Ɓalɔ́ma 12 - Ɔngana á Kɛ̌kɛ

Bɛɗaneaga á Mokonga ka ɗoni

¹ Ɓaya, ɓî Mokonga aɔnisi ɓonjánja nɛkɛ ka phɔasu, nenóɗengemisigi gea, ɓóbisɛ enda anu bui ka Mokonga ɓea ɔphɛ́ɔ ánjá, nnde aoenda na kángá ɓojeɗe. Nndɔ aɓande obebɔ nɛnu á ka měma ka yɛ.

² Ɓókoɓongeɛgɛmbɛ nyɔngɔ á ka mokonda ndee. Ɗeketani ndiu Mokonga ánokětiɛ na opha anu úbapha á kɛ̌kɛ. Ɓondɔ unge ɓoengekisande kema nde amɓɔngɛi Mokonga, nnde aánjá na nnde á kanga kisɛki.

³ Ka ɓeana na ɓonjánja-ékondi nde Mokonga ɗámopi, aunge nenóngoɗi ɓenu ɓɔbu gea, ká ɓenu kaɓɛmbɛ něɗokomisa phɛɛ, nkpa na nkpa áɓɛ ndiu na měma á ɛngɛpha ka ɓeana na keɓu á ɓeekea nde Mokonga ɗángabei.

⁴ Nyama á nkpa a tɔ mo, a gǎkɛ na gbútuka ásii. Gbútuka ndɔ bui nna gǎkɛ tɔ ɔbɛɗanaga ekuma moci.

⁵ Goto, nanga ɓéɓika, ɓe tɔ ɓea nyama á nkpa moci suɓi á jukana na Kiísito na ɓesu ka ɓesu ɓɔbu, ɓejúkani ɓea gbútuka ɗanga-ɗanga á ka nyama moci.

⁶ Ka ɓonjánja-ékondi ndea Mokonga aunge nkpa na nkpa sɔsɔɓɛ asu ɗátɔí ebigɔ ɗanga-ɗanga mɔtɛ á Mokonga, kaɓɛ n'ande ɔtɔa á nyɔngɔ, akeni gǎkɛ áɔtɔɛ ú ka ɓeana na ɓeekea nɛkɛ.

⁷ Kaɓɛ n'ande ebigɔ á bɛɗanaga, ábɛɗanɛgɛ nɛkɛ, kaɓɛ n'ande ebigɔ á goisaga, ágoisɛgɛ nɛkɛ.

⁸ Kaɓɛ n'ande ebigɔ á phɛá, áphɛɛ. Kaɓɛ n'ande ebigɔ á gaba, ágabɛ na měma á maseye, kaɓɛ n'ande ebigɔ á mamea á ɓakpa, áémameɛ na nténdé, kaɓɛ n'ande ebigɔ á taɓea ɓato á ɓuyɛnɛ, áétaɓeɛ na maseye.

⁹ Ambe ekondi nɛnu áɓɛ kángá maibe. Kángeani ɓojeɗe, ɓóoyameɛ ka ɓonjánja.

¹⁰ Kóndanani ɓea ɓato á komunamema ɗoni, éɗokomisani ngǔngu anu.

¹¹ Ɓókoɓɛmbɛ ɓakusi ka bɛɗanaga, ɓáni ndiu na ɓukpɛkpɛ, na měma á bɛɗaneaga á Mɔkɔta na nténdé.

¹² Ɓáni na maseye ka nyɔngɔ nde ɓoseɓei, ɓáni na měma áɗokǒ suɓi á tambaga. Mɛmani na moíngi ka koɗoni.

¹³ Ótaɓeani ɓato á Mokonga ka kema nde ɓá na siki í. Óseseani ɓunde ɓáonódonda.

¹⁴ Mɛmani Mokonga ábisɛ njaga gǔ á ɓakpa nde ɓáonótambisaga. Mɛmani ka phɔa ɓɔ, ɓɔ́kɔ̌sɛmɛɛgɛmbɛ.

¹⁵ Ɓáni na maseye na ɓunde ɓá na maseye. Gámani na ɓunde ɓáogáma.

¹⁶ Ɓáni na ɔ́kana sɔsɔɓɛ anu. Ɓókóɓɛmbɛ na měma á ébeba. Ɓáni ndiu na měma édidisa. Ɓókǒbisɛmbɛ ɓea ɓa mɔɔngɛ.

¹⁷ Ɓókógisiɛmbɛ ɓojeɗe ka nkpa. Ɓáni na měma á tɔtɔkisa kema ánjá mosá á ɓakpa ɓɔbu.

¹⁸ Aoɓá n'atɔtɔkɛani, na nndɔ atókani na ɓenu, endani ka ɓujɛjɛ na ɓakpa ɓɔbu.

¹⁹ Ɓadani ékondi, ɓókógisianɛmbɛ ngǔngu anu. Ɗeketani ndiu esúia ndea Mokonga ka gisia nga, Ɓuku á Mokonga agi te: «Eme aámbé nena ekuma á gisia. Eme aámbé negisiande ɓojeɗe.» Mɔkɔta aámbé ayɔngi.

²⁰ Â gǎkɛ goto ɔyɔnga: «Aoɓá mɓiɓia akɔ n'ana nja, mopha yɛ kema á koea, aoɓá n'ana ɛnyɔta, mopha kema á onoa. Aoɓá n'ogi ɓó, onkusande na soni ɓea kema n'ómphombei eká ka mɔ̌ akɛ.»

²¹ Kǒɗeketeɛmbɛ ka gea ɓojeɗe ákokíndɛ. Kínda ndiu ú ka gea ɓonjánja.