Títɔ 3 - Ɔngana á Kɛ̌kɛ

Tambea á kɛ̌kɛ ndea ɓaɓêki

¹ Cɔ, ókanisia ɓaɓêki gea te, akeni ɓaedidisɛ kusi á ɓakɔta na ɓaamɛ nɛɓɔ, ambe ɓáɛɓɔ́kɛ na ɓeekea á tɔtɔkisa ekuma bui nde aánjá.

² Ɓákáyɔngɛmbɛ ájeɗe ka phɔa á nkpa, ɓákásanɛmbɛ. Ɓáɓɛ ndiu ɓato-aphɔngɔ, ɓakpa ɓánjá, ɓunde ɓáokáɓa ɓujɛjɛ ka ɓakpa ɓɔbu.

³ Nga mosá, ɓesu phɔtɔ ɗéɓékétú oúba kema, ɗéɓékétú ɔmɔ́ka Mokonga, ɗéɓéoɓúngaga, ɗéɓétú ɓakɔɓɛ á mɔphɛ ájeɗe na kema ɗanga-ɗanga. Tambea asu ɗátú ájeɗe, ɓéoɓá ɓato á nsengo. Ɗáɓásókangei, ɓéokangeana phɔtɔ ngǔngu asu.

⁴ Cɔ, ɓî Mokonga Namisi nɛsu, ɗáphangi gǎkɛ base ɓonjánja na ekondi nɛkɛ ka ɓakpa,

⁵ áosóamisa ka měma. Nna gǎkɛ ka nyɔngɔ á ekuma ánjá nɛsu nnde ɓɛtɔtɔkisi unge agi ně ɓó, a ndiu ka kuia asu ngomi. Ɗásóamisi ka měma ka opha asu enda á kɛ̌kɛ ka iɓo á oɓatisɔ na Měma á kanga ɓojeɗe.

⁶ Nga, Mokonga ɗándandisi phɛɛ Měma á kanga ɓojeɗe suɓi asu k'aphe ndea Yéso Kiísito, Namisi nɛsu.

⁷ Mokonga agi ɓó ka ɓonjánja-ékondi nɛkɛ, ka gea, ɓéɓɛ ɓato á koɗoni mosá akɛ, ka tɔá enda á mɛyɔ nde ɓeseɓei.

⁸ Cɔ, yɔnga ndɔ, ande á ɓeekea í. Nekondi óphangiɛgɛ ɓaɓêki ú na ɓukpɛkpɛ ka gea, ɓakpa nde ɓámɓeeki Mokonga ɓéyameɛ ka tɔtɔkisa á ekuma ánjá. Nyɔngɔ ndɔ aánjá na ana kantíti ka ɓakpa.

⁹ Kǒngisɛgɛmbɛ gǎkɛ ka pua ka nyɔngɔ nde nna na kantíti, ina á ɓato-ɛ́ɓɔkɔti, sani, eongo ka phɔa á ɛɔphi. Nndɔ nna na kantíti, a tɔ jǎi.

¹⁰ Cɔ, nkpa nde aobikisa katanaga, nkéa mɔngɔ iɓɛ, mpɔ ómphapheɛ.

¹¹ Nga, ooúba gea, nkpa ɓea mbɔ aɓúngigi. Ka tútuisa akɛ gea á ɓojeɗe, ateni nyɔngɔ nɛkɛ akpɛ, yɛ sasakɛ.

Mɔkɔ

¹² Cɔ, mbenɔ nde nentekande Aatɛ́ma kaɓɛ Tikíkɔ mɔtɛ-akɔ, ókamisagande bika á donda ani ka Nikɔpɔ́li nga, nekondi ika kó ka matú á phiɔ.

¹³ Ɔ́ɓɔngisiagambɛ ánjá tamba ndea nteni-nyɔngɔ angbóngbó Jɛnási na Apɔ́lɔ ka gea, ɓákaúkɛ ka kema nde ɓá na siki í ka tamba nɛɓɔ.

¹⁴ Ambe ɓakpa nɛsu, ɓágoɛgɛ phɔtɔ gea á ɓonjánja phɛɛ ka tɔtɔkisa á kema nde ɓakpa ɓá na mɔphɛ í phɛɛ. Na ka gea aɓɔ ɓó, enda aɓɔ káɓɛku jǎi-jǎi.

¹⁵ Ɓakpa ɓɔbu ɓunde ɓá kimoci n'eme, ɓákosambei. Ósambea ɓadasu á suɓi á ɓeekea. Ambe ɓonjánja-ékondi ndea Mokonga, áɓɛ na ɓenu ɓɔbu.