Yoáni 10 - Ɔngana á Kɛ̌kɛYéso aɔtɔmiaga mɛní á mɓondigi-ɓamɔgɔgɔ anjánjá 1 Cɔ, Yéso áogea: «Nenóngoɗi ɗoni. Mmbé nnaongia ka kǐo á ɓogaɔ á ɓamɔgɔgɔ, â ndiu oɗapha ɔma nɛngbo, mmbɔ ande nkukuɓa, phɔtɔ n'yóyombi. 2 Cɔ, mmbé a ndiu ongia ka kǐo, yɛ aámbé, ande mɓondigi-ɓamɔgɔgɔ. 3 Mɓondigi-kǐo aomúkuia mɓondigi-ɓamɔgɔgɔ, ɓamɔgɔgɔ ɓâ phɔtɔ ɔɔ́ka ɛsɔ akɛ. Aɔ̌ɓɔphana ɓamɔgɔgɔ nɛkɛ moci-moci k'ína aɓɔ, áǒjuanisa. 4 Mbenɔ nde aejuanisi ye ɓɔbu, áɔ̌mɛɛa mosá, ɓamɔgɔgɔ ɓáomɓea mbusa. Nga, ɓáoúba ɛsɔ akɛ. 5 Cɔ, ɓákámɓeɛku tanda mɔkɛni, ɓánteande ndiu ɗanga. Nga, ɓánáoúba ɛsɔ á ɓakeni.» 6 Yéso ɗáengoɗi mɛní ndɔ, ɓákáengekisɛ gǎkɛ nyɔngɔ nde ɗáɔyɔnga. 7 Kaɓondɔ, Yéso â goto ǒngoɗea: «Nenóngoɗi ɗoni gea, nende kǐo á ɓɔgaɔ á ɓamɔgɔgɔ. 8 Ɓunde ɗáɓákiɗi mosá ani, ɓánde ɓakukuɓa na ɓayóyombi. Ɓamɔgɔgɔ ɗáɓákáɛɓɔ́ki gǎkɛ. 9 Eme aámbé nende kǐo. Aoɓá nkpa n'angí k'éme, aamande ka měma. Angiande, â phɔtɔ ojuana, atɔande eea. 10 Nkukuɓa a tɔ obika nɛkɛ k'aphe á uɓa, mowa na túkatúka. Nebiki gǎkɛ gea, ɓakpa ɓáɓɛ na enda, enda kau áɓɛ mɔɛndá. 11 Eme, nende mɓondigi anjánjá. Mɓondigi anjánjá aɔtɔka ɓeekea kukuwa ka amisa á ɓamɔgɔgɔ nɛkɛ ka kukuwa. 12 Nkpa nde aɔbɛɗaneaga ophendɔ, mmbɔ nna mɓondigi, nna gǎkɛ mɛna-ɓamɔgɔgɔ. Mbenɔ nde áɔmɔna nyama akae ɓea mabianga n'abiki, áotea, áǒɗeketa ɓamɔgɔgɔ. Mpɔ, nyama ndɔ áǒgoaga ɓamɔgɔgɔ, na phanja aɓɔ. 13 Mbɛɗanigi ndɔ ati ka nyɔngɔ nde, a tɔ ɔbɛɗaneaga ophendɔ, kángá á bisa á měma akɛ ka ɓamɔgɔgɔ. 14 Eme, nende mɓondigi anjánjá, neǒɓúba ɓamɔgɔgɔ nɛmɔ. Ɓɔ, ɓâ phɔtɔ omoúba. 15 A tɔ ɓíndɔ Abɛ amoúbi, eme, nê phɔtɔ omúba Abɛ. Cɔ, neɓeeki kukuwa ka nyɔngɔ á ɓamɔgɔgɔ nɛmɔ. 16 Nena ɓamɔgɔgɔ ɓunɛngbo, ɓunde ɓáká gǎkɛ á k'ékombo ndee. Akeni phɔtɔ nétambisɛ ɓɔ. Ɓáɔ́kande ɛsɔ ani, ɓáɓande ekombo moci na mɓondigi moci. 17 Cɔ, Abɛ amokondi nga, neɓeeki kukuwa ka gea, néendɛ goto. 18 Nna na nkpa nde aomoúta enda, eme sasani tɔndɔ aámbé neoɗeketa ú. Nga, nena ɓukpɛkpɛ á phúia í, ne phɔtɔ na ɓukpɛkpɛ á ɓoá í goto. Nndɔ ungɔ Abɛ amososi.» 19 Ka nyɔngɔ á ɓoabi ndɔ, Ɓayúda ɓâ goto okatanaga. 20 Ɓakpa ɓásii sɔsɔɓɛ aɓɔ ɓáogea: «Ana ɓansombo, ayaí! Cɔ, ɓɔɔmɔ́ka ka ɓo?» 21 Ɓunɛngbo ɓâ gǎkɛ ogea: «Nto á ɓansombo nnaɔyɔnga ɓe. Ɓansombo ɓáɔtɔka na ɓákoɗi iso á ɓakeíme-íme?» Ɓayúda ɓán'yége Yéso 22 Cɔ, esa moci ka mbenɔ á gua á jaí ɛ́mɛmi ka kanisia esa á ukuwa endu á Mokonga na Yɛusalɛ́ma, ɗátú matú á phiɔ. 23 Wa, Yéso ɗátúotamba suɓi éndu ndea Mokonga, ka mɔɛɓa á Sɔlɔmɔ́nɔ. 24 Ɓayúda ɓáontimba, ɓáongea: «Odidisande měma asu mbenɔ sina? Aoɓá n'onde Kiísito, ósongoɗea base.» 25 Yéso â gǎkɛ ǒsikisia: «Ne ye nongoɗi, ɓókóɓeekeɛ gǎkɛ. Ekuma nde nɛɔtɔtɔkisa k'ína á Abɛ, aunge amoɗigimisande. 26 Ɓókó gǎkɛ oɓeekea ka nyɔngɔ nde, ɓókó ka ɓamɔgɔgɔ nɛmɔ. 27 Ɓamɔgɔgɔ nɛmɔ ɓáɔɔ́ka ɛsɔ ani. Eme, néǒɓúba, ɓáomoɓea. 28 Néǒɓopha enda á mɛyɔ, ɓákáɓúngɛeka tanda. Nkpa nnaɔtɔka n'aɛkpɔi ka njaga ani. 29 Abɛ, mmbé amopi ɓamɔgɔgɔ ndɔ, aangbóngbó kɔnyɛ́nya kema bui. Nna na nkpa nde aɔtɔka n'akpɔi kema ka njaga akɛ. 30 Abɛ n'eme, ɓe tɔ nkpa mo.» 31 Mpɔ, Ɓayúda ɓâ goto ɔbɔnya ɛtɛ ka gea, ɓámmowɛ ně. 32 Yéso â gǎkɛ ǒngoɗea: «Nɛtɔtɔkisi ekuma ánjá ásii k'íso anu ka ɓukpɛkpɛ ndea Abɛ. Cɔ, k'ékuma ndɔ, kau sina nde ɓoogea ɓómomowɛ n'ɛtɛ ka nyɔngɔ í?» 33 Ɓayúda ɓáonsikisia: «Ɓékéokomowa n'ɛtɛ ka nyɔngɔ ékuma ánjá. A ndiu ka nyɔngɔ á boma á Mokonga. Ka nyɔngɔ nde, oɓɛ ímbɔ nkpa ogi sasakɔ te, onde Mokonga. Nndɔ, ande bóma á Mokonga.» 34 Yéso áǒsikisia: «Ɓákáɗundu phɔ́ k'ɛ́ɔphi nɛnu gea, Mokonga agi te: ‹Ɓenu ɓonde ɓamokonga á mbɛa.› 35 Cɔ, nna na nkpa nde aɔtɔka n'aɓúni nyɔngɔ nde a suɓi á Ɓuku á Mokonga. Ande gea, Mokonga ɗáɛɓɔphani ɓamokonga á mbɛa ɓundɔ ɗáɓěngoɗi nyɔngɔ á Mokonga. 36 Eme, Abɛ amɔsɔmbu, áomoteka ka mokonda. Cɔ, ka nyɔngɔ sina nde ɓomogi neombóma Mokonga ɓî negi te, nende Muna-Mokonga? 37 Aoɓá na kɛ́ɔbɛɗanaga ekuma ndea Abɛ, ɓókómoɓeekeɛmbɛ. 38 Aoɓá na nɛtɔtɔkisi ndiu ekuma ndea Abɛ, nanga ɓókóomoɓeekea, cɔ, ɓeekeani ye phɔ́ ekuma nɛmɔ. Úbani na ɓɔ́ɔ́kɛ gea, ne suɓi á Abɛ na Abɛ a suɓi ani.» 39 Wandɔ, ɓâ goto okaɓa dunga akɛ, â gǎkɛ ǒsoɗokana. 40 Mbusa, Yéso â goto oga kubi á Yɔɔdáni, ɓî Yoáni ɗáɓátisi mosá. Áoika kó. 41 Ɓakpa ɓásii ɓáombikia, ɓáɔn'yɔngɛa: «Yoáni ɗákátɔtɔkisi tanda ketangaɔ moci. Kema bui nde ɗáyɔngi gǎkɛ ka phɔa á Yéso, ɗátú tɔ ɗoni.» 42 Kó, ɓakpa ɓásii ɓáomɓeekea Yéso. |
© 2021, Wycliffe Bible Translators, Inc.
Wycliffe Bible Translators, Inc.