Ɓalɔ́ma 9 - Ɔngana á Kɛ̌kɛ

Mokonga ɗɛ́sɔmbu Ɓaisilaɛ́li

¹ Nɛɔyɔnga ɗoni ka jukana na Kiísito, ké gǎkɛ ɔyɔnga mbɛa. Měma á kanga ɓojeɗe asɔndɔi měma ani ka ɗigimisa gea, nɛɔyɔnga ɗoni.

² Měma ani atúmi na ɓɛí phɛɛ na tambaga nde nna na sungiaga.

³ Nɛtɔ́ɔni ánjá Mokonga ámɔsɛmɛɛgɛ na nékatanɛ na Kiísito ka nyɔngɔ á ɓana-ayi íɓundɔ nɛɓɔkɔtɛani na ɓɔ.

⁴ Ɓɔ, ɓánde Ɓaisilaɛ́li ɓunde Mokonga ɗáɛsɔmbu ɓáɓɛ ɓ'anakɛ, ɗáɛɓɔnisi ɓophombia nɛkɛ, ɗáɔngani na ɓɔ, ɗáeɓophi ɛɔphi na mɔkɔ na ɔnisa aɓɔ moangɔ á beba akɛ.

⁵ Ɓá k'ɛ́ɓɔkɔti ndea ɓatatasu. K'ɛ́ɓɔkɔti ndɔ tɔ unge Yéso ɗáɓɔkɔtɛani na nyama á kokpa. Yɛ gǎkɛ, a gǔ á ɓakpa ɓɔbu. Obebɔ áɓɛ ka Mokonga esa bui, áɓɛ ɓó!

⁶ Kégi gǎkɛ te, mɔkɔ ndea Mokonga ɗákátɔtɔkɛani ka nyɔngɔ nde, nna ɛɓɔkɔti bui á Ɓaisilaɛ́li aunge ɓánde Ɓaisilaɛ́li á ɗoni á ɗoni,

⁷ goto, nna ɛɓɔkɔti bui á Abalaámu aunge ɓánde ɓ'anakɛ á ɗoni á ɗoni. Nga, Mokonga ɗángi Abalaámu te: «Ɓana Isáka tɔ ɓáunge ɓáɓande ɛɓɔkɔti nɛkɔ á ɗoni á ɗoni nnde ɗékɔɔku.»

⁸ Ande gea te, nna ɓaniki ɓɔbu ɓunde ɓáɓɔkɔtɛani ka etéte á kokpa ɓáunge ɓánde ɓaniki ndea Mokonga. Ɓaniki nde ɓáɓɔkɔtɛani ndiu ka ɓeana na mɔkɔ ndea Mokonga, ɓɔ tɔ ɓáunge ɓánde ɛɓɔkɔti á ɗoni á ɗoni.

⁹ Nga, Mokonga ɗámɔku Abalaámu ɓe: «Ka matú ɓínde tɔ unge nebikande, na Sála amɓɔkɔtande miki-mǒko.»

¹⁰ Nna gǎkɛ tɔ nndɔ, a ɓíndɔ Lɛbɛ́ka ɗáɛɓɔkɔti ɓapháse ɓaniki ɓǒko na tatasu Isáka.

^11-12 Mokonga a gǎkɛ na moangɔ nɛkɛ ka sɔmbɔa á ɓakpa. Sɔmbɔa ndɔ, atóki ka mɔphani nde yɛ aɛɓɔphani, nna ndiu ka tambea aɓɔ. Ka ɔnisa gea, nnaoanganisa moangɔ nɛkɛ, Mokonga áongoɗea Lɛbɛ́ka na káeɓonjimbɛ ɓaniki-ɓǒko nɛkɛ, na ɓákágimbɛ mɔnɔ kaɓɛ kema ánjá kaɓɛ kema ájeɗe gea: «Ngbɛga ambɛɗaneagande miki.»

¹³ A ɓíndɔ ɓáɗundu suɓi á Ɓuku gea: «Ɗénkondi Yakɔ́ɓɔ, nê ndiu onkagea Ɛsáu.»

¹⁴ Cɔ, ɓégeɛ ɓo? Mokonga aɔtɔka n'amɓayi nkpa? Tanda phɔ́!

¹⁵ Mpɔ Mokonga áongoɗea Mósa te: «Nenkuiande ngomi nkpa nde nekondi kuia akɛ ngomi na nentaɓeande mmbé nekondi taɓea akɛ.»

¹⁶ Cɔ, nndɔ nnaotóka ka mɔphɛ á nkpa kaɓɛ ka ɓukpɛkpɛ nɛkɛ. A ndiu otóka ka Mokonga mɛna-ngomi.

¹⁷ Mokonga áongoɗea Phaláɔ suɓi á Ɓuku gea: «Netókobisi tɔ moamɛ ka gea k'óɓɛ unge neúbisande ɓukpɛkpɛ ani na ka gea ina ani ɓáɛmbisɛ ka mokonda bui.»

¹⁸ Ande gea te, Mokonga aokonda kuia á nkpa ngomi, áonkuia. A gǎkɛ okonda nkpa áɓɛ na měma akpɛ, nkpa ndɔ áoɓa ně.

Mokonga á n'esúia na ngomi

¹⁹ Kǎi omongoɗeande gea: «Ka nyɔngɔ sina nde Mokonga asóyeyande goto? Ana nkpa nde aɔtɔka n'ayé kema nde Mokonga akondi?»

²⁰ Oɓɛ nkpa onde ani ka púa ka nyɔngɔ á kema nde Mokonga akondi? Ɔɔ́nimbɛ mɔnɔ mbeka-toko n'amúsi nkpa nde aɓɔngisigi ú te: «Ka nyɔngɔ sina nde omoɓɔngisigi ɓende?»

²¹ Mɓɔngisigi mbeka-toko aɔtɔka n'abɛɗanɛigi oɗo ɓíndɔ yɛ akondi. Na oɗo ndɔ tɔ, aɔtɔka n'aɓɔngisigi mbeka nde atétemani na nnde kátétemani.

²² Cɔ, Mokonga ɗákondi ɔnisa esúia na ɓukpɛkpɛ nɛkɛ. Ɗá gǎkɛ na měma á phiphia phɛɛ ka ɓakpa nde ɗákeni áɛ́ɓɛ̌ɛ na tena á nyɔngɔ nɛɓɔ akpɛ.

²³ Ɗákondi gǎkɛ áɔnisɛ ɓoombia akɛ phɛɛ ka ɓunde ɗáekui ngomi, ɗáɛɓɔngisigi kpanga kala ka ɓá na ɓoombia ndɔ.

²⁴ Ɓesu ɓáunge ɗásɔɔphani, nna tɔ sɔsɔɓɛ á Ɓayúda, phɔtɔ sɔsɔɓɛ á ɓunde ɓáná Ɓayúda.

²⁵ A ɓíndɔ ɗáɗundu suɓi á ɓuku ndea Ɔsɛ́a mɔtu-nyɔngɔ ndea Mokonga: «Ekuna nde kátú á ɓakpa nɛmɔ, nɛɔphanande ú nɛmɔ na ekuna nde kétúokonda, nɛɔphanande ú ekuna á ekondi.

²⁶ Ɔma nde ɗáěngoɗi gea: ‹Ɓókó ɓakpa nɛmɔ›, wa tɔ unge ɓáɛɓɔphanande ɓana-Mokonga, Mɛna-enda.»

²⁷ Isáya áɔɔ́tɔa nyɔngɔ akpɛ ka phɔa Ɓaisilaɛ́li gea: «Nanga Ɓaisilaɛ́li ɓáɓika ɓea mbúme á k'óɓenge, ka ɓɔ moci-moci tɔ ɓáunge ɓáamande ka měma.

²⁸ Nga, Mɔkɔta akamisagande tɔtɔkisa á nyɔngɔ nɛkɛ ka mokonda.»

²⁹ A ɓíndɔ Isáya mɔtu-nyɔngɔ ndea Mokonga ɗáɔtu gea: «Atú oɓá Mokonga mɛna-ɓukpɛkpɛ na ɗákásóɗeketei ka ɓato á ɛɓɔkɔti ámbé ɗéɓetóɓaeka ɓea ɓato á ka Sɔdɔ́ma, ɓetókengeanaeka na ɓato á ka Gɔmɔ́la.»

Ɓunde ɓámɓeeki Yéso Kiísito ɓáunge Mokonga aǒtanga ɓato á koɗoni

³⁰ Cɔ, ɓégeɛ ɓo? Ɓakpa nde ɓáná Ɓayúda ɓunde ɗáɓákáokáɓa koɗoni, ɓɔ ndiu ɓáunge yɛ Mokonga aɛɓɔni gea, ɓánde ɓato á koɗoni mosá akɛ, nga ɓámɓeeki.

³¹ Ɓaisilaɛ́li ɓunde ɗáɓáokáɓa ɔnɛkana ɓato á koɗoni mosá á Mokonga ka amba ɛɔphi ɓâ ndiu ko úka.

³² Ka nyɔngɔ éke? Ka nyɔngɔ nde ɗáɓákáoɓondea koɗoni na ɓáɓeeki, ɓâ ndiu okanisia te, ɓátɔande ú k'ékuma. Ɓáɔɓɛtɛkana k'ɛ́tɛ á ɓɛtɛkisa.

³³ Ɓindɔ Ɓuku á Mokonga ayɔngi: «Ɔ́nani ɓî nebisi ɛtɛ á ɓɛtɛkisa ka Sayúni na ekǒngo á gusisa. Cɔ, mmbé aomɓeekea, kákuwɛku na soni.»