɛ nɛnu abiki, Akǎmbi gǔ á miki á mponda.»

¹⁶ Ɓagoigi nɛkɛ ɗáɓákáengekisi phɔ́ kema ndɔ. Ɓî Mokonga ɗántáisi gǎkɛ Yéso ka ɓoombia, mpɔ ɓáokanisia nyɔngɔ nde ɗáɓáɗundu ka phɔakɛ, n'índe ɓakpa ɓásii ɗáɓátɔtɔkisi ka phɔakɛ.

¹⁷ Cɔ, usɛsɛ á ɓakpa nde ɗáɓátú na Yéso mbenɔ nde ɗámɔphani Lajálɔ suɓi á bóta ka jujúkisa akɛ sɔsɔɓɛ á ɓasí, ɓɔ ɓáunge ɗáɓáɔtɔmiaga nnde ɗáɓáɔni.

¹⁸ Kaɓondɔ unge, usɛsɛ á ɓakpa ɗáɓábiki omɓondeaga, ka nyɔngɔ nde ɓakpa ɗáɓáɔ́ki gea, yɛ aámbé ɗátɔtɔkisi mphangiɔ á ketangaɔ ndɔɔ.

¹⁹ Ɓaphaisáyɔ ɓâ gǎkɛ ɔyɔngaga sɔsɔɓɛ aɓɔ gea: «Cɔ, ɓɔɔni? Ɓéké ye ɔtɔka ka kema nga, ɓakpa ɓɔbu ɓámɓi.»

Ɓagiíki ɓáonkaɓa Yéso

²⁰ Cɔ, ka Ɓagiíki ɗáɓátú sɔsɔɓɛ á ɓunde ɗáɓábiki ka Yɛusalɛ́ma, k'aphe á ɗokomisa á Mokonga, ka mbenɔ á jaí á Pasáka.

²¹ Ɓɔ, ɓáɔnsɛkɛɗɛa Philípɔ, nto á Bɛtɛsaída á ka Galiláya. Ɓáongea: «Mɔkɔta, ɓekondi ɓɛ́mɔnɛ Yéso.»

²² Philípɔ áoga ongoɗea Andeé, mpɔ ɓɔbu ɓaɓɛ ɓáoga ongoɗea Yéso.

²³ Yéso áǒsikisia te: «Cɔ, mbenɔ ajú ye tɔ, nnde Mokonga anɗokomisande Muna-Nkpa.

²⁴ Nenóngoɗi ɗoni gea, mbuka á nganɔ a tɔ ojiga sasakɛ ámbé kágumbɛ ka oɗo na phoa. A ye gǎkɛ ogua ka oɗo na phoa, áɔgɔmbisa mbuka ásii.

²⁵ Nkpa nde akondi amba á enda akɛ, aɓúngisande. Mmbé gǎkɛ aokangea enda akɛ ka mokonda nde, aámbaeka enda ndɔ mɛyɔ.

²⁶ Kaɓɛ nkpa n'akondi bɛɗaneagani ambe ámoɓeɛ. Ɔma nde ne ɓei, aunge mbɛɗanigi nɛmɔ aɓande phɔtɔ. Abɛ anɗokomisande mmbé aɔmɔbɛɗaneaga.

Yéso aɔyɔnga nyɔngɔ á kukuwa akɛ

²⁷ Cɔ, kɛ̌kɛnde měma ani aágátani. Neyɔngande kema sina? Neyɔngande, Abɛ, komoɗeketeɛmbɛ ka tambaga á mbenɔ ndee. A ndiu ka nyɔngɔ índɔ unge nebiki kau ka mbenɔ ndee.

²⁸ Abɛ, ɗokomisa ina akɔ.» Mpɔ, ɛsɔ áɔɔ́kɛkana n'atóki na koba gea te: «Ne yé ɗokomisi na neɗokomisande goto.»

²⁹ Usɛsɛ á ɓakpa ɓunde ɗáɓátú wa, ɓî ɓáɔ́ki ye ɛsɔ ndɔ, ɓáogea: «Ande ɓáoka á mbua.» Ɓunɛngbo ɓáogea: «Malaéka aámbé ɗáyɔngigi na yɛ.»

³⁰ Yéso â gǎkɛ ǒsikisia: «Nna ka nyɔngɔ ani unge ɛsɔ ndɔ aɔ́kɛkani, a ndiu ka nyɔngɔ anu.

³¹ Kɛ̌kɛnde unge Mokonga atenande nyɔngɔ á ka mokonda. Kɛ̌kɛnde, amɓeagande phɔtɔ moamɛ á ka mokonda ndee.

³² Eme gǎkɛ, mbenɔ nde ɓámotáisande ka mokonda nde, něɓoteande ɓakpa ɓɔbu.»

³³ Yéso ɗáyɔngi ɓó ka úbisa á etéte á kukuwa nde akuwande.

³⁴ Cɔ, usɛsɛ á ɓakpa ndɔ, ɓáonsikisia ɓe: «Ɓuku ɛ́ɔphi asongoɗi gea: ‹Kiísito aendande mɛyɔ.› Cɔ, ɔyɔngi gea, ɓántáisande Muna-Nkpa ka ɓo? Muna-Nkpa ndɔ, ande ani?»

³⁵ Yéso áǒngoɗea: «Owanga a phɔ́tɔ sɔsɔɓɛ anu ka mbenɔ ábɔa. Tambani ɓî ɓo phɔ́tɔ na owanga, ka gea, kaiphiɔ kanódondɛmbɛ kángá á ɓá na mosenda í. Nga, nkpa nde aotamba ka kaiphiɔ, nnaoúba ɔma nde aoga.

³⁶ Cɔ, ɓî owanga a phɔ́tɔ sɔsɔɓɛ anu, ɓeekeani tɔ wa ka gea, ɓóɓɛ ɓakpa ndea owanga ndɔɔ.» Mbusa á yɔnga akɛ ɓó, Yéso áoga, áɔ̌sɔmɛana ɗanga na usɛsɛ á ɓakpa ndɔɔ.

Ɓayúda ɓákámɓeeki Yéso

³⁷ Nanga ɓî Yéso ɗátɔtɔkisi ketangaɔ ásii mosá aɓɔ, ɗáɓákámɓeeki.

³⁸ Ɗáɓági ɓó ka gea, nyɔngɔ nde Isáya mɔtu-nyɔngɔ ndea Mokonga ɗáyɔngi gea: «Mɔkɔta, ani mmbé aɓeeki ɓoabi nɛsu? Ani mmbé, Mɔkɔta amphangi ɓukpɛkpɛ nɛkɛ?»

³⁹ Isáya ɗáyɔngi phɔtɔ, ka nyɔngɔ éke nde ɓakpa nde ɗáɓákátɔki ɓeekea,

⁴⁰ ɗáebisi ɓakeíme-íme, â phɔtɔ obisa měma aɓɔ akpɛ ka gea, ɓákaɔnaphɛmbɛ, ɓákaúbaphɛmbɛ. Ka nyɔngɔ índɔ unge Mokonga ɗági gea, ɓákaepháiɛmbɛ kuɓî nɛɔ, ka gea te, néamisɛ.

⁴¹ Isáya ɗáyɔngi ɓó nga, ɗáɔni ɓoombia ndea Yéso, áɔyɔnga gǔ akɛ.

⁴² Nanga ɓó, ɓakɔta á Ɓayúda ɓásii, ɗáɓámɓeeki Yéso. Ɗáɓáeɓangi gǎkɛ Ɓaphaisáyɔ. Kaɓondɔ unge, ɗáɓákáyɔngi base ka gea, Ɓaphaisáyɔ ɓákáeɓeɛgɛmbɛ k'éndu á madondanɔ ndea Ɓayúda ka nyɔngɔ á Mokonga.

⁴³ Nga, ɓakɔta ndɔ ɗáɓáokonda obebɔ ndea ɓakpa, kɔnyɛ́nya nnde atóki ka Mokonga.

Tena á nyɔngɔ ka ɓeana na nyɔngɔ ndea Yéso

⁴⁴ Cɔ, Yéso ɗáengoɗi ɓakpa k'ɛ́sɔ akpɛ gea: «Nkpa nde amoɓeeki, kámoɓeeki tɔndɔ eme, amɓeeki phɔtɔ mmbé amoteki.

⁴⁵ Mmbé amɔɔni, amɔni phɔtɔ mmbé amoteki.

⁴⁶ Eme, nebiki ɓea owanga ka mokonda. Mmbé amoɓeeki, káikɛku ka keiphe.

⁴⁷ Kaɓɛ nkpa n'aɔ́ki ɓɔphɛi nɛmɔ na káambi, nna gǎkɛ eme aámbé netenande nyɔngɔ nɛkɛ. Nga, ɗébiki ka amisa á ɓato á ka mokonda, nna ka tena á nyɔngɔ nɛɓɔ.

⁴⁸ Nkpa nde amoyé, na nnaoɓeekea nyɔngɔ nɛmɔ ɓátenaeka nyɔngɔ nɛkɛ akpɛ. Nyɔngɔ nde ɗéyɔngi aunge, atenaeka nyɔngɔ akpɛ k'ésa á sungiaga á mokonda.

⁴⁹ Kɛ́yɔngi ka kɔkɔta nɛmɔ. Abɛ, mmbé amoteki, aámbé amososi ndiu nyɔngɔ bui nde akeni nɛ́tɔ̌miɛ ɓakpa, na goisaga aɓɔ ně.

⁵⁰ Neoúba gea, nyɔngɔ ndɔ amososi, aunge aǒɓopha ɓakpa enda á mɛyɔ. Ne gǎkɛ tɔ ɔyɔnga ɓíndɔ Abɛ amososi.»