Mphaniɔ 6 - Ɔngana á Kɛ̌kɛ

Koɗaga á ngoi á mutúti ngianjaga iɓɛ (7)

¹ Mbusa, Nɛɔmɔna Muna-Mɔgɔgɔ, n'akoɗi ngoi á mutúti á k'ama mosá-mosá ka mutúti ngianjaga iɓɛ (7) ndɔɔ. Wa, nɛ́ɔmɔ́ka ka ɓamakɛlúbi gena ndɔ, n'aɔyɔnga n'ɛsɔ ɓea ɓáoka á mbua: «Bika!»

² Mpɔ, Nɛɔmɔna mponda á emani mmbé aábu. Mmbé ɗákǎmbi gǔ akɛ, ɗábɛɗi mange, na ɓámophi kekombó á kɔkɔta. Ɗátú ntɔki-emani na áoga goto k'aphe á tɔka á emani.

³ Mbenɔ nde nɛmɔni Muna-Mɔgɔgɔ n'akoɗi ngoi á mutúti á ko iɓɛ, nɛ́ɔmɔ́ka makɛlúbi ɓa ko ɓaɓɛ n'aogea: «Bika!»

⁴ Mpɔ, mponda á emani ɓa ko ɓaɓɛ, n'anjɛnjɛ ɓea nsa áokiɗiana. Mmbé ɗákǎmbi gǔ akɛ, ɗáɓámophi píndí ángbó na kɔkɔta á ɓikisa emani ka mokonda gea te, ɓakpa ɓámowanɛgɛ ngǔngu aɓɔ.

⁵ Mbenɔ nde nɛmɔni Muna-Mɔgɔgɔ n'akoɗi ngoi á mutúti á ko isaɔ, nɛ́ɔmɔ́ka makɛlúbi ɓa ko ɓasaɔ n'aogea: «Bika!» Nɛɔmɔna mponda á emani ɓa ko ɓasaɔ n'aphíphí. Mmbé ɗákǎmbi gǔ akɛ ɗábɛɗi kilɔ ka njaga.

⁶ Nɛ́ɔɔ́ka ɓea ɛsɔ n'aotóka sɔsɔɓɛ á ɓamakɛlúbi gena ndɔ, n'aogea: «Kilɔ moci á nganɔ ande ophendɔ á ekuma á esa moci. Kilɔ isaɔ á saíli ande ophendɔ á ekuma á esa moci. Cɔ, ɓókotúkatúkɛmbɛ gǎkɛ gamba na divai.»

⁷ Mbenɔ nde nɛmɔni Muna-Mɔgɔgɔ n'akoɗi ngoi á mutúti á ko gena, nɛ́ɔɔ́ka ɛsɔ á makɛlúbi ɓa ko gena, n'aogea: «Bika!»

⁸ Nɛɔmɔna mponda á emani moci, nkeke akɛ n'akengeani na ebǔ. Ina á mmbé ɗákǎmbi gǔ akɛ ande Kukuwa. Nji á ɓasí ɗáobika mbusa akɛ. Ɓáǒɓopha kɔkɔta gǔ á phaeka gena á mokonda, ka mowa á ɓakpa na píndí, monganya, esambɔ, na ɓanyama akaekae á ka mokonda.

⁹ Mbenɔ nde nɛmɔni Muna-Mɔgɔgɔ n'akoɗi ngoi á mutúti á ko ɓɔku, nɛ́ɔɔna kusi ɛ́tɛ-ɔ́phɛ́ɔ, měma á ɓakpa nde ɗáɓětenigi ka nyɔngɔ á tɔ̌miaga á Nyɔngɔ á Mokonga, na ka nyɔngɔ á ɗigimisa nde ɓakpa ɗáɓáoɗigimisa ka phɔakɛ.

¹⁰ Ɓɔ, ɗáɓáɔyɔnga n'ɛsɔ akpɛ te: «Mɔkɔta, nto á kanga á ɓojeɗe na nto á ɗoni, ka mbenɔ sina nde ooɓondea tena á nyɔngɔ á ɓato á ka mokonda, na gisia á magia asu?»

¹¹ Ɓâ gǎkɛ ǒɓopha nkpa na nkpa bɔngɔ éndǎ ábu, ɓáǒngoɗea te, ɓáɓondeɛ phɔ́ ka mbenɔ ábɔa na ka ɓî mɔɔmba á ɓadaɓɔ ɓabɛɗanigi na ɓana-amaɓɔ íɓunde ɓásiande ɓea ɓɔ, akpeengeanande.

¹² Mbenɔ nde nɛmɔni Muna-Mɔgɔgɔ n'akoɗi ngoi á mutúti á ko ngianjaga (6), ɓaningina akpɛ phɛɛ áoɓá, maní áoinda ɓea bɔngɔ á kekusa, songe áotaneaga ɓea magia.

¹³ Ɓasɛɛngɔa ɓáogua ka oɗo ka toka na koba ɓea mbuka á me mtini na kámɔtimbɛ nnde sumbu aoemisaga me í.

¹⁴ Koba áǒjujia ɓea kɛsɛ na ɓáikitigi, ɓáotóisa mamba na kesanga k'ɔ́ma í.

¹⁵ Ɓaamɛ á ka mokonda, ɓakɔta, ɓakɔta á ɓato émani, ɓatɔi, ɓato á ɓukpɛkpɛ, na ɓakpa ɓɔbu, ɓakɔɓɛ, na ɓunde ɓáná ɓakɔɓɛ, ɓáɔ̌sɔmɛana suɓi á kubu á okanga na sɔsɔɓɛ á okanga á mamba-mamba.

¹⁶ Ɓáɔyɔnga na mamba, na okanga te: «Ósoguiani, ɔ́sɔsɔmɛani k'íso á mmbé aoika ka kankaanga á koɓoamɛ, na ɔ́sɔsɔmɛani ka esúia ndea Muna-Mɔgɔgɔ.

¹⁷ Ka nyɔngɔ nde, esa á esúia ángbó nɛɓɔ, abiki. Ani mmbé aphiphiande?»