Ɓalɔ́ma 2 - Ɔngana á Kɛ̌kɛ

Mokonga aotena nyɔngɔ á ɓakpa kángá egami

¹ Cɔ, oɓɛ ímbe ootena nyɔngɔ á ɓakpa ɓunɛngbo akpɛ, nanga oɓá ani, ɓákáúkɛku phɔtɔ tena á nyɔngɔ ínɛkɔ akpɛ nga, ootena nyɔngɔ ndea ɓadakɔ akpɛ n'ɔ phɔtɔ otambea ɓea ɓɔ. Kaɓondɔ, o tɔ otena nyɔngɔ nɛkɔ akpɛ oɓɛ sasakɔ.

² Cɔ, ɓeoúba gea, Mokonga aoɓea ɗoni mbenɔ nde aotena nyɔngɔ á ɓakpa nde ɓáogea kema ɓíndɔ.

³ Cɔ, oɓɛ ímbe ootena nyɔngɔ ndea ɓadakɔ akpɛ, n'ɔɓɛ sasakɔ otoogea kema nde ɓɔ ɓáogea. Ooúba te oɓɛ aámbé oólokande ka tena nyɔngɔ ndea Mokonga?

⁴ Goto, oɓɛ ɔɔmɓɛnjiaga Mokonga ímbe aanjánjá phɛɛ, mmbé ana měma aphɔngɔ na měma á phiphia. Kóoúba gea, ngomi ndea Mokonga aokotútuisa ka kětia á tambea akɔ ájeɗe?

⁵ Cɔ, oɓɛ ona měma akpɛ na kóokonda kětia á měma akɔ. Kaɓondɔ unge ǒbisíí tambaga ángbó esa nde Mokonga aphangiaeka esúia nɛkɛ na tena á nyɔngɔ nɛkɛ ka koɗoni.

⁶ Nga, Mokonga amphendaeka nkpa buakɛ ɓíndɔ akeni ka bɛɗanaga nde abɛɗanagi.

⁷ Mokonga aeɓophande enda á mɛyɔ, ɓakpa nde ɓásui bɛɗaneaga akɛ na kaɓa obebɔ, ɓokutú na kema nde nna na sungiaga.

⁸ Aphangiande gǎkɛ ɓɛí na esúia nɛkɛ ka ɓakpa nde ɓánde ɓaɓiɓia akɛ na ɓunde ɓáoyá ɗoni na ɓeá á ɓojeɗe.

⁹ Nkpa buakɛ mmbé aogea ɓojeɗe, atambagande na ea á minyɔ. Tambaga ndɔ akpangande phɔ́ ka Ɓayúda, mpɔ áoɓá ka ɓunde ɓáná Ɓayúda.

¹⁰ Nkpa buakɛ mmbé a gǎkɛ ogea ánjá, aɓande na ɓokutú, ɓujɛjɛ na ɓoombia. Akpangande phɔ́ ka Ɓayúda, mpɔ áoɓá ka ɓunde ɓáná Ɓayúda.

¹¹ Nga, Mokonga nna n'oɓayɔ ka tena á nyɔngɔ.

¹² Kaɓondɔ, ɓakpa ɓɔbu ɓunde ɓáogea ɓojeɗe kángá á úba ɛɔphi ndea Mósa, ɓáetúkatúkande ɓɔ na ɓátenande nyɔngɔ nɛɓɔ kángá ɛɔphi ndea Mósa. Ɓunde ɓá gǎkɛ ogea ɓojeɗe na ɓáoúba ɛɔphi ndea Mósa, ɓátenande nyɔngɔ nɛɓɔ n'ɛɔphi ndɔɔ.

¹³ Cɔ, nna gǎkɛ ɓakpa nde ɓá tɔ ɔɔ́ka ɛɔphi ɓáunge Mokonga aǒtanga ɓato á koɗoni. A ndiu ɓakpa nde ɓáotambea ɓíndɔ ɛɔphi asosi.

¹⁴ Ɓî ɓakpa nde ɓáná Ɓayúda měma aɓɔ aǒteka ka tɔtɔkisa á kema nde ɛɔphi asosi nanga ɓánáoúba ɛɔphi ndea Mósa, ɓɔ, ɓána ɛɔphi ndɔ suɓi aɓɔ, nanga ɓáká ně.

¹⁵ Kaɓondɔ ɓáophangia gea, kema nde ɓáɗundu suɓi ɛ́ɔphi aɔbɛɗanaga ka měma aɓɔ. Ianaga á ka měma aɓɔ aoɗigimisa nyɔngɔ ndɔ na kanisiaɓɔ a phɔtɔ ɔ̌tɔnga gea, mbenɔ nɛngbo ɓági ánjá, mbenɔ nɛngbo ɓági ájeɗe.

¹⁶ Ɓondɔ unge aɓande esa nde Mokonga atenande akpɛ nyɔngɔ á ɓɔsɔmɛa ndea ɓakpa k'aphe ndea Yéso Kiísito. A tɔ ɓíndɔ Mbino-Ánjá nde nɛɔtɔmiaga ayɔngi.

Ɓayúda ɓátingíígi ɛɔphi ndea Mósa

¹⁷ Cɔ, oɓɛ ímbe ogi te, onde Moyúda, oseɓei ɛɔphi ndea Mósa, na ébeba na Mokonga.

¹⁸ Ooúba mɔphɛ ndea Mokonga. Ɛɔphi a phɔtɔ okogoisaga ka sɔmbɔa á kema nde aánjá.

¹⁹ Oɓeeki ɗoni gea onde nsɔndɔi á ɓakeíme-íme, na owanga ka ɓunde ɓá suɓi á kaiphiɔ.

²⁰ Onde phɔtɔ ngoisigi á ɓabóbó na ngoisigi á ɓaniki nga, ooúba ɗoni gea, ɛɔphi aokophangia aphe á úbapha phɛɛ na koɗoni.

²¹ Cɔ, oɓɛ ngoisigi á ɓakpa ɓunɛngbo, kó ǒgoisaga sasakɔ ee? Ɔɔphɛa ɓakpa ɓunɛngbo gea, ɓákáúɓɛmbɛ n'ɔɓɛ o goto oúɓa!

²² Ɔɔyɔnga gea ɓakpa ɓákátunganɛmbɛ, n'o gǎkɛ otungana! Oɓɛ okangei iii á ɓamokonga á mbɛa, n'o gǎkɛ oúɓa nkumba á k'éndu nɛɓɔ.

²³ Oɓɛ ímbe ǒbeba na úba ɛɔphi ndea Mósa, ɔɔnjɔɔkisa Mokonga ka tingiaga ɛɔphi!

²⁴ Nga, a ɓíndɔ ɓáɗundu suɓi á Ɓuku á Mokonga gea: «Ka nyɔngɔ anu Ɓayúda aunge ɓakpa nde ɓáná Ɓayúda ɓáobóma ina á Mokonga.»

²⁵ Eya, gúa á ganja a tɔ na kantíti aoɓá n'oamba ɛɔphi. A gǎkɛ oɓá n'ootingiaga ɛɔphi, nanga ógua ganja, gúa á ganja nɛkɔ a tɔ kowó.

²⁶ Cɔ, aoɓá mowó n'aoamba ɛɔphi ndea Mósa, Mokonga kántangɛku tɔ ɓea ngu-ganja?

²⁷ Nkpa nde kágú ganja á ka nyama, n'aoamba ɛɔphi ndea Mósa, atenande nyɔngɔ nɛkɔ akpɛ oɓɛ ímɓɔ ootingiaga ɛɔphi n'ona Ɓuku á Mokonga n'onde ngu-ganja.

²⁸ Cɔ, Moyúda á ɗoni nna tɔ mmbé áoúbikana ka keongi na mmbé agú tɔ ganja á ka nyama.

²⁹ Moyúda á ɗoni a ndiu mmbé a ye úbikani suɓi akɛ na gúa á ganja suɓi á měma akɛ. Gúa á ganja ndɔ, áɔtɔtɔkɛana ka ɓukpɛkpɛ á Měma á Mokonga, nna ka nyɔngɔ ɛ́ɔphi ndea Mósa. Moyúda á ɗoni ndɔ, nna ɓakpa ɓáunge ɓáombeba, Mokonga aámbé a ndiu ombeba.