Ɓalɔ́ma 7 - Ɔngana á Kɛ̌kɛ

Mokiísito nna ye kusi á kɔkɔta á ɛɔphi

¹ Cɔ, ɓaya, ɓoodigimisa nyɔngɔ ɛ́ɔphi nde nɛɔyɔnga na ɓenu íɓunde ɓooúba ɛɔphi ánjá gea te, nkpa a tɔ oɓá kusi á kɔkɔta ɛ́ɔphi mbenɔ nde a phɔ́tɔ koenda.

² Ɔ́nani phɔ́, nke-éyamani a tɔ kusi á kɔkɔta ɛ́ɔphi ka munyakɛ mbenɔ nde munyakɛ a phɔ́tɔ koenda. Munyakɛ a ye gǎkɛ okuwa, nke ndɔ nna ye kusi á kɔkɔta ɛ́ɔphi ka nyɔngɔ á mǒko ndɔ aku.

³ Kaɓɛ nke ndɔ n'aɔmani gǎkɛ na mǒko ɓaangbo na munyakɛ na kákumbɛ, nke ndɔ agú n'itoa. Munyakɛ a ye gǎkɛ okuwa, nke ndɔ nna ye kusi á kɔkɔta ɛ́ɔphi ka gea te, aɔɔmana na mǒko ɓaangbo, ɓákángeɛku agú n'itoa.

⁴ Cɔ, ɓaya, a phɔtɔ ɓó ka phɔanu ka nyɔngɔ á ɛɔphi, ɓenu ɗóɓoku phɔtɔ ɓó ka phɔa ɛ́ɔphi ka nyɔngɔ nde ɓojúkani na Kiísito ka nyama, mmbé ɗájujúki sɔsɔɓɛ á ɓasí ka gea te, ɓɛ́gɔmbisɛ mbuka ka Mokonga.

⁵ Nga, mbenɔ nde ɗéɓeotambea ka kokpa, mosenda ájeɗe nde ɛɔphi ɗáososea suɓi asu na kema ájeɗe bui nde ɗéɓeogea, ɗá tɔ osoɓotea ka kukuwa.

⁶ Cɔ, kɛ̌kɛnde ɓéké ye gǎkɛ kusi á kɔkɔta á ɛɔphi. Nga, ɓe ye ɓea ɓasí ka kema nde ɗásóɓóege. Ɓéké ye ɔmbɛɗaneaga Mokonga ɓíndɔ ɗéɓetú kau kala ka ɓeá ɛɔphi ndea Mósa, kɛ̌kɛnde ɓe ndiu ɔmbɛɗaneaga Mokonga ka ɓeá moangɔ á Měma á Mokonga.

Ɛɔphi ana kantíti sina?

⁷ Cɔ, ɓɛ́yɔngɛ ɓo? Ɛɔphi ande ɓojeɗe? Aoɓóɓóa! Ɗéúbi tɔ ɓojeɗe ka nyɔngɔ ɛ́ɔphi nga, atuoɓá na ɓákáɗundu k'ɛ́ɔphi gea: «Kóɓɛmbɛ na mɔphɛ ájeɗe» ámbé keúbi gea mɔphɛ ájeɗea ɓei.

⁸ Ka nyɔngɔ ɛ́ɔphi unge ɓojeɗe angí na jujúkisa á etéte á mɔphɛ ájeɗe-jeɗe bui suɓi ani. Nga atúoɓá ɛɔphi na káɓeí, ámbé ɓojeɗe aku.

⁹ Eme, ɗéoenda kala kángá á úba nyɔngɔ á ɛɔphi. Cɔ, mbenɔ nde moangɔ ɛ́ɔphi akpangi ye, ɓojeɗe áokpanga bɛɗanaga mpɔ,

¹⁰ eme néokuwa. Kaɓondɔ, ɛɔphi nde ɗátókeni ɓoteani ka enda, áomoɓotea ka kukuwa.

¹¹ Nga, ka nyɔngɔ ɛ́ɔphi aunge ɓojeɗe atɔí aphe á demaga ani. Ka nyɔngɔ ɛ́ɔphi phɔtɔ aunge ɓojeɗe atɔí aphe á mowa ani.

¹² Kaɓondɔ, ɛɔphi ndea Mokonga nna na ɓojeɗe, moangɔ ɛ́ɔphi ndɔ, ande á kanga ɓojeɗe, á koɗoni na aánjá.

¹³ Cɔ, ande gea, te kema nde aánjá aunge amobikisíí kukuwa? Tanda phɔ́! Ɓojeɗe unge ande cina á kukuwa. Ka gea te, ɓojeɗe áúbikanɛ ɗoni, ɗáúbikani suɓi á kema nde aánjá, ka gea ɓojeɗe ámokiɗianisɛ ka kukuwa. Ka nyɔngɔ ɛ́ɔphi ndɔ unge ɓojeɗe aúbikani base.

Ɓojeɗe ana kɔkɔta gǔ á nkpa

¹⁴ Eya, ɓeoúba gea ɛɔphi atóki ka Mokonga, eme ne ndiu na nyama á kokpa, mmbé ɗáɓánsombisi ɓea nkɔɓɛ á ɓojeɗe.

¹⁵ Ande ɗoni, kema nde nɛɔtɔtɔkisa kéoúba ú. Kema nde nekondi, kéɔtɔka tɔtɔkisa í. Kema nde ne gǎkɛ okangea aunge neogea ú.

¹⁶ Cɔ, aoɓá na nɛɔtɔtɔkisa kema nde kéokonda, ande gea neɓeeki gea ɛɔphi ande kema ánjá.

¹⁷ Kaɓondɔ, nna ye gǎkɛ eme aámbé nɛɔtɔtɔkisa kema ndɔ, a ndiu ɓojeɗe nde aiki suɓi ani.

¹⁸ Nga, neoúba nna na kema ánjá nde aiki suɓi ani, ande gea, k'etéte ani á kokpa. A tɔ ɓó nga, nena mɔphɛ á tɔtɔkisa á kema ánjá nde a suɓi ani, ké gǎkɛ ɔtɔka tɔtɔkisa í.

¹⁹ Cɔ, kéɔtɔtɔkisa kema ánjá nde nekondi ú, ne ndiu ɔtɔtɔkisa kema ájeɗe nde kéokonda.

²⁰ Kaɓɛ na nɛtɔtɔkisi kema nde kéokonda ú, ande gea nna ye eme aámbé neogea ɓó, a ndiu ɓojeɗe nde aiki suɓi ani.

²¹ Cɔ, nɛɔni gea, kema nde aɔnyɛ́nyɛ́kana ka phɔa ani a ɓe: Mbenɔ nde neokonda tɔtɔkisa á kema ánjá, nɛ tɔ ɔtɔtɔkisa kema ájeɗe.

²² Suɓi á měma ani, neokonda ɛɔphi ndea Mokonga.

²³ Suɓi á nyama ani nɛɔni gǎkɛ ɛɔphi nɛngbo nnde aomanisa kanisia ani. Nndɔ unge amobisi ka kɔkɔɓɛ ɛ́ɔphi á ɓojeɗe nde aɔbɛɗanaga suɓi ani.

²⁴ Ngomi ani eme nto á ɓuyɛnɛ ee! Ani mmbé amoamisande na nyama á kukuwa ndee?

²⁵ Mokonga áɓɛ n'obebɔ ka nyɔngɔ á Mɔkɔta nɛsu Yéso Kiísito! Kaɓondɔ, nɛɔbɛɗaneaga ɛɔphi ndea Mokonga ka úbapha ani, nê phɔtɔ ɔbɛɗaneaga ɛɔphi á ɓojeɗe ka etéte á nyama ani á kokpa.