Títɔ 2 - Ɔngana á Kɛ̌kɛ

Ɓɔphɛi á ɗoni

¹ Cɔ, oɓɛ gǎkɛ, góisaga tɔ nnde akeni ka goisaga á ɗoni.

² Óngoɗea ɓaphomi á ɓǒko gea, ɓáɓɛ ɓato-éamba sasaɓɔ, ɓato-éɗokomisa, ɓato á kanisia ánjá, ɓáɓɛ na ɓeekea akpɛ, suɓi ékondi na phiphia.

³ Óngoɗeaga phɔtɔ ɓaphomi á ɓake gea, ɓáɓɛ na tambea nde akeni mosá á Mokonga. Ɓákaɓɛmbɛ ɓato á yɔngaga ájeɗe-jeɗe ka phɔa á ɓakpa ɓunɛngbo, ɓákáɓɛ mɔnɔ ɓakɔɓɛ á makana, ɓáɓɛ ndiu ɓagoisigi á ɓɔphɛi á ɗoni

⁴ ka gea, ɓégoisɛgɛ ánjá ɓamponjo á ɓake ka konda á ɓamunyaɓɔ na konda á ɓ'anaɓɔ,

⁵ ɓáɓɛ phɔtɔ ɓato á tambea ánjá, na ɓáɓɛ kángá á ɓɔjɔɔkiɔ. Ɓátɔtɔkisɛ ekuma á k'éndu nɛɓɔ ánjá, ɓáɓɛ ɓake ɓánjá, ɓáɛɓɔ́kɛ ɓamunyaɓɔ ka gea, ɓakpa ɓákátɛbɛɛgɛmbɛ nyɔngɔ á Mokonga.

⁶ Ɔ́phɛá phɔtɔ ɓaganda gea, ɓáɓɛ ɓato-úbapha

⁷ ka kema bui. Oɓɛ sasakɔ, óɓɛ mphangiɔ k'ékuma ánjá. Góisaga tɔ ɓɔphɛi á ɗoni, nnde akeni.

⁸ Ambe phɛá tɔ nyɔngɔ á ɗoni, nnde nkpa káyɛku. Ɓondɔ unge, ǒkusande ɓaɓiɓia akɔ na soni, na ɓákáyɔngɛku ye ájeɗe ka phɔasu.

⁹ Ambe ɓakɔɓɛ ɓɛ́ɓɔ́kɛ ɓakɔta nɛɓɔ ka kema bui. Ɓékondisɛgɛ na ɓakɔta nɛɓɔ kángá á pua na ɓɔ na

¹⁰ kángá á úɓa kema nɛɓɔ. Ɓéphangiɛ sasaɓɔ esa bui gea, ɓánde ɓakpa nde ɓakeni na ɓeekea aɓɔ, ka gea ɓáɗokomisɛ goaga nyɔngɔ ndea Mokonga, Namisi nɛsu ka kema bubui.

Yéso akondi ɓéɓɛ ɓakpa nɛkɛ

¹¹ Eya, Mokonga asóphangi base ɓonjánja-ékondi nɛkɛ, n'ande cina á ɓoamia á ka měma ka ɓakpa ɓɔbu.

¹² Ɓonjánja-ékondi ndɔ unge, asóphangisi yá á kema ájeɗe, na mɔphɛ á ka mokonda ndee, ɓétambeɛ ka mbenɔ nde na kɔɓɔɔngɛ, na koɗoni na ɓánga á Mokonga.

¹³ Ɓeogea ɓó, ka ɓondea á maseye nde ɓeseɓei, na ɔna á ɓoombia ndea Mokonga nɛsu angbóngbó na Namisi nɛsu Yéso Kiísito mbenɔ nde asɛnɛkande.

¹⁴ Yéso Kiísito sasakɛ aámbé ɗáku ka phɔasu ka gea, asophúiɛ ka ɓojeɗe bui, na sokosea asu ka gea ɓéɓɛ ɓakpa nɛkɛ sasakɛ ɓunde ɓána siki á tɔtɔkisa á ekuma ánjá.

¹⁵ Cɔ, ɓondɔ ungɔ akeni ógoisɛgɛ na gbagisaga á měma á ɓakpa na phekeaga aɓɔ na kɔkɔta nɛkɔ bui. Ambe nkpa kakɔɓɛnjiɛgɛmbɛ.