Ɓalɔ́ma 4 - Ɔngana á Kɛ̌kɛ

Abalaámu ande nto á ɓeekea

¹ Cɔ, ɓɛyɔngande ka phɔa tatasu Abalaámu ɓo? Ekende ɗátɔí ka kokpa akɛ?

² Aoɓá Mokonga na ɗántangi Abalaámu nto á koɗoni ka nyɔngɔ ékuma nɛkɛ, ana kema nde aǒbeba kau. Nna gǎkɛ ɔtɔka n'ěbebi mosá á Mokonga.

³ Nga, Ɓuku á Mokonga ayɔngi ɓe: «Abalaámu ɗámɓeeki Mokonga. Ka nyɔngɔ á ɓeekea ndɔ unge Mokonga ɗántangi nto á koɗoni.»

⁴ Nkpa aɔbɛɗanaga ekuma, akeni n'ophendɔ nɛkɛ. Ophendɔ ndɔ nna á jǎi, ankeni ně.

⁵ Cɔ, a ndiu oɓá nkpa na kági ka kema na amɓeeki Mokonga mmbé áǒtanga ɓato á ɓojeɗe ka ɓato á koɗoni, ɓeekea nɛkɛ aunge ɓántangi kau nto á koɗoni.

⁶ A phɔtɔ ɓó unge Daúdi ayɔngi nyɔngɔ á maseye ka phɔa ɓakpa nde Mokonga aéangi ɓato á koɗoni kángá ɔnjia ekuma nɛɓɔ.

⁷ Ɗáyɔngi ɓe: «Maseye ka ɓunde Mokonga agbukúmi ɓɔjɔɔkiɔ nɛɓɔ na ímá á ɓojeɗe nɛɓɔ!

⁸ Maseye ka nkpa nde Mɔkɔta nna tanda ontangea ɓojeɗe nɛkɛ!»

⁹ Cɔ, maseye nde a tɔ ka ɓagu-ganja, nna phɔtɔ ka ɓawó ee? Ɓe ye yɔngi gea: «Mokonga ɗántangi Abalaámu nto á koɗoni ka nyɔngɔ á ɓeekea nɛkɛ.»

¹⁰ Ɗáɓántangi nto á ɗoni ka mbenɔ sina? Ka mbenɔ á gua akɛ ganja, ka mbenɔ á kowó akɛ? Nna ka mbenɔ á gua akɛ ganja, a ndiu ka kowó akɛ.

¹¹ Mbusa á wa, ɗáɓángusi ganja. Gúa akɛ ganja áoɓá mphangiɔ ka engekisa ɗoni nde Mokonga ɗántangi nto á koɗoni ka nyɔngɔ á ɓeekea nɛkɛ. Kaɓondɔ unge Abalaámu a ye aba ɓakpa ɓɔbu ɓunde ɓáɓeeki, nanga ɓákágú ganja, ka gea ɓétangɛ phɔtɔ ɓɔ, ɓato á koɗoni.

¹² Abalaámu a phɔtɔ aba ɓakpa nde ɓágú ganja. Nna tɔndɔ ɓakpa nde ɓá na epe á gua á ganja ka nyama aɓɔ, a ndiu ɓakpa nde ɓá na ɓeekea ɓíndɔ tatasu Abalaámu ɗátú ně mosá á gua akɛ ganja.

Mokonga aɔtɔtɔkisa mɔkɔ nɛkɛ ka ɓunde ɓámɓeeki

¹³ Cɔ, Mokonga ɗámɔku Abalaámu na ɓasuko akɛ gea aéɓophande mokonda. Mɔkɔ ndɔ nna gǎkɛ ka nyɔngɔ nde Abalaámu ɗáoamba ɛɔphi ndea Mósa. A ndiu ka nyɔngɔ nde Mokonga ɗántangi nto á koɗoni ka nyɔngɔ á ɓeekea nɛkɛ.

¹⁴ Aoɓá na ɓáɔtɔa kema nde ɗáɛɓɔku ka nyɔngɔ á amba ɛɔphi ndea Mósa, ande gea ɓeekea nna na kantíti, na mɔkɔ nde Mokonga aɔku a tɔ jǎi-jǎi.

¹⁵ Nga, ɛɔphi aobikisa ésúia ndea Mokonga. Atú gǎkɛ oɓá ɛɔphi na nna ɓei, ámbé nyɔngɔ á tingiaga í nna ɓei.

¹⁶ Kaɓondɔ, ɓɛtɔí gǎkɛ tɔ ɓotukɔ ndɔ ka nyɔngɔ á ɓeekea, ka gea te, mɔkɔ ndea Mokonga áɓɛ ka nyɔngɔ á ɓonjánja-ékondi nɛkɛ. Mpɔ, áoúbikana ɗoni gea, mɔkɔ ndɔ ande ka phɔa á ɓato á k'ɛɓɔkɔti bui ndea Abalaámu. Ande gea, nna tɔndɔ ka ɓunde ɓáoamba ɛɔphi, a ndiu phɔtɔ ka ɓunde ɓá na ɓeekea ɓea Abalaámu, mmbé ande tatasu ɓesu ɓɔbu.

¹⁷ Cɔ, a tɔ ɓíndɔ ɓáɗundu suɓi á Ɓuku á Mokonga gea: «Ɗékobisi aba ɛɓɔkɔti ásii.» Yɛ, ande abasu mosá á Mokonga ímbe amɓeeki. Mokonga ndɔ, ande mmbé aǒendisa ɓakpa nde ɓaku na sosea á kema nde káɓimbɛ mɔnɔ ɓei gea te áɓɛ ye tɔ ɓei.

¹⁸ Abaláamu ɗáɓeeki seɓea kema nde ɗákákeni ye seɓea í. Ka nyɔngɔ á ɓeekea ndɔ unge a ye tɔ «Aba ɛɓɔkɔti ásii.» Ɓindɔ ɗáɓáɗundu suɓi á Ɓuku á Mokonga gea: «Ɓende unge ɛɓɔkɔti nɛkɔ aɓikande.»

¹⁹ Abalaámu ɗátú na ɓasaga bíbí á mia moci (100), ɓeekea nɛkɛ ɗákádɔndɔɓɔki nanga ɓî ɗáokanisia ka phɔa nyama akɛ n'a ye bíbí á kukuwa na ka phɔa nkakɛ Sála ɓî ɗátú ngomba.

²⁰ Ka phɔa mɔkɔ ndea Mokonga, ɗáɓeeki kángá ngǎka. Ɓeekea nɛkɛ â ndiu oɓá na ɓukpɛkpɛ, áombeba Mokonga.

²¹ Ɗáúbi ɗoni gea, Mokonga ana ɓukpɛkpɛ á tɔtɔkisa phɔtɔ kema nde ɗáɔku.

²² Ka nyɔngɔ índɔ unge, Mokonga ɗántangi nto á koɗoni.

²³ Cɔ, nna tɔ ka phɔa Abalaámu sasakɛ aunge ɓáɗundu suɓi á Ɓuku á Mokonga gea: «Mokonga ɗántangi nto á koɗoni.»

²⁴ A ndiu phɔtɔ ka phɔasu íɓunde Mokonga asotangande ɓato á koɗoni, ɓesu íɓunde ɓemɓeeki Mokonga gea, ɗánjujúkisi Mɔkɔta nɛsu Yéso ka kukuwa sɔsɔɓɛ á ɓasí.

²⁵ Mmbé Mokonga ɗánkusisi ka nyɔngɔ á ɓojeɗe nɛsu â gǎkɛ onjujukisa ka kukuwa ka gea, ɓéɓɛ ɓato á koɗoni mosá á Mokonga.