Ɓalɔ́ma 3 - Ɔngana á Kɛ̌kɛ

¹ Cɔ, Moyúda anyɛ́nyi nkpa nde nna Moyúda ka kema sina? Gúa á ganja ana kantíti sina?

² Anyɛ́nyi ka kema ásii ɗanga-ɗanga. Ka nyɔngɔ nde Ɓayúda ɓáunge Mokonga ɗéɓophi phɔ́ nyɔngɔ nɛkɛ.

³ Eya, Ɓayúda ɓunɛngbo ɗáɓákáɓeeki nyɔngɔ á Mokonga! Ɓî a ɓó, ande gea te, ka nyɔngɔ índɔ aunge Mokonga aguande ka koɗoni nɛkɛ?

⁴ Tanda phɔ́! Ambe Mokonga áúbikanɛ gea, a tɔ ɔyɔnga ɗoni, ɓakpa ɓáunge ɓá ndiu ɔyɔnga mbɛa. A tɔ ɓíndɔ ɓáɗundu suɓi á Ɓuku á Mokonga gea: «Ambe óúbikanɛ gea, ɔ tɔ ɔyɔnga ɗoni. Mbenɔ nde ɓáɔkɔtɔnga, ka nyɔngɔ ájeɗe kaɓɛmbɛ gǔ akɔ.»

⁵ Cɔ, kaɓɛ ka nyɔngɔ á ɓojeɗe nde ɓeogea aunge Mokonga aúbikani gea ande nto á koɗoni, ɓɛyɔngande Mokonga nna nto á ɗoni ka nyɔngɔ nde aosótambisaga? (Nɛyɔngi wa yɔngɛa á kokpa.)

⁶ Tanda phɔ́! Atúoɓá Mokonga na nna nto á ɗoni atótenande nyɔngɔ ndea ɓato á ka mokonda?

⁷ Cɔ, a gǎkɛ oɓá ɗoni á Mokonga n'aɔnɛkana ka mbɛa nɛmɔ, na ɓáobeba ina akɛ, ɓá goto ɔtɔka tena nyɔngɔ nɛmɔ akpɛ gea nende nto á ɓojeɗe ka ɓo?

⁸ Aoɓá ɓó, ɓɛ́yɔngɛni pɛ: «Ɓégeɛni kema ájeɗe ka gea kema ánjá átɔtɔkɛanɛ?» Eya ana ɓakpa nde ɓáɔyɔnga mbɛa ka phɔasu gea, ɓesu ɓáunge ɓɛɔyɔnga ɓó. Ɓakpa ndɔ ɓákenande na tena á nyɔngɔ nɛɓɔ akpɛ!

Nna na nkpa nde ande nto á koɗoni mosá á Mokonga

⁹ Cɔ, ɓɛ́yɔngɛni ɓoni? Ɓesu Ɓayúda ɓɛɛ́nyɛ́nyi ɓakpa ɓunɛngbo? Tanda phɔ́! Ɓe ye phangi base gea Ɓayúda na ɓunde ɓáná Ɓayúda, ɓesu ɓɔbu ɓe tɔ kusi á kɔkɔta á ɓojeɗe.

¹⁰ A tɔ ɓíndɔ ɗáɓáɗundu suɓi á Ɓuku á Mokonga gea: «Nna tanda na nkpa moci mmbé ande nto á koɗoni.

¹¹ Nna na nkpa nde aoengekisa, nna na mmbé aonkaɓa Mokonga.

¹² Ɓɔbu ɓáɓúngigi, ɓɔbu ɓájɔɔkani kimoci. Nna tanda na ka nkpa moci mmbé aogea ánjá.

¹³ Kema nde aotóka k'aphenɔkɔ aɓɔ aokusisa, eɗáka aɓɔ aǒenga ka dema á ɓakpa, ɛsɔ aɓɔ ana cengu ɓínde á njɔka.

¹⁴ Aphenɔkɔ aɓɔ atúmi na nyɔngɔ á sɛmɛaga na nyɔngɔ á kae-kae.

¹⁵ Ecinji aɓɔ aáphǒ ka ɗuka á magia.

¹⁶ Ɓáotúkatúka na ɗeketa á tambaga k'ɔ́ma bui nde ɓáɔnyɛ́nya.

¹⁷ Ɗáɓákáoúba aphe á ɓujɛjɛ.

¹⁸ Ɓáoenda kángá tanda kɔɓɔɓɔkɔ á Mokonga.»

¹⁹ Cɔ, ɓeoúba gea, nyɔngɔ bubui nde ɛɔphi ayɔngi a tɔ ka phɔa ɓakpa nde ɓá kusi á ɛɔphi. Ka gea te, nkpa buakɛ ádakanɛ, na úba gea, ɓato á ka mokonda ɓɔbu ɓánde ɓato á ɓojeɗe mosá á Mokonga.

²⁰ Ka nyɔngɔ índɔ unge, nna na nkpa nde ɓántangande nto á koɗoni mosá á Mokonga ka nyɔngɔ á amba ɛɔphi. Ɛɔphi a tɔ omphangia nkpa gea, agi ɓojeɗe.

Mokonga aámbé aǒamisa ɓakpa ka měma ka nyɔngɔ á ɓeekea

²¹ Cɔ, kɛ̌kɛnde, Mokonga ɗásɔɔnisi aphe sina nde áontanga nkpa nto á koɗoni mosá akɛ. Aphe ndɔ, nna gǎkɛ oɓea nyɔngɔ á ɛɔphi. Nga, ɗáɓáengekisi suɓi á ɓuku ɛ́ɔphi na ɓuku á ɓaɔtu-nyɔngɔ ndea Mokonga ɓe:

²² Ɓakpa ɓɔbu ɓunde ɓámɓeeki Yéso Kiísito ɓáunge Mokonga aǒtanga ɓato á koɗoni mosá akɛ kángá oɓayɔ.

²³ Nga, ɓakpa ɓɔbu ɓági tɔ ɓojeɗe, ɓáoúka ɓoombia ndea Mokonga.

²⁴ Cɔ, ka nyɔngɔ á ɓonjánja-ékondi ndea Mokonga, Mokonga aétangi ɓato á koɗoni kángá ophendɔ ka nyɔngɔ nde Yéso Kiísito aámbé aékoɗigi.

²⁵ Nga, Mokonga ɗámbisi Yéso ka nyama á phɛ́a ka nyɔngɔ á íma á ɓojeɗe nde ɓakpa ɗáɓági mosá. Ka ɓakpa nde ɓáɓeeki, magia á phɛ́a ndɔ aphangisi gea Mokonga ande nto á koɗoni ka nyɔngɔ nde aími ɓojeɗe nde ɓakpa ɗáɓági.

²⁶ Ka nyɔngɔ á ngomi nde Mokonga aně, yɛ ɗákondi phangia koɗoni nɛkɛ ka matú ndee. Ka gea akɛ ɓó, aunge áontanga nto á koɗoni nkpa buakɛ mmbé amɓeeki Yéso.

²⁷ Cɔ, ɓena kema nde ɓeǒbeba ně? Tanda phɔ́. Ka ɓo? Ka nyɔngɔ nde kema nde ana kantíti nna ɛɔphi, a ndiu ɓeekea.

²⁸ Nga, ɓɛɔni gea, Mokonga a tɔ ontanga nkpa, nto á koɗoni ka nyɔngɔ á ɓeekea. Nna ka nyɔngɔ á amba ɛɔphi.

²⁹ Ande gea te, Mokonga a tɔ Mokonga ndea Ɓayúda? Nna phɔtɔ Mokonga ndea ɓunde ɓáná Ɓayúda? Eya! A phɔtɔ Mokonga ndea ɓunde ɓáná Ɓayúda

³⁰ nga, Mokonga a tɔ mo. Yɛ tɔ aámbé aétangande Ɓayúda na ɓunde ɓáná Ɓayúda ɓato á koɗoni ka ɓeana na ɓeekea á nkpa na nkpa.

³¹ Ande gea, ɓɛɔɓɛnjiaga ɛɔphi ka nyɔngɔ á ɓeekea ndɔ? Tanda phɔ́! Ɓe ndiu otétemisa ɛɔphi.