Ɓalɔ́ma 11 - Ɔngana á Kɛ̌kɛ

Mokonga k'éyé Ɓaisilaɛ́li

¹ Cɔ, neúsi ɓe: Mokonga ɗéyége ɓakpa nɛkɛ? Ɓɛɛndɔ! Nga, eme sisani nende Moisilaɛ́li, k'ɛ́ɓɔkɔti ndea Abalaámu, k'ékuna ndea Bɛnjamína.

² Mokonga ɗákáeyé ɓakpa nɛkɛ ɓundɔ ɗáɛsɔmbu mosá. Ɓókóoúba nyɔngɔ nde Ɓuku á Mokonga ayɔngi k'ɔ́ma nde Elía ɗáge na ntaɓo mɔtɛ á Mokonga ka phɔa á Ɓaisilaɛ́li?

³ Áogea: «Mɔkɔta, ɓáemowe ɓaɔtu-nyɔngɔ nɛkɔ na ngbɔa ɛtɛ-ɔ́phɛ́ɔ nɛkɔ. Nejigi tɔ eme sisani, ɓá phɔtɔ ogea ɓámomowɛ.»

⁴ Cɔ, Mokonga ɗánsikisíí gǎkɛ ɓo? Ɗángoɗi gea: «Nena ɓǒko ɛlɛphu ngianjaga iɓɛ (7.000) ɓunde ɓákátógbuki muanku aɓɔ mosá á mokonga á mbɛa Báli.»

⁵ A phɔtɔ ɓó ka matú ndee. Ɓakpa ɓábɔa ɓunde Mokonga ɗáɛsɔmbu ka ɓonjánja-ékondi ɓájigi.

⁶ Aoɓá Mokonga na ɗáɛ̌sɔmbu tɔ ka nyɔngɔ á ɓonjánja-ékondi na nna ka nyɔngɔ á ekuma nɛɓɔ, aoɓá na nna ɓó, ámbé ɓonjánja-ékondi nna ye na kantíti.

⁷ A ɓo? Kema nde Ɓaisilaɛ́li ɗáɓáokáɓa, ɗáɓákátɔi ú. Ɓunde gǎkɛ Mokonga ɗáɛsɔmbu ɓáɔtɔa ú. Ɓuangbo gǎkɛ, ɗáɓákátɔki engekisa.

⁸ A ɓíndɔ Ɓuku á Mokonga agi te: «Mokonga ɗáedeeɓisi ka gea, ɓákaɔ́kaphɛ na ɔnapha na ka kesande.»

⁹ Moamɛ Daúdi â phɔtɔ ɔyɔnga gea: «Ambe mɛja nɛɓɔ áɓɛ kaɓɔ mɛ̌kɔ, ɓotái nde ɓátande kau mpɔ ɓáǒkamba na kema.

¹⁰ Ambe iso aɓɔ áíndɛ ɓákáɔnaphɛ ye, na ngɔngɔ aɓɔ égbukɛ kángá á sungiaga.»

¹¹ Cɔ, negie, Ɓaisilaɛ́li ɗáɓáɓɛtɛkani tɔ na gúa aɓɔ ɗoni? Nndakɛ! Ka nyɔngɔ á ɓojeɗe nɛɓɔ unge ɓato á k'ékuna nengbo ɓáami gǎkɛ ka měma, ka kusisa aɓɔ na nsengo.

¹² Ka nyɔngɔ á ɓojeɗe ndea Ɓaisilaɛ́li aunge aɛ́tɔisi ɓato á ka mokonda ka měma. Tugbanaga aɓɔ aɛ́tɔisi ɓato á k'ékuna nengbo. Cɔ, ɓonjánja-ékondi aɓande ángbó phɛɛ ka amá á Ɓayúda ɓɔbu ka měma!

¹³ Neonóngoɗea ɓenu íɓundɔ ɓókó Ɓayúda gea: Nende nteki nɛnu. Ɓî a ɓó, nena maseye k'ékuma nɛmɔ.

¹⁴ Neseɓei bisisa á ɓato á k'ékuna nɛmɔ na nsengo ka amisa ka ɓɔ.

¹⁵ Ɓî Mokonga ɗáephaphi Ɓayúda, ɗáɔnganisi mokonda na yɛ. Cɔ, mbenɔ nde aeseseande goto, ekende aɓande? Aɓande ɓea ɓasí na ɓájujúki ka kukuwa!

¹⁶ Aoɓá ɓoata á mokati n'ande ka Mokonga, nnde ajigi a phɔtɔ ka Mokonga. Aoɓá mǐgi n'ande ka Mokonga ámbé ntabi a phɔtɔ ka Mokonga.

¹⁷ Ɓaisilaɛ́li ɓá ɓea me á mujɛitúni nde Mokonga ɗátenigi ka ntabi í. Oɓɛ, o ɓea ntabi á me á k'osaa. Ɓákɔtɛisi k'ɔ́ma nɛɓɔ oɓɛ ímbe kó Moyúda onde ɓea ntabi á me á k'osaa. Kɛ̌kɛnde ɔɔtɔa phɔtɔ iɓo á ka mǐgi á mujabíbu.

¹⁸ Kaɓondɔ unge, kɔ́ɔtɔka n'ɔɓɛnjigi ɓantabi nde ɓátenigi. Ǒbebande k'éke? Nna oɓɛ aámbé okumbi mǐgi. Mǐgi ndiu unge aokumbi.

¹⁹ Cɔ, omongoɗeande: «Ɓátótenigi ɓantabi nde ka gea te, ɓámoɗakatisɛ k'ɔ́ma nɛɓɔ.»

²⁰ Eya a ɓó! Mokonga ɗáetenigi ka nyɔngɔ á kanga ɓeekea nɛɓɔ. Oɓɛ oiki gǎkɛ súa ka nyɔngɔ á ɓeekea. Kǒbebɛmbɛ, ɓá ndiu na ɓánga.

²¹ Nga, aoɓá Mokonga na ɗákáegami Ɓaisilaɛ́li ɓunde ɓá ɓea ɓantabi á ɗoni ka gea te ɓámɔtɛ, nna gǎkɛ oɓɛ ámbé akoɗeketande ɔ́mɔtɛ.

²² Cɔ, ianagani phɔ́ ɓonjánja ndea Mokonga na kokae nɛkɛ. Mokonga aákae ka ɓundɔ ɗáɓágu. Yɛ, a gǎkɛ anjánjá k'óɓɛ aoɓá n'oomɓeekea ka ɓonjánja nɛkɛ. Aoɓá na kógi ɓó, ámbé ɓákotenande phɔtɔ.

²³ A gǎkɛ oɓá Ɓayúda na ɓámɓeeki Mokonga, esa moci, yɛ aeɗakatisande goto k'ɔ́ma nɛɓɔ á k'ama mosá-mosá nga, Mokonga ana ɓukpɛkpɛ á ɗakatisa ɓɔ goto.

²⁴ Ɓenu íɓunde ɓókó Ɓayúda ɗoni, ɓo ɓea ntabi á me á Mujɛitúni á k'osaa nnde Mokonga ɗátenigi ú, â gǎkɛ onoɗakatisa ka me ánjá nnde ɗáɓákátúokonaga ɓó. Ɓayúda ɓá ɓea Mujɛitúni á ɗoni nnde ɗáɓákoni, nna akpɛ ka Mokonga tɛisa goto ntabi nde ɗáɓátenigi ka me nɛɓɔ.

Ɓaisilaɛ́li ɓɔbu ɓáamande ka měma

²⁵ Cɔ, ɓaya, nekondi úbisa anu moangɔ á ɓɔsɔmɛa ndea Mokonga ka gea, ɓóúbɛ gea ɓókó ɓato á kɔɓɔɔngɛ. Nga, Ɓaisilaɛ́li ɓuangbo ɓáikande kángá á ɓeekea. Nndɔ aiphiande na ka ɓî mɔɔmba á ɓakpa ɓunde ɓáná Ɓayúda ɓáamande ka měma.

²⁶ Mpɔ, Ɓaisilaɛ́li ɓɔbu ɓáamande ka měma ɓíndɔ Ɓuku á Mokonga ayɔngi: «Namisi atókande na Sayúni, atókisande ɓojeɗe bui á k'ɛɓɔkɔti ndea Yakɔ́ɓɔ.

²⁷ Nnde unge ande ɔngana nde nɛɔnganande na ɓɔ ɓî nesokoseande ɓojeɗe nɛɓɔ.»

²⁸ Ka nyɔngɔ á ya Mbino-Ánjá, Ɓaisilaɛ́li ɓáoɓá ɓaɓiɓia ndea Mokonga ka ɓonjánja nɛnu. Yɛ, â gǎkɛ tɔ kɔ̌sɔmbɔa na konda á ɓɔ ka nyɔngɔ á ɓatataɓɔ.

²⁹ Nga, Mokonga nna tanda ɔtɔka na anganisi mɔphɛ akɛ k'égabɔ na ka mɔphani nɛkɛ ka ɓakpa.

³⁰ Cɔ, kala, ɗóɓókótú ɔmɔ́ka Mokonga, kɛ̌kɛnde gǎkɛ anokui ngomi ka nyɔngɔ nde Ɓayúda ɗáɓákámɔ́ki.

³¹ Cɔ, kɛ̌kɛnde a phɔtɔ ɓó ka ɓɔ, ɓákáɔmɔ́ka Mokonga ka gea te, ánokuiɛ ngomi, kɛ̌kɛnde áekuiɛ phɔtɔ ngomi ɓó.

³² Nga, Mokonga ɗáebisi ɓakpa ɓɔbu ɓea ɓato á mekakɔ ka nyɔngɔ á kanga ɔ́kapha nɛɓɔ, ka gea, Mokonga áekuiɛ ɓɔbu ngomi.

Mokonga aangbóngbó phɛɛ

³³ Ekende Mokonga ana ɛtɔi, úbapha na kɔɓɔɔngɛ ásii ɓende! Ani mmbé aɔtɔka n'aúbi kanisia akɛ ka tena á nyɔngɔ na úba á moangɔ nɛkɛ?

³⁴ Sumbia ɓî Ɓuku á Mokonga ayɔngi gea: «Ani mmbé ɗáúbi kanisia ndea Mɔkɔta? Ani mmbé aɔtɔka n'amphɛí?

³⁵ Ani mmbé ɗákpangi opha akɛ kema ka gea te ánsikisiɛ ú?»

³⁶ Nga, yɛ aámbé ande nconji á kema bui, kema bui aiki ka ɓukpɛkpɛ nɛkɛ na ka phɔakɛ. Obebɔ áɓɛ ka yɛ esa bui! Áɓɛ ɓó.