Mphaniɔ 9 - Ɔngana á Kɛ̌kɛ

Mbengu á ko ɓɔku

¹ Mbusa, malaéka ɓa ko ɓɔku, áosúa mbengu. Nɛ́ɔɔna sɛɛngɔa moci n'atóki na koba, áogua ka mokonda. Ɗáɓámophi yɛ phembekete á etia á mininga.

² Sɛɛngɔa áoúkuwa n'etia á mininga, mpɔ, maki áoma k'étia ndɔ n'aɓea maki á ɛɛmbɛ á nsa ángbó. Maní na mpɛna áoinda ka nyɔngɔ á maki nde atóki k'étia ndɔɔ.

³ Ɓ'áphaa ɓáojuana ka maki ndɔɔ, ɓáɔɛmba mokonda bui. Ɓáǒɓopha ɓukpɛkpɛ ɓea ɓukpɛkpɛ á ɓankoto.

⁴ Ɓáǒngoɗea te, ɓákátúkatúkɛmbɛ ka kasa, ka me ángbóngbó na me ábɔbɔbɔa á ka mokonda. Ɓáetoɛ ndiu tɔndɔ ɓakpa nde, ɓáná na mutúti ndea Mokonga k'éndóndó aɓɔ.

⁵ Ɗáɓákáeɓophi ɓukpɛkpɛ á mowa á nkpa, ɓâ ndiu ǒɓopha ɓukpɛkpɛ á tambisaga á ɓakpa ka ɓasonge ɓɔku. Tambaga ndɔ, ande ɓea taɓá á nkoto n'antú nkpa.

⁶ Cɔ, ka matú ndɔ, ɓakpa ɓákáɓáeka kukuwa, kukuwa káɓɛku ye gǎkɛ. Ɓákondaeka kukuwa, kukuwa ěteande gǎkɛ ɗanga.

⁷ Ɓ'áphaa ndɔ ɗáɓákengeani na ɓamponda nde ɓ'éɓɔngisigi k'émani. Ɗáɓáɔ́li kema ɓea kekombó á koɓoamɛ á láté ka mɔ̌ aɓɔ. Keongi aɓɔ áokengeana n'índe á ɓakpa.

⁸ Sekamɔ̌ aɓɔ ɗákengeani na sekamɔ̌ á ɓake, minyɔ aɓɔ áoɓá ɓea minyɔ á simba.

⁹ Egogo aɓɔ, ɗána kema ɓea nguɓa á ngɔa. Ndu á kepupe aɓɔ, áɔɔ́kɛkana ɓea ndu á ɓamponda á emani ɓásii na ɓáoɓota koko émani mbangɔ ka gǎ k'aphe étu.

¹⁰ Ɓáoɓá na nkondo ɓea ɓankoto, ka toa á ɓakpa ka ɓasonge ɓɔku.

¹¹ Moamɛ nɛɓɔ ande malaéka á mininga, ina akɛ ka Kiɛbulanía ande «Abidáni», ka Kigiíki, ande «Apɔliɔ́ni», n'ande gea: «Ntúkatuki».

¹² Cɔ, nyɔngɔ á ngomi á k'ama mosá-mosá, anyɛ́nyi, mbusa í, iɓɛ abikande goto.

Mbengu á ko ngianjaga (6)

¹³ Cɔ, malaéka ɓa ko ngianjaga (6), áosúa mbengu. Nɛ́ɔɔ́ka ɛsɔ n'aotóka ka nkɛkɛɔ gena ɛ́tɛ-ɔ́phɛ́ɔ, nde ɓáɓɔngisigi na láté, nnde ɗátú mosá á Mokonga.

¹⁴ Ɛsɔ ndɔ áongoɗea malaéka á ko ngianjaga (6) mmbé ɗátú na mbengu ndɔ gea: «Ókoɗa ɓamalaéka ndea Mokonga gena nde ɓá ka mekakɔ ka motii á oɓenge Ɛphuláti.»

¹⁵ Ɓáǒkoɗa ɓamalaéka ndea Mokonga gena ndɔ, ɓunde ɗáɓěɓɔngisigi ka mbenɔ, esa, songe na saga gea te, ɓaémɛ phaeka moci ka isaɔ á ɓakpa.

¹⁶ Mpɔ, ɓáomongoɗea mɔɔmba á ɓato-émani na ɓákǎmbi gǔ á ɓamponda á emani. Ɗáɓátú ɓakpa miliɔni mia iɓɛ (200.000.000).

¹⁷ Suɓi á mphaniɔ nɛmɔ, ɓato-émani na ɓamponda émani na ɓá ɓe: ɗáɓátú na ngɔ́mbɛ á k'égogo ɓea nguɓa, ánjɛ ɓea nsa, nɛngbo n'aíndi ɓea ego, nɛngbo ɓea mpusu á ɔmiɔ. Mɔ̌ á ɓamponda ndɔ, ɗákengeani na mɔ̌ á ɓasimba. Ɛɛmbɛ, maki, mpusu á ɔmiɔ, áotóka k'aphenɔkɔ aɓɔ.

¹⁸ Phaeka moci ka isaɔ á ɓakpa, ɓáokuwa ka nyɔngɔ á tambaga isaɔ ndɔɔ: ɛɛmbɛ, maki, na mpusu á ɔmiɔ nnde ɗáotóka k'aphenɔkɔ á ɓamponda ndɔɔ.

¹⁹ Nga, ɓukpɛkpɛ á ɓamponda ɗáotóka k'aphenɔkɔ aɓɔ na ka nkondo aɓɔ. Nkondo aɓɔ akengeani na mɔ̌ á ɓanjɔka, ɓunde ɓáǒtambisaga ɓakpa.

²⁰ Cɔ, ɓakpa nde ɗáɓákáku ka nyɔngɔ á tambaga ndɔ, ɗáɓákáɗeketi gǎkɛ ɗokomisa á ɓansombo, na ɗokomisa á ɓamokonga á mbɛa nnde ɓáɓɔngisigi ɓɔ sasaɓɔ na láté, ngɔa, nsoɓe, ɛtɛ, na me, nnde nnaɔɔnapha, nnaɔɔ́kapha, nnaotamba.

²¹ Ɗáɓákáɗeketi phɔtɔ mowanaga, eemba, otungɔ na kuɓa.