Mphaniɔ 5 - Ɔngana á Kɛ̌kɛ

Mphaniɔ á ɓuku na Muna-mɔgɔgɔ

¹ Cɔ, nɛ́ɔɔna ɓuku ka njaga á mǔku á mmbé ɗáiki ka kankaanga á koɓoamɛ. Ɓuku ndɔ, ɗáɓáɗundu ka ngɔngɔ í na suɓi í, na ɓáɓɛti ú na mutúti ngianjaga iɓɛ (7).

² Mpɔ, Nɛɔmɔna malaéka akpɛkpɛ n'aɔyɔnga n'ɛsɔ akpɛ ɓe: «Ani mmbé akeni koɗa á ngoi á mutúti nde na úkuwa á ɓuku ndee?»

³ Cɔ, kaɓɛ gǎkɛ na nkpa nde ɗákeni, kaɓɛ na koba, kaɓɛ ka mokonda na suɓi á oɗo ka ukuwa ɓuku ndɔ na ɔnjia á suɓi í.

⁴ Kaɓondɔ, néogáma phɛɛ ka nyɔngɔ nde, ɗɛ́kɛ́mɔni nkpa nde akeni ka ukuwa á ɓuku ndɔ na ɔnjia á suɓi í.

⁵ Mpɔ, ka ɓagbɛga ndɔ, moci â gǎkɛ omongoɗea: «Kógámɛmbɛ. Ɔna: simba ndea k'ekuna ndea Yúda, nto á k'ɛɓɔkɔti ndea Moamɛ Daúdi, akíndi. Yɛ, akeni na úkuwa á ngoi á mutúti ngianjaga iɓɛ (7) ndɔɔ, na úkuwa á ɓuku.»

⁶ Mpɔ, Nɛɔmɔna Muna-mɔgɔgɔ n'aɓea mmbé ɓánteni, n'amame ka měme á kankaanga á koɓoamɛ, ɓamakɛlúbi gena na ɓagbɛga na ɓántimbi. Yɛ, ɗátú na ndeka ngianjaga iɓɛ (7), n'íso ngianjaga iɓɛ (7), nnde n'ande měma ngianjaga iɓɛ (7) ndea Mokonga nnde ɗáɓáteki ka mokonda bui.

⁷ Cɔ, Muna-mɔgɔgɔ áɔsɛkɛɗa, áɔbɛɗa ɓuku nde ɗátú ka njaga á mǔku á mmbé ɗáiki ka kankaanga á koɓoamɛ.

⁸ Mbenɔ nde ɗábɛɗi ɓuku, ɓamakɛlúbi gena na ɓagbɛga nkama iɓɛ na gena (24), ɓáogbúka muanku mosá á Muna Mɔgɔgɔ. Ɓagbɛga ɓɔbu ɓáoɓá na ɓaphíí, na cǎ nde ɓáɓɔngisigi na láté, n'atúmi na nkoki, nnde ande ɛmɛmi ndea ɓato á kanga ɓojeɗe.

⁹ Ɓagbɛga ndɔ ɓáoemba embɔ á kɛ̌kɛ ɓe: «Okeni bɛɗa á ɓuku ndɔ, na koɗaga á ngoi á mutúti. Ka nyɔngɔ nde, ɗáɓákomowe, na ka phɛ́a nɛkɔ, ɗóǒsomba ka Mokonga ɓakpa na magia akɔ, ɓakpa á k'ekuna bui, á ɛyɔngi bui, ɛɓɔkɔti bui na nji bui.

¹⁰ Ɗóǒbisi ɓakpa ndɔ ɓáoɓá koɓoamɛ na ɓatoɓeigi-phɛ́a ka bɛɗaneaga á Mokonga, Na ɓámameande nji bui.»

¹¹ Ɗɛ́ɔnji, na ɗɛ́ɔ́ki ɛsɔ á usɛsɛ á ɓamalaéka ndea Mokonga ɓunde ɓátimbi kankaanga á koɓoamɛ, na ɓamakɛlúbi ndɔ gena na ɓagbɛga ndɔɔ. Mɔɔmba aɓɔ ɗátú ɛlɛphu na ɛlɛphu, miliɔni na miliɔni.

¹² Ɗáɓáoemba n'ɛsɔ akpɛ gea: «Muna-mɔgɔgɔ, mmbé ɗáɓámowe, akeni áɓɛ na okuu, ɛtɔi, kɔɓɔɔngɛ na ɓukpɛkpɛ ɓokutú, ɓoombia na obebɔ!»

¹³ Nê phɔtɔ kɔ ɔ́ka ecɔnji bui nde ana koba, ka mokonda, suɓi á oɗo na suɓi á oɓenge, econji bui na ɓáoemba gea: «Ka mmbé aiki ka kankaanga á koɓoamɛ, na ka Muna-mɔgɔgɔ, ambe áɓɛ n'obebɔ, ɓokutú, ɓoombia, na ukuu ka saga na saga!»

¹⁴ Mpɔ, ɓamakɛlúbi gena ndɔ, ɓáogea: «Áɓɛ ɓó!» Ɓagbɛga ndɔ, ɓáogbúka muanku aɓɔ, ɓáobeba.