Ɓalɔ́ma 14 - Ɔngana á Kɛ̌kɛ

Kótenɛmbɛ nyɔngɔ ndea dakɔ

¹ Nseseani mmbé kámɔtimbɛ ka ɓeekea, kángá á ianaga kanisia akɛ.

² Nkpa nde amɔti ka ɓeekea, aɔtɔka n'aí kema bui, mmbé kámɔtimbɛ ka ɓeekea a gǎkɛ tɔ oeaga nɛkɛ mbuti.

³ Mmbé aoea kema bui, kamɓɛnjiɛgɛmbɛ mmbé nnaoea kema bui. Mmbé nnaoea kema bui, kátenɛmbɛ nyɔngɔ á nkpa nde aoea kema bui nga, Mokonga amɓeeki.

⁴ Oɓɛ, onde ani ka tena á nyɔngɔ ndea mbɛɗanigi ndea nkpa ɓaangbo? Átetemisa ekuma nɛkɛ, kátetemisi, nndɔ a tɔ ɔnɛnjia mɔkɔta á ekuma nɛkɛ. Atetemisande ekuma nga, Mɔkɔta ana ɓukpɛkpɛ á sukia akɛ.

⁵ Ɓakpa moci-moci ɓáokanisia gea, ana esa nde anyɛ́nyi esa nɛngbo ka kantíti, ɓuangbo gǎkɛ a tɔ kimoci. Ambe nkpa na nkpa áengekisɛ ánjá nkanisiɔ nɛkɛ.

⁶ Mmbé atinganisi esa, atinganisi ú ka ɗokomisa á Mɔkɔta. Mmbé aoea kema bui, aoea ú ka ɗokomisa á Mɔkɔta nga, ambebi Mokonga k'éea nɛkɛ. Mmbé nnaoea eea bui, a phɔtɔ ogea ɓó ka ɗokomisa á Mɔkɔta na beba á Mokonga.

⁷ Nna na nkpa sɔsɔɓɛ asu mmbé aoenda ka yɛ sasakɛ, Nna na nkpa sɔsɔɓɛ asu mmbé aokuwa ka yɛ sasakɛ.

⁸ Nga, aoɓá na ɓeoenda, ɓeoenda ka Mɔkɔta, kaɓɛ na ɓéokuwa, ɓéokuwa ka Mɔkɔta. Kaɓɛ ɓékuwa, ɓéenda, ɓende ɓakpa ndea Mɔkɔta.

⁹ Ka nyɔngɔ índɔ unge, Kiísito ɗáku na enda goto ka gea, áɓɛ Mɔkɔta á ɓasí na ɓunde ɓáoenda.

¹⁰ Oɓɛ gǎkɛ ka nyɔngɔ sina nde ootena nyɔngɔ ndea muna-amakɔ? Oɓɛ ɔɔmɓɛnjiaga muna-amakɔ ka ɓo? Nga, ɓesu ɓɔbu ɓemamande mosá á ntua á tena á nyɔngɔ ndea Mokonga.

¹¹ Ka nyɔngɔ nde ɓáɗundu suɓi á Ɓuku á Mokonga gea: «Eme Mɔkɔta mmbé neoenda nɛyɔngi gea, nkpa na nkpa agbukande muanku akɛ mosá ani na ɓɔbu ɓámbebande Mokonga.»

¹² Kaɓondɔ, nkpa na nkpa sɔsɔɓɛ asu aɛ́yɔngɛande sasakɛ mosá á Mokonga.

Kɔmɓɛtɛkisɛmbɛ dakɔ n'ephiphi ájeɗe

¹³ Ɓéɗeketɛni teneanaga á nyɔngɔ ɓesu ka ɓesu. Ɓeekeanani ndiu ka gea, kɔmɓɛtɛkisɛmbɛ muna-amakɔ n'ephiphi ájeɗe kaɓɛ ngisisa akɛ ka ɓojeɗe.

¹⁴ Ka ɔngana ani na Mɔkɔta Yéso, neúbi na ne engekisi ánjá gea nna na kema nde ajɔɔkani. Ajɔɔkani ndiu ka nkpa nde aɔni gea ande á jɔɔkana.

¹⁵ Aoɓá n'omɓɛisi dakɔ ka nyɔngɔ á eea nde ooea, o ye tɔ otambea kángá ekondi. Nna ka nyɔngɔ á eea unge ɔɔtɔka n'omɓúngisi nkpa nde Yéso ɗánkui.

¹⁶ Cɔ, kema nde aánjá ka ɓenu, kaɓɛmbɛ ye aphe ka ɓakpa ɓunɛngbo yɔnga ájeɗe ka phɔanu.

¹⁷ Nga, koɓoamɛ ndea Mokonga nna ka nyɔngɔ á kema á koea na kema á konoa. A ndiu á koɗoni, ɓujɛjɛ na maseye nde Měma á kanga ɓojeɗe aobikisa.

¹⁸ Mmbé aɔmbɛɗaneaga Kiísito ɓó, amɓɔngɛi Mokonga na ɓakpa ɓáomɓeekea.

¹⁹ Ɓékaɓɛni kema nde aobisa ɓujɛjɛ na káɓa á kema nde áɔphɛka ɓeekea á ɓakpa.

²⁰ Kóujɛmbɛ ekuma ndea Mokonga ka nyɔngɔ á eea. Ɗoni, eea bui nna n'otaɔ a ndiu ájeɗe ea eea nde aongisisa nkpa ka gea ɓojeɗe.

²¹ Kema nde aánjá ande gina á nyama, makana na kema bui nde aɔtɔka n'angisisi muna-amakɔ ka ɓojeɗe.

²² Ámbá kakɔ mosá á Mokonga nnde oɓeeki sasakɔ ka nyɔngɔ ndee. Maseye ka mmbé nnaɔɔna ɓojeɗe k'índe asɔmbu.

²³ Mmbé gǎkɛ aoeaga n'ana ngǎka, Mokonga atenande nyɔngɔ nɛkɛ akpɛ ka nyɔngɔ nde, tambea akɛ nnaɔɔnisa mɔphɛ á ɓeekea na nndɔ bui ande ɓojeɗe.