Ɓalɔ́ma 10 - Ɔngana á Kɛ̌kɛ

¹ Ɓaya, mɔphɛ á ka měma ani na ɛmɛmi nɛmɔ ka Mokonga ka phɔa Ɓayúda ande gea, ɓáamɛ ka měma.

² Eya, neɗigimisi ka phɔaɓɔ gea, ɓána moíngi ka bɛɗaneaga á Mokonga. Moíngi kau a ndiu kángá á úbapha.

³ Nga, ɗáɓákáoúba moangɔ ndea Mokonga ka bisa ɓakpa ɓato á koɗoni mosá akɛ, ɓâ ndiu okáɓa bisa á koɗoni nɛɓɔ sasaɓɔ, ɓákákondɛ ɓeá aphe á koɗoni ndea Mokonga.

⁴ Ande gea te, Yéso aámbé ajúsi ɛɔphi ka sungiaga í ka gea, ɓakpa ɓɔbu ɓunde ɓámɓeeki Yéso ɓáunge Mokonga aebisande ɓato á koɗoni mosá akɛ.

Ɓoamia a ká ɓakpa ɓɔbu

⁵ Cɔ, Mósa sisakɛ ɗáɗundu ka nyɔngɔ á koɗoni nde aotókana n'ɛɔphi gea: «Mmbé a n'otaɔ ka ɛɔphi aámbé aendeande ɛɔphi ndɔɔ.»

⁶ Koɗoni nde atóki ka ɓeekea agi gǎkɛ ɓe: «Koianɛgɛmbɛ suɓi á měma akɔ gea: ‹Ani mmbé atáíande na koba?› (Ande gea te, didisa á Kiísito)

⁷ Goto, koianɛgɛmbɛ sisakɔ gea: ‹Ani mmbé adidande ka nji á ɓasí?›» (Ande gea, táísa á Kiísito ka toka sɔsɔɓɛ á ɓasí?)

⁸ Cɔ, Ɓuku á Mokonga ayɔngi ɓoni? Ayɔngi gea: «Nyɔngɔ á Mokonga a bíbí akɔ, a k'aphenɔkɔ akɔ na suɓi á měma akɔ.» Nyɔngɔ á Mokonga ndɔ, ande mbino nde ɓɛɔtɔmiaga ú ka nyɔngɔ á ɓeekea.

⁹ Aoɓá n'ɔyɔngi k'aphenɔkɔ akɔ sisakɔ mosá á ɓakpa gea, Yéso ande Mɔkɔta na ɓeekea ka měma akɔ gea, Mokonga ɗánjujúkisi ka kukuwa sɔsɔɓɛ á ɓasí, oamande ka měma.

¹⁰ Nga, nkpa aoɓeekea ka měma akɛ, Mokonga áombisa nto á koɗoni, anamisande mmbé aɔyɔnga k'aphenɔkɔ akɛ sisakɛ mosá á ɓakpa.

¹¹ Kaɓondɔ, Ɓuku á Mokonga agi: «Nkpa buakɛ mmbé amɓeeki, kákuwɛku na soni.»

¹² Cɔ, Ɓayúda na ɓunde ɓáná Ɓayúda ɓákátingani nga, ɓɔbu ɓá tɔ na Mɔkɔta moci nga, yɛ aogaba ɛtɔi nɛkɛ ka ɓakpa ɓɔbu ɓunde ɓáɔɔphanea ina akɛ.

¹³ Nga, Ɓuku á Mokonga agi te: «Ɓakpa ɓɔbu ɓunde ɓáɔphaneande ina á Mɔkɔta, ɓáamande ka měma.»

¹⁴ Cɔ, ɓáɔphaneande ina akɛ ɓó na ɓákámɓeeki? Na ɓámɓeekeande ɓo na ɓákámɔ́ki nkpa n'aɔtɔmiaga mbino nɛkɛ? Na ɓáɔ́kande ɓo aoɓá na nkpa kátɔ̌migi ú?

¹⁵ Na ɓakpa ɓátɔmiagande ú ɓo na ɓákáeteki ka tɔ̌miaga í? A ɓíndɔ Ɓuku á Mokonga agi: «Ande maseye ka ɔna bika á ɓunde ɓábiki na Mbino-Ánjá.»

¹⁶ Ɓakpa ɓɔbu ɗáɓákáɓeeki gǎkɛ Mbino-Ánjá ndɔɔ. Isáya ɗáyɔngi ɓe: «Mɔkɔta, ani mmbé atóɓeeki Mbino-Ánjá nde ɓetúɔtɔmiaga?»

¹⁷ Nga ɓeekea aotóka k'índe nkpa aɔ́ki. Mbino kau aotóka ká ɓɔphɛi ndea Kiísito.

¹⁸ Nemáogea: Ande gea te, Ɓayúda ɗáɓákáɔ́ki mɔnɔ ka mbino kau? Eya, ɗáɓáɔ́ki! Ɓuku á Mokonga agi: «Ɛsɔ á ɓatɔmigi-mbino ɗáɔ́kɛkani k'ɔ́ma bui ka mokonda, mbino nde ɗáɓáɔtɔmiaga áɔɛmba mokonda bui.»

¹⁹ Nekoúsi goto, Ɓaisilaɛ́li ɗáɓákáengekisi ú? Mosá, Mokonga ɗán'yɔngisi Mósa gea: «Nenóbisande ɓato á nsengo ka phɔa ɓakpa nde ɓáká ɓato á ekuna ɗoni. Nenóbisande ɓato á esúia gǔ á ekuna nde ɓáná na úbapha.»

²⁰ Isáya áogaojúa ka yɔnga akpɛ gea: «Ɓakpa nde ɗáɓákátúomokaɓa, ɓámɔɔni. Nɛ́ɔ̌sɛnɛkɛa ɓunde ɗáɓákáomoúsia ka kema.»

²¹ Mokonga áɔyɔnga ka phɔa á Ɓaisilaɛ́li gea: «Ɗéonanoa njaga ani esa bui ka ɓakpa nde ɓákáɔmɔɔ́ka, na ɓunde ɓáomoyá.»