Ɓalɔ́ma 15 - Ɔngana á Kɛ̌kɛ

Ɓéɓɛni n'ekondi ka ɓakpa ɓunɛngbo nna tɔndɔ ka ɓesu sasasu

¹ Ambe ɓesu íɓunde ɓɛmɔti ka ɓeekea, ɓékumbɛni ɓoɗoko á ɓunde ɓákámɔtimbɛ ka ɓeekea. Kákeni ɓékaɓɛ nnde asɔɓɔngɛi.

² Ambe nkpa na nkpa ka ɓesu ágeɛ ánjá ka dakɛ n'índe amɓɔgɛande ka gea, ɓeekea nɛkɛ ámɔtɛ.

³ Nga, Kiísito ɗákákaɓi kema nde ɗáɔmɓɔngɛa sasakɛ. Ɓíndɔ Ɓuku á Mokonga ayɔngi gǎkɛ: «Yɔnga bui á mbóma nde ɓáɔyɔnga ka phɔakɔ amogui.»

⁴ Nyɔngɔ bui nde ɗáɓáɗundu kala suɓi á ɓuku ndea Mokonga, ɗáɓáɗundu ú ka phɛá asu ně, ka opha asu nténdé na měma á phiphia ka gea, ɓéɓɛ na nseɓeɔ ɓíndɔ ɓáosogoisaga suɓi á Ɓuku á Mokonga.

⁵ Ambe Mokonga mmbé aosóphiphisa měma na kpagisaga asu ásɔɔnganisɛ ánjá ɓíndɔ Yéso akondi.

⁶ Cɔ, ɓenu ɓɔbu na měma mo, n'ɛsɔ mo, ɓombebande Mokonga Abakɛ na Mɔkɔta nɛsu Yéso Kiísito.

Mbino-Ánjá a ka nkpa buakɛ

⁷ Cɔ, seseanani na maseye ɓíndɔ Kiísito ɗánósesi phɔtɔ ka gea Mokonga áɓɛ n'obebɔ.

⁸ Nenóngoɗi gea Kiísito ɗěbisi ka bɛɗaneaga Ɓayúda ka úbisa base gea, Mokonga ande nto á ɗoni na átɔtɔkisɛ mɔkɔ nɛkɛ ka ɓatataɓɔ,

⁹ ɓunde ɓáná Ɓayúda ɓáombeba Mokonga ka nyɔngɔ á ngomi nɛkɛ ɓíndɔ ɓáɗundu suɓi á ɓuku ndea Mokonga gea: «Kaɓondɔ unge nekobebande sɔsɔɓɛ á ɓakpa ɓɔbu na neémbande ka ɗokomisa ina akɔ.»

¹⁰ Ɓuku á Mokonga agi goto: «Ɓenu íɓunde ɓókó Ɓayúda ɓáni na maseye kimoci na ɓunde Mokonga ɗésombu.»

¹¹ Goto: «Mbebani Mɔkɔta ɓenu ɓɔbu íɓunde ɓókó Ɓayúda! Ɓakpa ɓɔbu ɓámbebɛ yɛ.»

¹² Isáya ayɔngi phɔtɔ gea: «Ka ɓato á k'ékombo ndea Yɛ́sɛ akiɗianande na motumbɔ á kɔkɔta gǔ á ɓunde ɓáná Ɓayúda. Ɓɔ, ɓábisande nseɓeɔ nɛɓɔ ka yɛ.»

¹³ Ambe Mokonga mɛna-nseɓeɔ ánotúmisɛ na maseye na ɓujɛjɛ phɛɛ suɓi á ɓeekea ka gea ɓótúmɛ na nseɓeɔ ka ɓukpɛkpɛ ndea Měma á kanga ɓojeɗe.

Ekuma ndea Pɔ́lɔ

¹⁴ Ɓaya, eme ne engekisi ka phɔanu gea ɓenu sasanu ɓotúmi na mɔphɛ ánjá na úbapha ásii na ɓɔtɔki phɛana ngǔngu anu.

¹⁵ Ɗénóɗundui ɓaoɓa nde na ɓukpɛkpɛ ka kanisianu nyɔngɔ nde ɓo ye úbi ú. Ɗégi ú ka ɓonjánja-ékondi nde Mokonga ɗámopi,

¹⁶ ka ɓá mbɛɗanigi ndea Yéso Kiísito ka phɔa ɓakpa ɓunde ɓáná Ɓayúda. Nɛɔbɛɗanaga ekuma á ntoɓeigi-phɛ́a ka tɔ̌miaga Mbino-Ánjá ndea Mokonga ka gea, ɓunde ɓáná Ɓayúda ɓáɓɛ ɓea ɛkɔmi nde Měma á kanga ɓojeɗe asokosei.

¹⁷ Mpɔ ye tɔ nɛɔtɔka na něbebi ka jukana na Yéso Kiísito ka nyɔngɔ á ekuma ndea Mokonga.

¹⁸ Aoɓá na neogea nɛ́yɔngɛ ká kema, nɛyɔnga tɔ nnde Kiísito ɗátɔtɔkisi k'ékuma nɛmɔ ka yɔnga na ka tambea ani ka ɓotea ɓunde ɓáná Ɓayúda ka gea ɓámɓángɛ Mokonga.

¹⁹ Nga, mphangiɔ na ketangaɔ ɗanga-ɗanga nde ɗátɔtɔkisi ka njaga ani, ɗáphangi ɓukpɛkpɛ ndea Měma á Mokonga. Na ɓukpɛkpɛ ndɔ tɔ, ɗénetɔ̌migi Mbino-Ánjá ndea Kiísito ɔma bui kpanga ka Yɛusalɛ́ma súa ntanga-nji á ka Ililíkɔ.

²⁰ Mɔphɛ ani ɗátú tɔ ka tɔ̌miaga Mbino-Ánjá ɔma nde ɓákáɔ́kimbɛmɔnɔ nyɔngɔ á Kiísito. Ka gea te, kɛphɛ̌kɛmbɛ ɔma nde nkpa ɓaangbo ɗákpangi phɛ̌ka.

²¹ Ɓondɔ unge ɗénetɔtɔkisi ɓíndɔ Ɓuku á Mokonga agi gea: «Ɓunde ɗáɓákáetɔ̌mimbɛ ɓáɔnande ú, ɓunde gǎkɛ ɗáɓákaɔ́kimbɛ ú ɓáengekisande.»

Pɔ́lɔ akáɓɔngisiaga tamba á gǎ na Lɔ́ma

²² Nndɔ ungɔ ɗáomoimisia mɔngɔ ásii ka gǎ mɔtɛ-anu.

²³ Cɔ, kɛ̌kɛnde nɛgɔɓi ye ekuma nɛmɔ ka nji ndɔ na ka nyɔngɔ índɔ unge mɔphɛ ani suɓi á ɓasaga ásii amɔ̂ á gǎ mɔtɛ-anu.

²⁴ Mbenɔ nde negande na Spanía, neseɓei gea nɛnɔɔnande ka nyɛ́nyani na ɓomotaɓeande ka tamba ndɔɔ. Neɓande na maseye á ika na ɓenu ka mbenɔ ábɔa.

²⁵ Kɛ̌kɛnde gǎkɛ nege na Yɛusalɛ́ma ka bɛɗaneaga ɓaɓêki.

²⁶ Kanisa á ka Makɛdɔnía na nnde á ka Akáya ɗáɓáɔni ánjá ɓákɔngɔɛ imɔna ka taɓea ɓaɓêki á ka Yɛusalɛ́ma ɓunde ɗáɓátú ka ɓuyɛnɛ.

²⁷ Ɓáosuia enga aɓɔ nga, ɗákeni na ɓó ka enga aɓɔ. Nga, Ɓayúda ɓaɓêki ɗáɓágabi ka ɓunde ɓáná Ɓayúda kema ánjá á enga ɓɔ ka měma. Atókeni ɓunde ɓáná Ɓayúda ɓágabɛ phɔtɔ ka Ɓayúda nkumba nde ɓá na siki í.

²⁸ Mbenɔ nde nɛgɔɓande ekuma nde, na jisa á kema nde ɓátókɔngu ka phɔanu, nɛnyɛ́nyɛande mɔtɛ-anu ka gǎ ani na Spanía.

²⁹ Na neoúba gea ɓî negande mɔtɛ-anu, nebikande Kiísito n'amobisíí njaga phɛɛ.

³⁰ Ɓaya, nenóɗengemisigi k'ína á Mɔkɔta nɛsu Yéso Kiísito na k'ékondi nde Měma á Mokonga aobikisa, ɓéjúkanɛni ka mɛma á Mokonga na moíngi ka phɔani.

³¹ Ɛmɛmi ndɔ ande ka gea ɓunde ɓákámɓeeki Yéso ka Yudɛ́a ɓákámogeɛmbɛ ájeɗe na nnde nebiki ně ka enga ɓɔ ka Yɛusalɛ́ma, ɓato á kanga ɓojeɗe ɓáɓeekeɛ ú.

³² Kaɓondɔ, nekiɗiande mɔtɛ-anu na netúmi na maseye, ka mɔphɛ ndea Mokonga na úmbia kimoci na ɓenu.

³³ Ambe Mokonga mɛna-ɓujɛjɛ áɓɛ kimoci na ɓɛnu ɓɔbu. Áɓɛ ɓó!