Ɓalɔ́ma 5 - Ɔngana á Kɛ̌kɛ

Kiísito asɔɔnganisi na Mokonga

¹ Cɔ, ɓî Mokonga asotangi ye ɓato á koɗoni ka nyɔngɔ á ɓeekea nɛsu, ɓena ɓujɛjɛ na Mokonga ka nyɔngɔ á Mɔkɔta nɛsu Yéso Kiísito.

² Ka nyɔngɔ akɛ phɔtɔ unge ɓena ɓeekea gea, ɓebîmisi ɓonjánja-ékondi ndea Mokonga nnde ande cina á ɓeekea nde ɓeikíí. Ɓena maseye ka nyɔngɔ nde nseɓeɔ nɛsu ande ɓá na ɓoombia ndea Mokonga.

³ Nanga ɓéotambaga, ɓena maseye nga, ɓeoúba gea, tambaga aobikisa moíngí,

⁴ moíngí áobikisa phiphia ka tombaga, phiphia áobikisa nseɓeɔ.

⁵ Nseɓeɔ ndɔ nna okusa na soni ka nyɔngɔ nde, Mokonga aɛmbisi ekondi nɛkɛ suɓi á měma asu ka nyɔngɔ á Měma á kanga ɓojeɗe nde ɗásóphi.

⁶ Cɔ, ɓî ɗéɓékétú phɔ́ na ka ɓukpɛkpɛ, Kiísito ɗáku ka phɔa ɓato á ɓojeɗe ka mbenɔ ánjá nde Mokonga ɗáangi.

⁷ Aákpɛ ka nkpa ɓeekea ákuwɛ ka phɔa á nto á koɗoni. Nkpa aɔtɔka ɓeekea kukuwa ka nyɔngɔ á nkpa anjánjá.

⁸ Cɔ, Mokonga aphangi gǎkɛ ekondi nɛkɛ ángbó ka ɓesu, ka nyɔngɔ nde Kiísito ɗáku ka phɔa asu mbenɔ nde ɗéɓetú phɔ́tɔ ɓato á ɓojeɗe.

⁹ Kɛ̌kɛnde, Mokonga asótangi ye ɓato á koɗoni ka nyɔngɔ á magia ndea Yéso, nndɔ aúbisi base gea, yɛ asóamisande k'ésúia ndea Mokonga.

¹⁰ Nga, mbenɔ nde ɗéɓetú ɓaɓiɓia ndea Mokonga, ɗásɔɔnganisi na yɛ ka nyɔngɔ á kukuwa á Anakɛ. Nndɔ aphangisi base gea, ɔngana asu na yɛ, ɓeamande ka nyɔngɔ á enda á Kiísito.

¹¹ Nna tɔndɔ nndɔ, ɓe ndiu na maseye ka Mokonga ka nyɔngɔ á Mɔkɔta nɛsu Yéso Kiísito mmbé asɔɔnganisi kɛ̌kɛnde na Mokonga.

Adámu na Yéso Kiísito

¹² Cɔ, ka nyɔngɔ á nkpa moci tɔ, Adámu aunge ɓojeɗe ɗángí ka mokonda, ɓojeɗe ndɔ áobikisa kukuwa. Kaɓondɔ unge, kukuwa andandi ka ɓakpa ɓɔbu nga, ɓɔbu ɗáɓági ɓojeɗe.

¹³ Cɔ, mosá á Mokonga opha á Mósa ɛɔphi, ɓojeɗe ɗátú tɔ ka mokonda. Ɔma nde ɛɔphi nna ɓei, ɓákáotanga ɓojeɗe.

¹⁴ Ɓî a ɓó, kukuwa ɗátú na kɔkɔta kpanga ka matú ndea Adámu na ka gǎ jua ka matú ndea Mósa. Kɔkɔta á kukuwa ɗátú gǔ á ɓakpa nde nanga ɗáɓákagi ɓojeɗe ɓea Adámu, mmbé ɗátingíígi ɛɔphi ndea Mokonga. Adámu akengeani na nkpa nde ɗáɓáoɓondeaga bika akɛ.

¹⁵ Cɔ, ɓojeɗe ndea Adámu atingani phɛɛ n'egabɔ á ɓonjánja-ékondi ndea Mokonga. Eya, aoɓá ka nyɔngɔ á ɓojeɗe á nkpa moci tɔ aunge ɓakpa ɓásii ɓáokuia, cɔ, Mokonga ayami gǎkɛ ɓonjánja-ékondi nɛkɛ phɛɛ ka phɔa ɓakpa ɓásii na egabɔ a tɔ ɔtɔtɔkɛana ka nkpa moci mmbé ɓáɔmɔphana Yéso Kiísito.

¹⁶ Goto, egabɔ ndea Mokonga atingani na kema nde ɗátɔtɔkɛani ka nyɔngɔ á ɓojeɗe ndea Adámu. Ka nyɔngɔ á ɓojeɗe ndea nkpa ndɔ tɔ moci, aunge Mokonga ɗáteni nyɔngɔ ndea ɓakpa akpɛ. Cɔ, ka nyɔngɔ á egabɔ á ɓonjánja-ékondi ndea Mokonga mbusa á ɓojeɗe ásii ndea ɓakpa, aunge yɛ aǒtanga ɓakpa ɓato á ɓonjánja mosá akɛ.

¹⁷ Ande ɗoni, kukuwa ɗátú na kɔkɔta ka nyɔngɔ á ɓojeɗe ndea nkpa moci, nkpa moci ndɔ tɔ. Cɔ, ka nyɔngɔ á Yéso Kiísito tɔ unge ɓe gǎkɛ ɔtɔa kema ásii á ɓonjánja-ékondi ndea Mokonga na egabɔ á koɗoni ndea Mokonga. Ɓakpa nde ɓána ɓonjánja-ékondi ndea Mokonga na egabɔ nɛkɛ, ɓáendande na ɓáɓande na kɔkɔta ka nyɔngɔ á Yéso Kiísito sasakɛ.

¹⁸ Cɔ, ka nyɔgɔ nde ɓojeɗe ndea nkpa moci aunge Mokonga ateni nyɔngɔ á ɓakpa ɓɔbu akpɛ, a phɔtɔ ɓó ka nyɔngɔ á nto á kanga ɓojeɗe moci tɔ, Yéso Kiísito, ekuma nɛkɛ aékoɗigi ɓakpa ɓɔbu ka tena á nyɔngɔ na opha á ɓɔ enda.

¹⁹ Cɔ, ɓî ka nyɔngɔ á ɓojeɗe ndea nkpa moci tɔ unge ɓakpa ɓásii ɓángí ka ɓojeɗe, a phɔtɔ ɓó unge ka nyɔngɔ á ɔ́kapha á nkpa moci tɔ, Mokonga aétangande ɓakpa ɓásii ɓato á koɗoni mosá akɛ.

²⁰ Ka nyɔngɔ á kiɗiana á ɛɔphi, aunge ɓojeɗe aɓiki. Cɔ, ɔma nde ɓojeɗe ɗáɓiki, ɓonjánja-ékondi ndea Mokonga ɗáɓiki phɛɛ.

²¹ Kaɓondɔ, ɓî ɓojeɗe ɗátú na kɔkɔta, áɔtɔtɔkisa kukuwa, ɓondɔ phɔtɔ unge ɓonjánja-ékondi ndea Mokonga áɓɛ na kɔkɔta ka koɗoni na tɔtɔkisa enda á mɛyɔ ka Yéso Kiísito Mɔkɔta nɛsu.