Títɔ 1 - Ɔngana á Kɛ̌kɛ

Nsesɔ

¹ Títɔ, samba! Eme Pɔ́lɔ, mbɛɗanigi nde ɓa Mokonga na nteki nde ɓa Yéso Kiísito aámbé neɗundu ɓaoɓa ndee. Mokonga ɗámoteki ka gea, ɓakpa nde yɛ ɗáɛsɔmbu ɓámɓeekeɛ na úbisa aɓɔ ɗoni nde akeni ka kanisa nɛsu.

² Kaɓondɔ, ɓáɓánde na nseɓeɔ á enda á mɛyɔ, nnde Mokonga, mmbé nnaɔyɔnga mbɛa, ɗásɔɔku mosá á mbenɔ bubui.

³ Ka mbenɔ nde Mokonga Namisi nɛsu ɗábisi, ɗámoúbisi base mbino nde ɗámopi ka ɓeana na moangɔ nɛkɛ gea te, nɛ́tɔ̌miɛgɛ.

⁴ Nekoɗundui ɓaoɓa nde, oɓɛ Títɔ, miki nɛmɔ á ɗoni ka ɓeekea nde ɓenoɓɛ kau. Cɔ, Abɛ Mokonga, na Kiísito Yéso Namisi nɛsu, ákophɛ ɓonjánja-ékondi na ɓujɛjɛ.

Ekuma ndea Títɔ ka kesanga á Kɛɛ́tɛ

⁵ Cɔ, ɗékosagi ka kesanga á Kɛɛ́tɛ ka gea, ɔ́ɓɔngisɛgɛ nyɔngɔ bui nde ajigi, na bisa á ɓagbɛga á kanisa ka ntanga-nji bui, ɓíndɔ ɗékososi.

⁶ Ngbɛga á kanisa áɓɛ nkpa á kanga kisɛki. Mǒko nde a tɔ na nke moci. Ɓ'anakɛ ɓáɓɛ ɓaɓêki, kángá á kitɔngi á tambea ájeɗe na mɔ̌ akpɛ.

⁷ Ambe nambi-kanisa, áɓɛ kángá kisɛki nga, yɛ aoamba kanisa ndea Mokonga. Cɔ, kaɓɛmbɛ nto-ébeba, nto-ésuia, nto á ɓoita, nkae, nto á maibe-maibe ka imɔna.

⁸ Áɓɛ ndiu nsesi á ɓakɛni, nto á konda kema nde aánjá, nto á kanisia ánjá, nto á koɗoni, nto á kanga á ɓojeɗe, nto-éamba sasakɛ.

⁹ Áɓɛ nto á amba á nyɔngɔ á ɗoni nnde akeni ka ɓeekea, ka ɓeana na goaga nde ɗáɓeeki. Kaɓondɔ, goaga nɛkɛ á ɗoni ěgbagisagande gǎkɛ ɓato á Mokonga ka měma na tɔka á ɓakpa nde ɓáoyá goisaga nɛkɛ.

Óengani na ɓɔphɛi á mbɛa

¹⁰ Cɔ, ɓakpa ɓásii, asa phɔ́ sɔsɔɓɛ á Ɓayúda íɓunde ɗáɓámɓeeki Yéso, ɓáoyá ɓɔphɛi á ɗoni na demaga á ɓakpa na yɔnga á jǎi-jǎi.

¹¹ Cɔ, ambe dakanisa aɓɔ nga, ɓáotúkatúka ekombo bui na ɓɔphɛi nde kákeni, ka gea, ɓátɔɛ imɔna k'aphe ájeɗe á soni.

¹² Cɔ, nto á ka Kɛɛ́tɛ moci, mmbé ɗátú mɔtu-nyɔngɔ ndea Mokonga, ɗáyɔngi ɓe: «Ɓakɛɛ́tɛ ɓánde ɓato á mbɛa esa bui, ɓanyama ɓájeɗe, ɓakákutɛ, ɓaútu.»

¹³ Nyɔngɔ bui nde ɓáyɔngi ka phɔa Ɓakɛɛ́tɛ, ande ɗoni. Kaɓondɔ, óphekeaga akpɛ phɛɛ ka gea, ɓáɓɛ na ɓeekea á ɗoni,

¹⁴ ka gea, ɓákaɓeekeɛ egani á jǎi-jǎi ndea Ɓayúda, ɓákaɓeɛmbɛ ɛɔphi ndea ɓakpa nde ɓáyé ɓɔphɛi á ɗoni.

¹⁵ Cɔ, kema bui nnde kájɔɔkani a ka phɔa ɓunde ɓákájɔɔkani, nna gǎkɛ na ka kema nde kájɔɔkani nnde a ka phɔa ɓunde ɓájɔɔkani na ɓunde ɓákámɓeeki Mokonga nga, úbapha aɓɔ, na měma aɓɔ ajɔɔkani.

¹⁶ Ɓáɔyɔnga te, ɓáomúba Mokonga, na ekuma nɛɓɔ a gǎkɛ ophangia gea, ɓáongána Mokonga. Ɓɔ, ɓáogea kema nde ɓakpa ɓáokangea ú, ɓákáɔmɔ́ka nkpa, ɓákáɔtɔka na ɓátɔtɔkisi ekuma ánjá.