Ɓalɔ́ma 13 - Ɔngana á Kɛ̌kɛ

Ambe nkpa na nkpa ɛ́ɓɔ́kɛ ɓakɔta á nji

¹ Ambe nkpa na nkpa ɛ́ɓɔ́kɛ ɓunde ɓá na kɔkɔta gǔ asu. Nga, kɔkɔta bui a tɔ otóka ka Mokonga na yɛ aámbé ɗémamisi ɓunde ɓámamei nji.

² Cɔ, mmbé nnaokonda ika kusi á kɔkɔta á ɓakɔta á nji, ayé moangɔ nde Mokonga akondi. Ɓunde ɓáoyá ɔ́ka á ɓakɔta, ɓáoɓotea gǔ aɓɔ sasaɓɔ tena á nyɔngɔ akpɛ.

³ Nga, ɓunde ɓáogea ánjá ɓánáɔtɔka na ɓ'eɓángi ɓateni-nyɔngɔ, tɔndɔ ɓunde ɓá ndiu ogea ɓojeɗe. Kóokonda ɓánga á mɔkɔta á nji? Cɔ, gea ánjá na akobebande.

⁴ Ka nyɔngɔ nde, yɛ aɔmbɛɗaneaga Mokonga ka phɔa akɔ. A gǎkɛ oɓá n'ogi ɓojeɗe, ómɓánga nde nga, ana ɓukpɛkpɛ á tambisaga á nkpa, nna gǎkɛ ogea nndɔ jǎi. Mbenɔ nde ɓáontambisaga nkpa, ɓá k'ékuma ndea Mokonga ka ɔnisa esúia ndeakɛ gǔ á nkpa nde agi ájeɗe.

⁵ Kaɓondɔ unge aánjá ka ɓenu édidisa mosá á ɓakɔta, nna tɔndɔ ka nyɔngɔ á ɓánga esúia ndea Mokonga, a ndiu goto ka nyɔngɔ nde ɓooúba suɓi á měma te, akeni gea á ɓo.

⁶ Ka nyɔngɔ índɔ unge, ɓo phɔtɔ ophenda manjanja nga, ɓunde ɓáophendisaga ú, Mokonga aámbé aebisi k'ékuma ndɔ.

⁷ Móphani nkpa na nkpa kema nde ankeni ně. Aoɓá n'ande mphendisigi manjanja, mphendani. Aoɓá n'ande mphendisigi ɓaoɓa, mphendani. Nɗokómisani mmbé akeni na ɗokomisa akɛ, mbebáni mmbé akeni na beba akɛ.

Ɛɔphi asosi ekondani

⁸ Kákeni ɓá na nyɔngɔ na ká ɓakpa na nna tɔndɔ ekondani nga, mmbé ankondi nkpa ɓaangbo, atɔtɔkisi ɛɔphi.

⁹ Cɔ, ɛɔphi kau aungee: «Kótunganɛmbɛ, kómmowɛmbɛ nkpa, kóúɓɛmbɛ, kókondɛmbɛ kema nde nna akɔ.» Nyɔngɔ nde angbîmisi nndɔ, n'ɛɔphi nɛngbo bui ande: Nkonda dakɔ ɓíndɔ ǒkondi sasakɔ.

¹⁰ Aoɓá n'onkondi dakɔ, kɔ́ɔtɔka n'ongǐí ájeɗe. Ɓá n'ekondi ande tɔtɔkisa ɛɔphi.

Ɓéjujúkɛni ka tɔ̌

¹¹ Mbenɔ nde ɓokau ɓooúba gea, a ye tɔ mbenɔ á jujúka ka tɔ̌ nde ɓo suɓi í. Cɔ, mbenɔ nde ɗéɓemɓeeki Yéso, ɓoamia á ka měma n'a phɔ́ ɗanga aunge asódondi ye tɔ.

¹² Esa angɛndi dakɛ. Akeni ɓéɗeketɛni tambea ájeɗe á kaiphiɔ. Ɓɛ́bɛɗɛni ndiu nkumba á emani nde ɓáɔbɛɗaneaga n'esa.

¹³ Ɓéɓɛni na tambea ánjá nde akeni n'esa, ɓékéɓɛmbɛ n'osǎ ka eaga na noa, ɓékéɓɛmbɛ n'otungɔ, n'iɛɓɛ, sani na nsengo.

¹⁴ Ɓékengeanɛ ndiu na Mɔkɔta Yéso Kiísito. Ɓókoɗeketɛmbɛ mɔphɛ ájeɗe á nyama anu ánongisɛ ka ɓojeɗe.