Mphaniɔ 7 - Ɔngana á Kɛ̌kɛ

Ɓɛta á mutúti k'éndóndó á ɓabɛɗanigi ndea Mokonga

¹ Mbusa á nyɔngɔ ndɔ, nɛ́ɔ̌ɓɔna ɓamalaéka ndea Mokonga gena na ɓámamege nkɛkɛɔ gena á mokonda. Ɗáɓádungi maphopho á ka nkɛkɛɔ gena á ka mokonda ka gea, ka maphopho kasindɛmbɛ ka mokonda, k'óɓenge, na ka ɓame.

² Nɛ́ɔmɔna malaéka ɓaangbo n'aoɗapha nci á n'okomo, n'abɛɗi mutúti ndea Mokonga Mɛyɔ. Áɔyɔnga n'ɛsɔ akpɛ ka ɓamalaéka ndea Mokonga gena ndɔ, ɗáɓěɓophi ɓukpɛkpɛ á túkatúka á mokonda n'oɓenge.

³ Áǒngoɗea te: «Ɓókotúkatúkɛmbɛ mokonda, n'oɓenge, na ɓame, na ka ɓî ɓɛɓɛtande mutúti k'éndóndó á ɓabɛɗanigi ndea Mokonga nɛsu.»

⁴ Mpɔ, nɛ́ɔɔ́ka mɔɔmba á ɓunde ɗáɓáɓɛti mutúti ndea Mokonga k'éndóndó aɓɔ. Ɗáɓátú ɓakpa ɛlɛphu moci mia gena nkama gena na gena (144.000), k'ékuna bui ndea Ɓaisilaɛ́li.

⁵ Ka ketoto ndea Yúda, ɓunde ɗáɓɛ̌ɓɛti ně, ɗáɓátú ɓakpa ɛlɛphu nkama na ɓaɓɛ (12.000). Ka ketoto ndea Lubɛ́ni, ɓunde ɗáɓɛ̌bɛti ně, ɗáɓátú ɓakpa ɛlɛphu nkama na ɓaɓɛ (12.000). Ka ketoto ndea Gádi ɓunde ɗáɓɛ̌bɛti ně, ɗáɓátú ɓakpa ɛlɛphu nkama na ɓaɓɛ (12.000).

⁶ Ka ketoto ndea Asɛ́i, ɓunde ɗáɓɛ̌ɓɛti ně, ɗáɓátú ɓakpa ɛlɛphu nkama na ɓaɓɛ (12.000). Ka ketoto ndea Naphutáli, ɓunde ɗáɓɛ̌ɓɛti ně, ɗáɓátú ɓakpa ɛlɛphu nkama na ɓaɓɛ (12.000). Ka ketoto ndea Manásɛ, ɓunde ɗáɓɛ̌ɓɛti ně, ɗáɓátú ɓakpa ɛlɛphu nkama na ɓaɓɛ (12.000).

⁷ Ka ketoto ndea Simɛɔ́ni, ɓunde ɗáɓɛ̌ɓɛti ně, ɗáɓátú ɓakpa ɛlɛphu nkama na ɓaɓɛ (12.000). Ka ketoto ndea Láwi, ɓunde ɗáɓɛ̌ɓɛti ně, ɗáɓátú ɓakpa ɛlɛphu nkama na ɓaɓɛ (12.000). Ka ketoto ndea Isakáli, ɓunde ɗáɓɛ̌ɓɛti ně, ɗáɓátú ɓakpa ɛlɛphu nkama na ɓaɓɛ (12.000).

⁸ Ka ketoto ndea Jabulɔ́ni, ɓunde ɗáɓɛ̌ɓɛti ně, ɗáɓátú ɓakpa ɛlɛphu nkama na ɓaɓɛ (12.000). Ka ketoto ndea Yɔsɛ́phu, ɓunde ɗáɓɛ̌ɓɛti ně, ɗáɓátú ɓakpa ɛlɛphu nkama na ɓaɓɛ (12.000) na ka ketoto ndea Bɛnjamína, ɓunde ɗáɓɛ̌ɓɛti ně, ɗáɓátú ɓakpa ɛlɛphu nkama na ɓaɓɛ (12.000). Bundɔ ɓáunge ɗáɓáɓɛti mutúti ndea Mokonga k'éndóndó aɓɔ.

Usɛsɛ ángbó mosá á kankaanga á koɓoamɛ

⁹ Mbusa á nyɔngɔ ndɔ, nɛ́ɔɔna usɛsɛ ángbó á ɓakpa, nnde nkpa nnaɔtɔka nětangi. Ɓakpa ndɔ ɗáɓátóki ka nji bui, k'ekuna bui, k'ététe á ɓakpa ɓɔbu, na k'ététe á ɛyɔngi bui. Ɗáɓámamege mosá á kankaanga á koɓoamɛ na mosá á Muna-Mɔgɔgɔ. Ɗáɓáɔ́li bɔngɔ éndǎ ábu na ɓábɛɗigi kasa á mbia.

¹⁰ Ɓáɔyɔnga n'ɛsɔ akpɛ gea: «Ɓoamia á ka měma atóki ka Mokonga nɛsu! Mmbé aiki ka kankaanga á koɓoamɛ! Na ka Muna-Mɔgɔgɔ!»

¹¹ Cɔ, ɓamalaéka ndea Mokonga ɓɔbu ɗáɓátimbi kankaanga á koɓoamɛ ndɔ, ɓáǒtimba ɓagbɛga na ɓamakɛlúbi gena. Ɓáogbúka muanku na ka ɓî endóndó aɓɔ agbondu oɗo mosá á kankaanga á koɓoamɛ, ɓáombeba Mokonga,

¹² ɓáogea: «Áɓɛ ɓó! Obebɔ, ɓoombia, kɔɓɔɔngɛ, ɓosegi, ɓokutú, ɓukpɛkpɛ phɛɛ, áɓɛ ka Mokonga nɛsu ka saga na saga. Áɓɛ ɓó!»

¹³ Mpɔ, ka ɓagbɛga ndɔ, moci áomúsia: «Cɔ, ɓunde ɓáɔ́li bɔngɔ éndǎndandǎ ábu ɓánde ɓa ani? Ɓátóki wani?»

¹⁴ Néonsikisia te: «Mɔkɔta nɛmɔ, oɓɛ aámbé ooúba.» Áomogea: «Ɓundɔ, ɓáunge ɓátóki ka tambaga ángbó. Ɓásokosi bɔngɔ éndǎ nɛɓɔ na magia á Muna-Mɔgɔgɔ, ka ɓondɔ, bɔngɔ nɛɓɔ áoɓá ábu.

¹⁵ Kaɓondɔ unge, Ɓámamege mosá á kankaanga á koɓoamɛ ndea Mokonga. Báɔmbɛɗaneaga keiphe n'esa k'éndu nɛkɛ. Mmbé aiki gǔ á kankaanga á koɓoamɛ ěambande.

¹⁶ Ɓɔ, ɓákákuwɛku ye na nja. Ɛnyɔta káɛbɛɗɛku ye. Maní káɛɓɛtɛku ye. Ɓákáɛyɔkɛku ye ɓojó.

¹⁷ Ka nyɔngɔ nde, Muna-Mɔgɔgɔ, mmbé aiki ka měme á kankaanga á koɓoamɛ, ěambande ɓea mɓondigi-ɓamɔgɔgɔ. Ɛ̌sɔndɔɛande ka ntogɔ á iɓo á ɓoamia. Mokonga akɔmbɛande iɓo á ngamɔ bui á k'íso aɓɔ.»