Ɓalɔ́ma 6 - Ɔngana á Kɛ̌kɛ

Oɓatisɔ ande ɓea kukuwa na jujúka ka kukuwa kimoci na Kiísito

¹ Cɔ, ɓɛyɔngande ɓo? Ɓetútuisande ika suɓi á ɓojeɗe ka gea te, ɓonjánja-ékondi ndea Mokonga áɓikɛ?

² Tanda phɔ́! Ɓesu íɓunde ɓeku ka nyɔngɔ á ɗeketa asu ɓojeɗe, ɓɛtɔkande goto na ɓeendi suɓi á ɓojeɗe ka ɓo?

³ Ɓooɓosa te, ɓesu ɓɔbu íɓunde ɗáɓásóɓatisi ka nyɔngɔ á jukana asu na Yéso Kiísito, oɓatisɔ ndɔ asójúkanisi na yɛ ka kukuwa akɛ?

⁴ Ka phɔa oɓatisɔ ndɔ ɗéɓejúkani na yɛ ka kukuwa akɛ na ka úmba akɛ gea te, ɓíndɔ Kiísito ɗájujúki ka kukuwa sɔsɔɓɛ á ɓasí ka ɓoombia ndea Abɛ, ɓesu phɔtɔ ɓéɓɛ na tambea á enda á kɛ̌kɛ.

⁵ Cɔ, aoɓá na ɗéɓejúkani na yɛ ka kukuwa nde akengeani n'índɛkɛ, ɓejujukande gǎkɛ phɔtɔ na yɛ ka jujúka ka kukuwa ɓea yɛ.

⁶ Ɓéúbɛni gea, kokpa á kala nde ɗéɓetú ně mosá, ɗáɓákɔkɛigi ú gǔ á moyangɔ kimoci na Kiísito, ka gea, ɓátúkatúkɛ kokpa asu á ɓojeɗe. Ka gea ɓékéɓɛku ye ɓakɔɓɛ á ɓojeɗe.

⁷ Ka nyɔngɔ nde nkpa nde aku, nna ye tanda nkɔɓɛ á ɓojeɗe.

⁸ Cɔ, kaɓɛ na ɓeku kimoci na Kiísito, ɓeɓeeki phɔtɔ gea ɓeendande kimoci na yɛ.

⁹ Nga, ɓeoúba gea Kiísito ɗájujúki ka kukuwa, yɛ kákuwɛeka ye, ka nyɔngɔ nde kukuwa nna ye na kɔkɔta gǔ akɛ.

¹⁰ Nga, ka kukuwa akɛ ɓó, ɗáku tɔ mɔngɔ ímoci ka phɔa ɓojeɗe. Cɔ, kɛ̌kɛnde a ye gǎkɛ tɔ koenda ka nyɔngɔ á Mokonga.

¹¹ A phɔtɔ ɓó ka ɓenu. Ɓeekeani gea kukuwa ndɔ anókatanisi na ɓojeɗe bubui, ɓo ye gǎkɛ koenda ka nyɔngɔ á Mokonga ka jukana anu na Yéso Kiísito.

¹² Cɔ, ɓojeɗe kaɓɛmbɛ ye na kɔkɔta suɓi á nyama ndɔ á kukuwa na ɓókoɓeekeɛmbɛ ye tɔtɔkisa á mɔphɛ ájeɗe á nyama anu.

¹³ Ɓókobisɛmbɛ gbútuka á nyama anu ka tɔtɔkisa á ɓojeɗe, ka bɛɗanisaga í ɓea kema á tɔtɔkisa na kema ájeɗe. Óbisani ndiu buanu ka Mokonga ɓea ɓakpa nde ɓájujúki ka kukuwa. Bisani phɔtɔ nyama anu bui ka bɛɗaneaga á Mokonga ka tɔtɔkisa á koɗoni.

¹⁴ Ɓojeɗe káɓɛku ye na kɔkɔta gǔ anu nga, ɓókó ye kusi á ɛɔphi, ɓo ndiu kusi á ɓonjánja-ékondi ndea Mokonga.

Katana na ɓojeɗe ka nyɔngɔ á bɛɗaneaga á Mokonga

¹⁵ Cɔ, aɓo? Ɓégeɛ ɓojeɗe ka nyɔngɔ nde ɓéké kusi á ɛɔphi, ɓe ndiu kusi á ɓonjánja-ékondi ndea Mokonga? Tanda phɔ́.

¹⁶ Ɓoɗigimisi gea, ɓo ye oɓá ɓakɔɓɛ ndea nkpa na ɔ́ka á nyɔngɔ nɛkɛ bui, ɓo ye tɔ ɓakɔɓɛ nɛkɛ. Aoɓá kɔkɔɓɛ á ɓojeɗe, sungiaga í ande kukuwa. Aoɓá n'ande ɓánga á Mokonga, sungiaga í ande enda á ɓonjánja.

¹⁷ Cɔ, ɓosegi gǎkɛ ka Mokonga nga, ɓenu íɓunde ɗóɓotú kala ɓakɔɓɛ á ɓojeɗe, ɗóɓoɓǐ na měma anu bui, aphe á ɓɔphɛi nde ɗáɓánóphɛi.

¹⁸ Kaɓondɔ, ɓókó ye ɓakɔɓɛ á ɓojeɗe, ɓo ye ndiu ɓakɔɓɛ á gea á kema á koɗoni.

¹⁹ Nɛyɔngi wani k'etéte á kokpa, ka nyɔngɔ á kanga ɔ́kapha anu ánjá. A tɔ ɓíndɔ ɗóɓobisi nyama anu bui kala ka bɛɗaneaga á ɓojeɗe na enda ka ɓojeɗe, a phɔtɔ ɓó unge ɓóbisɛ ú kɛ̌kɛnde ka bɛɗaneaga Mokonga na ɓá na enda ánjá.

²⁰ Mbenɔ nde ɗóɓotú ɓakɔɓɛ á ɓojeɗe, ɗóɓokótú na kɔkɔta á tɔtɔkisa á koɗoni.

²¹ Cɔ, ɗóɓotɔí kema sina ka tambea ájeɗe nde ɗóɓootambea kala, nnde ɓookuwa na soni í kesande? Sungiaga í a tɔ kukuwa!

²² Kɛ̌kɛnde ɓókó ye ɓakɔɓɛ á ɓojeɗe, ɓo ye ndiu ɓabɛɗanigi ndea Mokonga. Ɓɔɔtɔtɔkisa kema nde aɔmɓɔngɛa Mokonga, sungiaga anu ande enda á mɛyɔ kimoci na Mokonga.

²³ Nga, ophendɔ á ɓojeɗe ande kukuwa, egabɔ á ɓonjánja-ékondi ndea Mokonga a ndiu enda á mɛyɔ kimoci na Kiísito Yéso Mɔkɔta nɛsu.