Ɓalɔ́ma 16 - Ɔngana á Kɛ̌kɛ

Pɔlɔ́ aǒsambea ɓakpa ɗanga-ɗanga

¹ Nenteki kanu nsae nɛsu Phɔíbɛ, mbɛɗanigi anjánjá ka kanisa á ka Kɛnkulɛ́a.

² Nseseani yɛ ɓíndɔ ɓakiísito ɓámôogeaga k'ína á Mɔkɔta. Néngani ka kema bui nde ana siki í nga, yɛ ɗééngi ɓakpa ɓásii n'eme phɔtɔ.

³ Nensambei Pisíla na Akíla, ɓadani ɓabɛɗanigi ndea Yéso.

⁴ Ɓɔ, ɗáɓáóloki ka kukuwa ka nyɔngɔ á amisa ani. Eme na kanisa bui nde nna á Ɓayúda, ɓeésegi ɓɔ.

⁵ Něsambei phɔtɔ ɓato á ka kanisa ɓunde ɓáodondanaga k'éndu mɔtɛ-aɓɔ. Nensambei dani ékondi Ɛpɛnɛ́tɔ, mmbé ɗátú mɓêki á k'ama mosá-mosá ndea Kiísito ka Asía.

⁶ Nensambei Malía mmbé ɗátambigi phɛɛ ka nyɔngɔ anu.

⁷ Něsambei ɓatia-abɛ na ɓadani Andɔɔníkɔ na Yunía ɓunde ɗétú na ɓɔ suɓi á mekakɔ. Ɓɔ, ɓána ɓoombia phɛɛ sɔsɔɓɛ á ɓateki, ɓɔ, ɗáɓámɓeeki Kiísito mosá ani.

⁸ Nensambei Ampuliátɔ dani ékondi suɓi á Mɔkɔta.

⁹ Nensambei Uubánɔ dani mbɛɗanigi suɓi á Kiísito na dani ékondi Stákisi.

¹⁰ Nensambei Apɛ́lɛ mmbé aúbisi base ɓeekea nɛkɛ ka Kiísito. Něsambei ɓato á k'éndu ndea Aiistobúlo.

¹¹ Nensambei Ɛlɔdíɔni nto á k'ékombo nɛmɔ. Něsambei ɓato á k'éndu á Naakíso ɓundɔ ɓaɓêki ndea Mɔkɔta.

¹² Něsambei Tiíphɛna na Tiíphosa ɓunde ɓána moíngí ka nyɔngɔ á Mɔkɔta. Nensambei dani ékondi Pɛɛ́si mmbé aǒtambisaga phɛɛ ka nyɔngɔ á Mɔkɔta.

¹³ Nensambei Úphu, mmbé Mɔkɔta ɗánsɔmbu, amakɛ a phɔtɔ ayí.

¹⁴ Něsambei Asinkiíto, Phulɛgɔ́ni, Hɛɛ́me, Patɔɔ́ba, Hɛɛ́ma na ɓadani ɓunde ɓáiki na ɓɔ.

¹⁵ Něsambei Philɔlɔ́gɔ na Yulía, Nelɛ́a na áwákɛ, Olímpa na ɓaɓêki ndea Mokonga ɓɔbu ɓunde ɓáiki na ɓɔ.

¹⁶ Seseanani ama kombeanaga ɓea ɓakiísito. Ɓato á kanisa bui ndea Kiísito ɓanosambei.

Ɓɔphɛi á ka sungiaga ndea Pɔ́lɔ

¹⁷ Kaɗenge-ɗenge ɓaya! Óengani na ɓunde ɓáosoea katanaga á ɓakiísito na ɓúngaga ka nyɔngɔ á ɓɛnjiaga ɓɔphɛi nde ɓotɔ́ɔ́ki. Ikani ɗanga na ɓɔ.

¹⁸ Nga, ɓakpa ɓea ɓundɔ, ɓánáombɛɗaneaga Mɔkɔta nɛsu Kiísito, ɓá ndiu tɔ ɔbɛɗaneaga sɔphɔ aɓɔ! Goto, ɓáǒdema ɓakpa jǎi-jǎi ka ɓɔnga aɓɔ na yɔnga ékondisaga nde ɓáɔɓɔngisiaga.

¹⁹ Ɓakpa ɓɔbu ɓáoúba gea ɓɔɔmɔ́ka Mokonga. Nena maseye ka nyɔngɔ anu. Mɔphɛ ani gǎkɛ ande gea te, ɓóɓɛ ɓamɔɔngɛ ka gea ánjá na yá á ɓojeɗe.

²⁰ Mokonga mɛna-ɓujɛjɛ ankpɔtande Sɛtáni kɛ̌kɛnde kusi á ecinji anu. Ambe ɓonjánja-ékondi ndea Mɔkɔta Yéso Kiísito áɓɛ kimoci na ɓenu!

²¹ Dani mbɛɗanigi Timɔtɛ́ɔ anósesi, ɓaɓɔkɔtiamɔ: Lukíɔ, Yasɔ́ni na Sɔsipatɔ́ɔ ɓanosambei phɔtɔ.

²² Eme Tɛtíɔ, nɗundu á ɓaoɓa nde, nenósambei k'ína á Mɔkɔta.

²³ Gáyɔ, mmbé ne mɔtɛ-akɛ ɔma nde madondanɔ á koni bui amɔnɔ ongiaga anósesi. Ɛlástɔ, nambigi imɔna á ka nji na muna-amasu Kwáatɔ ɓanósambei. [

²⁴ Ɓonjánja-ékondi ndea Mɔkɔta nesu Yéso Kiísito áɓɛ ka ɓenu ɓɔbu! Áɓɛ ɓó.]

Obebɔ ka Mokonga

²⁵ Ɓémbebɛni Mokonga! Yɛ, ana ɓukpɛkpɛ á opha anu nténdé suɓi á ɓeekea, ka ɓeana na Mbino-Ánjá nde nɛɔtɔmiaga k'ína á Yéso Kiísito, nndɔ ungɔ aojuanisa base nyɔngɔ á ɓɔsɔmɛa á kala.

²⁶ Kɛ̌kɛnde gǎkɛ, ɓákiɗianisi nyɔngɔ á ɓɔsɔmɛa bui base, ka ɓeana na moangɔ ndea Mokonga Mɛyɔ, ɓíndɔ ɓáɗundu suɓi á ɓuku á ɓaɔtu-nyɔngɔ ndea Mokonga, áǒteka gea, ɓátɔ̌miɛgɛ ú ka ɓato ékuna bui, ka gea ɓáɓeekeɛ ú, na ɓámɔ́kɛ.

²⁷ Ɓémbebɛni Mokonga, Yɛ tɔndɔ aámbé ande mɔɔngɛ! Áɓɛ n'obebɔ ka Yéso Kiísito ka saga na saga! Áɓɛ ɓó!