Ɓalɔ́ma 8 - Ɔngana á Kɛ̌kɛ

Tambea ɓíndɔ Měma á Mokonga akondi

¹ Cɔ, kɛ̌kɛnde, ɓakpa nde ɓá suɓi á Kiísito Yéso, ɓákátenɛku ye tanda nyɔngɔ nɛɓɔ akpɛ.

² Nga, akoɓá nkpa n'asuɓi á Kiísito Yéso, Měma á kanga ɓojeɗe nnde aoendisa, aunge ande ɛɔphi nɛkɛ. Ɛɔphi ndɔ unge ɗámotókisi kusi á kɔkɔta á ɓojeɗe na kukuwa.

³ Cɔ, Mokonga aámbé atɔtɔkisi kema nde ɛɔphi ndea Mósa ɗákátɔki nga, nyama á kokpa ɗákátɔki tɔtɔkisa í. Ka íma á ɓojeɗe, Mokonga ɗánteki Anakɛ n'etéte nde akengeani na etéte á ɓakpa íɓunde ɓánde ɓato á ɓojeɗe ka gea te, k'Anakɛ unge Mokonga ɗáteni nyɔngɔ á ɓojeɗe akpɛ ka nyama á kokpa.

⁴ Mokonga ɗátɔtɔkisi nndɔ ka gea te, tambea asu áɓɛ ɓíndɔ ɛɔphi asosi nga ɓéké ye oɓea tambea asu á kokpa, ɓe ndiu oɓea tambea nde Měma á Mokonga akondi.

⁵ Nga, ɓakpa nde ɓáoɓea tambea á kokpa, ɓáɔtɔtɔkisa mɔphɛ á kokpa. Ɓakpa nde ɓá gǎkɛ oɓea tambea á Měma á Mokonga, ɓá tɔ ɔtɔtɔkisa mɔphɛ á Měma ndɔɔ.

⁶ Cɔ, nkpa aoɓea tambea á kokpa, tambea ndɔ áonkusa. Nkpa a gǎkɛ oɓea tambea á Měma á Mokonga, tambea ndɔ áomopha enda na ɓujɛjɛ.

⁷ Nga, ɓakpa nde ɓáoɓea tambea nɛɓɔ á kokpa, ɓánde ɓaɓiɓia á Mokonga. Ɓɔ, ɓákáotambea ɓíndɔ ɛɔphi ndea Mokonga asosi nga, ɓáká tanda ɔtɔka ú.

⁸ Ɓakpa nde ɓáoɓea tambea á ɓɔ á kokpa, ɓákáɔtɔka na ɓámɓɔngɛi Mokonga.

⁹ Cɔ, ɓenu, ɓókó ye gǎkɛ oɓea tambea á kokpa, ɓo ndiu oɓea tambea á Měma á Mokonga, ka nyɔngɔ nde aiki suɓi anu. Aoɓá nkpa na nna na Měma á Kiísito, nkpa ndɔ nna nkpa ndea Kiísito.

¹⁰ A gǎkɛ oɓá Kiísito n'aiki suɓi anu, nanga nyama anu á kuwa ye ka nyɔngɔ á ɓojeɗe, Měma á kanga ɓojeɗe nnde á suɓi anu aunge aonoendisa nga, Mokonga a ye onotanga ɓato á koɗoni mosá akɛ.

¹¹ Kaɓɛ Měma á Mokonga mmbé ɗánjujúkisi Yéso sɔsɔɓɛ á ɓasí n'aiki suɓi anu, yɛ mmbé ɗánjujúkisi Kiísito sɔsɔɓɛ á ɓasí tɔndɔ aámbé aendisande nyama anu á kukuwa na Měma akɛ nnde a suɓi anu.

¹² Cɔ, ɓaya, ɓena nyɔngɔ á phenda í. Nyɔngɔ ndɔ nna gǎkɛ á nyama asu ka ɓeá tambea nɛsu á kokpa.

¹³ Nga, kaɓɛ na ɓooenda ka tambea nɛnu á kokpa, ɓokuwande. Kaɓɛ gǎkɛ na ɓokusí nyama anu ka ɓeá tambea á Měma á Mokonga, ɓoendande.

¹⁴ Nga ɓakpa ɓɔbu ɓunde Měma á Mokonga aǒtambisa, ɓánde ɓana-Mokonga.

¹⁵ Cɔ, Měma á Mokonga nnde ɓɔtɔí mɔtɛ á Mokonga, nna měma índɔ á ngisa anu ka kɔkɔɓɛ na túmisa goto kɔɓɔɓɔkɔ suɓi anu, a ndiu Měma nde anobisi ɓóɓɛ ɓana-Mokonga. Ka nyɔngɔ á Měma ndɔ aunge ɓɛɔtɔka ɔphana á Mokonga «Abɛ.»

¹⁶ Měma á Mokonga sasakɛ aámbé aɗigimisi měma asu gea, ɓesu ɓende ɓana-Mokonga.

¹⁷ Cɔ, kaɓɛ na ɓende ɓaniki, ɓeɓande phɔtɔ na ka ɓotukɔ nde Mokonga aɛɓɔku ɓakpa nɛkɛ. Ɓɛtɔande ɓotukɔ ndɔ kimoci na Kiísito nga, ɓî ɓeotambaga kimoci na yɛ, ɓeɓande phɔtɔ kimoci na yɛ ka ɓoombia nɛkɛ.

Ɓoombia nde abikaeka

¹⁸ Nɛɔni gea tambaga bui nde ɓeně kɛ̌kɛnde kákengeani na ɓoombia nde Mokonga asóphangiande base.

¹⁹ Kema bui nde Mokonga aconji aoɓondea na mosenda phɛɛ mbenɔ nde Mokonga aphangisiaeka ɓoombia á ɓ'anakɛ base.

²⁰ Nga ɓábisi kema ndɔ bui kusi á kɔkɔta nde nna na kantíti. Nna ka gea atókenanigi na ɓó, a ndiu ka gea Mokonga aámbé abisi ú ɓó. Cɔ, kema nde ɗáɓáseɓei aungɔ.

²¹ Ande gea, kema ndɔ bui nnde Mokonga aconji atókande kusi á kɔkɔɓɛ á otúkɔtúkɔ, angiande ka ɓoombia ndea ɓana-Mokonga.

²² Cɔ, na ka kesande, ɓeoúba gea kema bui nde Mokonga aconji aoɓénga kimoci na kokae ɓea ama-kaeme n'aka ɓoaé.

²³ Nna tɔndɔ kema bui nde Mokonga ɗáconji, ɓesu íɓunde ɓe ye na Měma á kanga ɓojeɗe ɓea měma égabɔ ndea Mokonga, ɓe phɔtɔ oɓénga ka měma ka ɓondeaga gea ɓéɓɛ ɓana-Mokonga na mbenɔ nde yɛ akoɗagande nyama asu.

²⁴ Nga, ɓena nseɓeɔ gea ɓeami ye ka měma. Cɔ, seɓea á kema nde ɔɔna, nndɔ nna ye nseɓeɔ nga, ani mmbé aɔtɔka n'aseɓei kema nde aɔɔna?

²⁵ Cɔ, kaɓɛ na ɓeseɓei kema nde ɓékékɔɔna, ɓe gǎkɛ oɓondea ú na měma á phiphia.

²⁶ A phɔtɔ ɓó unge Měma á kanga ɓojeɗe aosoenga ka kángá ɓá asu na ɓukpɛkpɛ. Cɔ, ɓékéoúba mɛma á Mokonga ɓíndɔ akeni k'ɛ́mɛmi nɛsu. A gǎkɛ tɔ Měma á kanga ɓojeɗe aunge aɔmɛma ka phɔasu na ɗengemisaga nyɔngɔ nde ɓɛ́kɛ́ɔtɔka yɔnga í.

²⁷ Cɔ, Mokonga mmbé aɔɔna suɓi á měma asu, aámbé aoúba mɔphɛ á Měma á Mokonga. Měma ndɔ aámbé aɔmɛma Mokonga ka phɔa ɓaɓêki ɓíndɔ Mokonga aokonda.

²⁸ Cɔ, ɓeoúba gea, kema bui a tɔ ka ɓonjánja á ɓakpa nde ɓánkondi Mokonga. Ɓakpa ndɔ ɓáunge, yɛ ɗɛ́ɓɔphani ka ɓeana na moangɔ nɛkɛ.

²⁹ Nga, ɓakpa nde Mokonga ɗɛ́sɔmbu kala, ɗáeangei phɔtɔ kala gea, ékengeanisɛ na Anakɛ, ka gea Anakɛ áɓɛ ánge mmbé ana ɓamɔtɔakɛ ɓásii.

³⁰ Ɓakpa nde Mokonga ɗɛ́sɔmbu kala, ɗɛ́ɓɔphani phɔtɔ. Ɓunde ɗɛ́ɓɔphani, ɗétangi phɔtɔ ɓato á koɗoni. Ɓundɔ ɗétangi ɓato á koɗoni, ɗéɓophi phɔtɔ ɓoombia nɛkɛ.

Ekondi ndea Mokonga aángbó

³¹ Cɔ, ka nyɔngɔ índɔ, ɓɛ́yɔngɛ goto ɓo? Kaɓɛ Mokonga n'asógami, ani mmbé aɓande na ɓukpɛkpɛ gǔ asu?

³² Nga, Mokonga ɗákámkpɛmi n'Anakɛ sasakɛ, ɗámphúi ndiu gea te, átambɛgɛ ka phɔa asu ɓesu ɓɔbu. Cɔ, kásóphɛku kema bui kimoci n'Anakɛ ka ɓo?

³³ Ani mmbé aɛ́tɔngande ɓakpa nde Mokonga aɛ́sɔmbu? Tanda nkpa mo. Nga, Mokonga aámbé aǒtanga ɓakpa ndɔ ɓato á koɗoni.

³⁴ Ani mmbé aɔtɔka n'ateni nyɔngɔ nɛɓɔ akpɛ? Nna tanda na nkpa mo. Nga, Kiísito Yéso aámbé ɗáku, gǔ índɔ, áojujuka ka kukuwa, aiki ka njaga á mǔku á Mokonga n'a phɔtɔ ɔmɛma ka phɔasu.

³⁵ Ekende áɔtɔka katanisa asu n'ekondi ndea Kiísito? Tambaga, kema ájeɗe nde aoúja měma á nkpa, kisoni, nja, ɓuyɛnɛ á ngɔ́mbɛ, ɓiá, kukuwa?

³⁶ Ɓáɗundu suɓi á Ɓuku á Mokonga ɓe: «Ka nyɔngɔ akɔ unge kukuwa aosókena esa bui. Ɓáɔsɔɔna ɓea ɓamɔgɔgɔ nde ɓákeni na kukuwa.»

³⁷ Ka kema ndɔ bubui, ɓe gǎkɛ okínda ka nyɔngɔ á nkpa nde asókondi.

³⁸ Ka nyɔngɔ nde neoúba ɗoni gea, nna na kema nde aɔtɔka n'asókatanisi na ekondi ndea Mokonga. Kaɓɛ n'ande kukuwa, kaɓɛ n'ande enda, kaɓɛ n'ande ɓamalaéka, kaɓɛ n'ande ɓakɔta, kaɓɛ n'ande kema á kɛ̌kɛ, kaɓɛ n'ande kema nde abikande, kaɓɛ n'ande ɓato á ɓukpɛkpɛ,

³⁹ kaɓɛ n'ande ɓukpɛkpɛ á k'ego, kaɓɛ n'ande ɓukpɛkpɛ á kusi, kaɓɛ n'ande kema bui nde Mokonga aconji, kátɔkɛku tanda n'asókatanisi n'ekondi ndea Mokonga, nnde ɗásɔɔnisi ka Kiísito Yéso Mɔkɔta nɛsu.