Mphaniɔ 4 - Ɔngana á Kɛ̌kɛ

Beba á Mokonga na koba

¹ Mbusa índɔ, ɗɛ́ɔni mphaniɔ nɛngbo, kǐo á na koba n'aúkukani. Ɛsɔ nde ɗɛ́ɔ́ki n'aɔyɔnga n'eme mosá, n'akengeani na ɛsɔ á mbengu, áomongoɗea: «Cɔ, ɗapha koni, neophangiande nnde akeni ákiɗianɛ mbusa.»

² Kɛ̌kɛndɔ tɔ, Měma á Mokonga áɔmɔgɔna. Nɛ́ɔɔna kankaanga á koɓoamɛ na koba, nkpa n'aiki gǔ í.

³ Nkpa ndɔ, keongi akɛ ɗáɔbɛnya ɓea ɛtɛ á esombi akpɛ nnde ɓáɔɔphana ka kisambaye «yáspi na saadíɔ.» Akema nde aɔbɛnya ɓea ɛtɛ nde ɓáɔɔphana ka kisambaye «jumaídi» áotimba kankaanga á koɓoamɛ ndɔɔ.

⁴ Kankaanga nɛngbo á koɓoamɛ nkama iɓɛ na gena (24) ɗátimbi kankaanga á koɓoamɛ ndɔɔ. Ɓagbɛga nkama iɓɛ na gena (24) ɓáoika gǔ í, na ɓáɔ́li bɔngɔ ábu na kekombó á láté.

⁵ Ka kankaanga á koɓoamɛ ndɔ, ɗáojuana phenua, gbungbua, na ɓaoka á mbua. Mosá á kankaanga á koɓoamɛ ndɔ, ɔbɛa ngianjaga iɓɛ (7) á koola ɗáɔbɛnya, n'ande Měma ngianjaga iɓɛ (7) ndea Mokonga.

⁶ Mosá á kankaanga á koɓoamɛ ndɔ, ɗátú na kema ɓea oɓenge á kiyɔa, phɔtɔ ɓea ngaɛ́. Suɓi á kankaanga á koɓoamɛ ndɔ na mpɛphɛ í, ɓamakɛlúbi gena, ɓáotimba, na ɓá n'íso mosá na mbusa aɓɔ.

⁷ Kɛlúbi ɓa k'ama mosá-mosá, ɗákengeani na simba. Mmbé ɓa ko baɓɛ, ɗákengeani na mponjɔ á ngɔmbɛ. Kɛlúbi ɓa ko ɓasaɔ, ɗákengeani na nkpa. Mmbé ɓa ko gena, áokengeana na ndia n'aoyaa.

⁸ Ɓamakɛlúbi gena ndɔ, moci-moci áoɓá na kepupe ngianjaga (6), nnde atúmi na iso, gǔ á kepupe na kusi í. Ɓáɔyɔnga keiphe n'esa kángá á ɗeketa gea: «Nto á kanga ɓojeɗe, Nto á kanga ɓojeɗe, Nto á kanga ɓojeɗe, Mɔkɔta Mokonga, Mɛna-ɓukpɛkpɛ, mmbé ɗátú, mmbé a ɓei na mmbé aobika.»

⁹ Ka mbenɔ bui ɓamakɛlúbi ndɔ ɓáombeba, ɓáonɗokomisa, na ɓáonsega mmbé aiki ka kankaanga á koɓoamɛ, n'aoenda mɛyɔ,

¹⁰ ɓagbɛga nkama iɓɛ na gena (24) ndɔ, ɓáogbúka muanku mosá á mmbé aiki ka kankaanga á koɓoamɛ, ɓáombeba mmbé aoenda mɛyɔ. Ɓáophúia kekombó nɛɓɔ mosá á kankaanga, ɓáɔyɔnga gea:

¹¹ «Mɔkɔta nɛsu Mokonga, okeni na opha akɔ ɓoombia, ɓokutú, na ɓukpɛkpɛ. Nga, oɓɛ aámbé ɗóconji kema bui, Ka nyɔngɔ á mɔphɛ nɛkɔ aunge, kema bui ɓácɔnji na a ɓei.»