Mphaniɔ 8 - Ɔngana á Kɛ̌kɛ

Kóɗaga á ngoi á mutúti

¹ Mbenɔ nde Muna-Mɔgɔgɔ ɗákoɗigi ngoi á mutúti á ko ngianjaga iɓɛ (7), koba áodakana phio! Ka gbútuka á mbenɔ moci.

² Mpɔ, nɛ́ɔ̌ɓɔna ɓamalaéka ndea Mokonga ngianjaga iɓɛ (7) na ɓámamege mosá á Mokonga, ɓáǒɓopha mbengu ngianjaga iɓɛ (7).

³ Malaéka ndea Mokonga ɓaangbo áobika, áomama gǔ ɛ́tɛ-ɔ́phɛ́ɔ, n'abɛɗi mbeka na ɓáconji na láté. Ɓáomopha nkoki ásii, ásiɗisɛ ú gǔ ɛ́tɛ-ɔ́phɛ́ɔ, ka gea maki í átaiɛ mosá á Mokonga. Nndɔ ande aphe moci á mɛma á Mokonga ka phɔa á ɓato á kanga ɓojeɗe ɓɔbu.

⁴ Maki á nkoki ndɔɔ, áoma kimoci n'ɛmɛmi ndea ɓato á kanga ɓojeɗe áotáia mosá á Mokonga ka toka ka njaga á malaéka ndɔɔ.

⁵ Mpɔ, malaéka áɔbɛɗa mbeka á láté ndɔ, áotúmisa n'eká nde ɗátú k'ɛ́tɛ-ɔ́phɛ́ɔ, áomaka ka mokonda gbu! Mpɔ, ɓáoka á mbua áoɓá, eongo, phenua á mbua, na ɓaningina.

Ɓamalaéka ndea Mokonga ɓáosúa mbengu

⁶ Mbusa, ɓamalaéka ndea Mokonga ngianjaga iɓɛ (7), ɓundɔ ɗáɓábɛɗi mbengu ngianjaga iɓɛ (7), ɓáɔ̌ɓɔngisaga ka sua í.

⁷ Malaéka ndea Mokonga ɓa k'ama mosá-mosá áosúa mbengu. Mpɔ, mbua á matanda á nsa, nnde adaɗokeani na magia, ɓáomaka ka mokonda. Phaeka moci á isaɔ á mokonda áɔɛkɛkanaga, phaeka moci á isaɔ á ɓame áɔɛkɛkanaga, na kasa bui á dɛka â phɔtɔ ɔɛkɛkanaga.

⁸ Malaéka ndea Mokonga ɓa ko ɓaɓɛ áosúa mbengu. Kema ɓea mamba ángbó á nsa n'aǒtoɓoaga, ɓáomaka k'óɓenge. Phaeka moci á isaɔ á iɓo áogaikana magia.

⁹ Phaeka moci á econji nnde aoenda suɓi á iɓo áokuwa, na phaeka isaɔ á koko áoújukana.

¹⁰ Malaéka ndea Mokonga ɓa ko ɓasaɔ áosúa mbengu. Sɛɛngɔa angbóngbó n'aǒtoɓoaga ɓea ɛɛmbɛ á nsa, áogua n'atóki na koba. Áogua ka phaeka isaɔ á ɔɓa na ntogɔ.

¹¹ (Ina á sɛɛngɔa ndɔ, ande Jiála). Phaeka isaɔ á iɓo áoɓá ájia, ɓakpa ɓásii ɓunde ɗáɓánú iɓo ndɔ, ɓáokuwa ka nyɔngɔ á jiála í.

¹² Malaéka ndea Mokonga ɓa ko gena áosúa mbengu. Phaeka moci ka isaɔ á maní, songe na ɓasɛɛngɔa, áǒjujia. Phaeka moci ka isaɔ á maní, na sɛɛngɔa áǒjujia. Phaeka moci ka isaɔ ka owanga ésa na keiphe â phɔtɔ ǒjujia.

¹³ Nê goto ɔɔna na ɔ́ka ndu á yaa á ndia ka mpɛna phɛɛ, n'aɔyɔnga akpɛ te: «Ngomi ee! Ngomi ee! Ka ɓato á ka mokonda! Ngomi ka ɓɔ mbenɔ nde ɓamalaéka ndea Mokonga ɓunɛngbo ɓasaɔ ɓágeande ɓásuɛ mbengu nɛɓɔ.»