Ɓalɔ́ma 1 - Ɔngana á Kɛ̌kɛ

Nsesɔ

¹ Ka ɓaɓêki ndea ka Lɔ́ma, sambani. Cɔ, eme Pɔ́lɔ mbɛɗanigi ndea Kiísito Yéso aámbé neɗundu ɓaoɓa ndee. Mokonga ɗámɔɔphani ka gea néɓɛ nteki, ɗámɔsɔmbu ka tɔ̌miaga Mbino-Ánjá nɛkɛ.

² Mbino-Ánjá ndɔ, Mokonga ɗáɔku ú kala suɓi á Ɓuku ndea ɓaɔtu-nyɔngɔ nɛkɛ.

³ Mbino ndɔ a ka phɔa anakɛ mmbé ka kokpa akɛ ɗáɓɔkɔtɛani k'ékombo ndea moamɛ Daúdi;

⁴ ɓáombisa na ɓukpɛkpɛ ka ɓá Muna-Mokonga, mbenɔ nde Měma á kanga ɓojeɗe ɗánjujúkisi Yéso Kiísito Mɔkɔta nɛsu ka kukuwa.

⁵ Ka nyɔngɔ á Yéso unge Mokonga ɗámopi ɓonjánja-ékondi na ekuma á ɓá nteki, ka úbisa á ɓato á ekuna bui gea te, ka ina akɛ ɓámɓeekeɛ na ɓámɓangɛ.

⁶ Ɓo phɔtɔ sɔsɔɓɛ á ɓakpa ndɔ, ɓenu íɓunde Mokonga ɗánɔɔphani ka ɓá ɓakpa ndea Yéso Kiísito.

⁷ Cɔ, nenóɗundui ɓenu ɓɔbu suɓi á Lɔ́ma ɓunde Mokonga aekondi na ɓunde ɗáɛɓɔphani ka ɓá ɓakpa nɛkɛ ɓato á kanga ɓojeɗe, ɓonjánja-ékondi na ɓujɛjɛ ndea Abasu Mokonga na Mɔkɔta nɛsu Yéso Kiísito áɓɛ na ɓenu.

Pɔ́lɔ ana mɔphɛ á gǎ ɔnana na ɓaɓêki á ka Lɔ́ma

⁸ Mosá á kema bui, neonsega Mokonga nɛmɔ ka Yéso Kiísito ka phɔa anu ɓenu ɓɔbu ka nyɔngɔ nde, ɓáɔtɔmiaga mbino á ɓeekea nɛnu ka mokonda bui.

⁹ Cɔ, Mokonga mmbé nɛɔmbɛɗaneaga na měma ani bui ka tɔ̌miaga Mbino-Ánjá ndea Anakɛ, aoúba gea nnde nɛɔyɔnga ande ɗoni. Yɛ, aoúba gea neonókanisia esa bui.

¹⁰ Mbenɔ bui nde nɛɔmɛma Mokonga, neongoɗea gea kaɓɛ n'akondi, ákoɗɛ kani aphe négɛ mɔtɛ-anu.

¹¹ Eya, nena mɔphɛ phɛɛ áɔna anu ka gea, nénophɛ ebigɔ á ka měma ka kpagisaga měma anu.

¹² Nndɔ ande gea, ɓékpagisanɛgɛni ka ɓeekea nde ɓeně.

¹³ Ɓaya, nekondi ɓóubɛ gea, mɔngɔ ásii ɗéobisa moangɔ á gǎ mɔtɛ-anu, na ka kesande kɛ́tɔtɔkisimbɛ. Cɔ, nekondi néɗunguɛ phɔtɔ mbuka á ka měma mɔtɛ-anu, ɓíndɔ ne phɔtɔ ogea ka ɓakpa nde ɓáná Ɓayúda.

¹⁴ Nende mbɛɗanigi ka enga ɓakpa ɓɔbu. Enga Ɓagiíki na enga á ɓunde ɓáná Ɓagiíki. Enga á ɓaúbaphi na enga á ɓabóbó.

¹⁵ Ka nyɔngɔ índɔ unge ne phɔtɔ na mɔphɛ á tɔ̌miaga Mbino-Ánjá ka ɓenu íɓunde ɓoiki ka Lɔ́ma.

Mbino-Ánjá ana ɓukpɛkpɛ

¹⁶ Cɔ, kéokuwa na soni ka tɔ̌mia Mbino-Ánjá nga, ande ɓukpɛkpɛ nde Mokonga aɔbɛɗaneaga ka amisa nkpa buakɛ mmbé aomɓeekea Yéso. A phɔ́ kǒamisa Ɓayúda, mbusa í, â phɔtɔ ǒamisa ɓunde ɓáná Ɓayúda.

¹⁷ Ka nyɔngɔ nde, Mbino-Ánjá aoúbisa aphe sina nde Mokonga aǒtanga ɓakpa ɓato á koɗoni mosá akɛ. Tanga á ɓakpa ɓondɔ, a tɔndɔ ɔtɔtɔkɛana ka ɓeekea á Yéso. A tɔ ɓíndɔ ɓáɗundu suɓi á Ɓuku á Mokonga gea: «Nto á koɗoni aendande ka nyɔngɔ á ɓeekea.»

Ɓakpa ɓánde ɓato á ɓojeɗe mosá á Mokonga

¹⁸ Cɔ, na koba, Mokonga aúbisi base gea, aɓɛí ka nyɔngɔ á ɓojeɗe bui nde ɓakpa ɓáogea, phɔtɔ ɓî ɓákáomɓánga. Ɓakpa ndɔ ɓáunge ɓáɗaki gea, ɗoni á Mokonga kaɓɛ base.

¹⁹ Kema bui nde akeni gǎkɛ áúbikanɛ ka phɔa Mokonga, ande base mosá aɓɔ, ka nyɔngɔ nde Mokonga aámbé ɗéúbisi ú.

²⁰ Nga, kpanga á ɓî Mokonga ɗáconji mokonda, ɓukpɛkpɛ nɛkɛ á mɛyɔ na ebigɔ nɛkɛ á ɓá Mokonga nnde nna kɔɔnɛkana, áɔɔnɛkana k'ékuma nde ɗábɛɗanigi. Ka ianaga á nyɔngɔ ndɔ, ɓakpa ɓáká n'aphe énganea.

²¹ Nanga ɗáɓáomúba Mokonga, ɓákáɓɛ onɗokomisa na sega akɛ ɓíndɔ akeni gea í ka Mokonga. Ɓâ ndiu óɓá na kanisia á kanga kantíti, měma aɓɔ á kanga úbapha áoɓá na kaiphiɔ.

²² Ɓáǒbeba gea ɓánde ɓato á kɔɓɔɔngɛ, na ɓá ndiu ɓabóbó.

²³ Ɔma á beba á Mokonga mɛna-ɓoombia, mmbé ande mɛyɔ, ɓâ ndiu obeba iii nde akengeani na nkpa ímbe aokuwa, ɓambǔ, ɓanyama á ecinji gena na ɓunde ɓáoɗaa.

²⁴ Ka nyɔngɔ índɔ unge Mokonga ɗěɗeketi ɓáɓeɛ mɔphɛ ájeɗe á ka měma aɓɔ, ka jɔɔkisa nyama aɓɔ sasaɓɔ ngǔngu aɓɔ.

²⁵ Ɓɔ, ɓáoanganisa ɗoni ndea Mokonga ka mbɛa. Ɗáɓáobeba na bɛɗaneaga kema nde Mokonga aconji, k'ɔ́ma á bɛɗaneaga á Mokonga mmbé akeni n'obebɔ ka saga na saga, áɓɛ ɓó!

²⁶ Kaɓondɔ unge, Mokonga ɗáeɗeketi ɓáɓeɛ mɔphɛ nɛɓɔ á soni. Ɓake nɛɓɔ ɓâ koanganisa moangɔ á ɓǒko ɗága aɓɔ, ka ɗanaga ndiu ɓake ka ɓake.

²⁷ A phɔtɔ ɓó ka ɓǒko. Ɓáɗeketi ɗága á ɓake, měma aɓɔ áobomoka ka mɔphɛ á soni á ɗanaga ɓǒko ka ɓǒko. Ɓî aɓó, akeni ɓátenɛ nyɔngɔ nɛɓɔ akpɛ ɓíndɔ akeni na tambea nɛɓɔ ájeɗe.

²⁸ Cɔ, ɓî ɗáɓáyé úbá á Mokonga, Mokonga áǒɗeketa ka úbapha aɓɔ ájeɗe. Ka gea, ɓágeɛ kema nde ɓákátókeni gea í.

²⁹ Ɓátúmi n'etéte á kanga koɗoni bui, ɓojeɗe, kokae, mɔphɛ ájeɗe, kuma, ɓátúmi na nsengo, moaga á ɓakpa, sani, maibe, ɓɔ ɓánde ɓato á tɔngana.

³⁰ Ɓáɔyɔngaga ájeɗe ka phɔa ɓadaɓɔ, ɓaɓiɓia á Mokonga, ɓato á mbóma, ɓato á ébeba, ɓato á měma ájeɗe, ɓato á ɓemboko, ɓato á phɔtanaga, ɓato á maibe ka tɔá kema ájeɗe, ɓakpa nde ɓákáɔ̌ɓɔka ɓaɓɔkɔti aɓɔ.

³¹ Ɓabóbó, ɓato á kanga koɗoni, ɓato á kanga ekondi, ɓato á kanga ngomi.

³² Ɓɔ ɓaoúba gea, ɛɔphi ndea Mokonga asosi te, ɓunde ɓáotambea ɓó, akeni ɓákuwɛ. Cɔ, ɓɔ, nanga ɓáúba nndɔ, ɓáotútuisa gea í na gamana phɔtɔ na ɓakpa nde ɓáogea ɓó.