Mphaniɔ 22 - Ɔngana á Kɛ̌kɛ

¹ Mpɔ, malaéka ndɔ, aómophangia oɓenge á enda n'aophénuaga ɓea ngaɛ́, áojuana ka kankaanga ndea Mokonga na Muna-mɔgɔgɔ.

² Oɓenge ndɔɔ ɗáoyoka ka měme á aphe á ntanga-nji. K'ɔɓɛɛ á oɓenge ndɔ nkɛkɛɔ bui, me á enda a ɓei, aɔgɔmbisa mɔngɔ nkama na iɓɛ (12) ka saga, ande gea te, mɔngɔ ímoci ka songe. Kasa í aoenga ka amisa á ɓato á mokonda.

³ Ka kema ka Mokonga sɛmɛaga í ka ntanga-nji ndɔ, kaɓɛku ye. Kankaanga á kɔkɔta ndea Mokonga na nnde á Muna-mɔgɔgɔ aɓande suɓi á ntanga-nji ndɔɔ. Ɓabɛɗanigi ndea Mokonga ɓámbebande.

⁴ Ɓáɔnande keongi akɛ. Ɓáɗunduande ina akɛ k'éndóndó aɓɔ.

⁵ Keiphe káɓɛeka ye na ɓákáɓɛku ye na siki á owanga á maní n'índe á ɔbɛa nga, Mɔkɔta Mokonga aɛmbisande owanga nɛkɛ gǔ aɓɔ. Ɓámameande nji ka saga na saga.

Yéso abikande

⁶ Mpɔ malaéka áomongoɗea te: «Nyɔngɔ nde ande á seɓea í nga, ande ɗoni. Mɔkɔta Mokonga mmbé Měma akɛ ɗáɔ̌sɔndɔɛa ɓaɔtu-nyɔngɔ nɛkɛ, yɛ aámbé anteki malaéka nɛkɛ gea, ágɛ áephangiɛgɛ ɓabɛɗanigi nɛkɛ nyɔngɔ nde aobika kɛ̌kɛnde.»

⁷ Yéso áɔyɔnga te: «Ɔ́kani phɔ́! Neobika kɛ̌kɛnde. Maseye ka nkpa nde aoamba nyɔngɔ nde ɓaɔtu-nyɔngɔ ndea Mokonga ɓáɔtú suɓi á ɓuku ndee.»

⁸ Eme Yoáni aámbé ɗɛ́ɔ́ki nyɔngɔ ndɔ na ɔna í. Mbusa á ɔna na ɔ́ka í, néogbúka muanku mosá á malaéka nde ɗámophangi nyɔngɔ ndɔ ka beba akɛ.

⁹ Yɛ, â gǎkɛ omongoɗea te: «Caa! Kógeɛmbɛ ɓó! Nga, eme nende mbɛɗanigi ɓea ɔɓɛ, ɓea ɓadakɔ ɓaɔtu-nyɔngɔ ndea Mokonga na ɓea ɓɔbu ɓunde ɓáotétemisa nyɔngɔ nde a suɓi á ɓuku ndee. Mokonga ndiu aámbé ómbebɛ.»

¹⁰ Mpɔ, áomongoɗea te: «Kɔsɔmɛɛ mɔnɔ nyɔngɔ nde ɓáɔtú suɓi á ɓuku ndee. Nga, mbenɔ átɔtɔkɛana á nyɔngɔ ndɔ, abîmani.

¹¹ Nto-ajeɗe ásuiɛ tɔ ɓojeɗe nɛkɛ, nto á jɔɔkana ásuiɛ tɔ jɔɔkana nɛkɛ, nto-anjánjá gǎkɛ ásuiɛ tɔ gea ánjá na nto á kanga ɓojeɗe ásuiɛ tɔ ika kángá á ɓojeɗe.»

¹² Yéso áɔyɔnga te: «Cɔ, neobika kɛ̌kɛnde! Nebikande n'ophendɔ ka phenda nkpa na nkpa ka ɓeana na nnde ɗági.

¹³ Nende Alpha na Ɔmɛga, Nkpangeɔ na Sungiaga, nto á k'ama mosá-mosá na nto á ka sungiaga.»

¹⁴ Maseye ka ɓundɔ ɓásokosi bɔngɔ nɛɓɔ ka gea te, ɓáesoseɛ ea á mbuka á me á enda na ngia ka kǐo suɓi á ntanga-nji.

¹⁵ Ɓunde ɓájigande gǎkɛ ka nsɛngɛ ɓáungee: Ɓambwa, ɓakume, ɓato á jɔɔkana, ɓato á kaiso, ɓato á gbukiaga tɔnkɛngɛ muanku na ɓato á yɔnga á mbɛa na konda í.

¹⁶ «Eme Yéso, nentekima malaéka nɛmɔ ka úbisa anu nyɔngɔ ndɔ bui ka kanisa ɗanga-ɗanga. Neɓɔkɔtɛani k'ékombo ndea Moamɛ Daúdi, Sɛɛngɔa á bɛnya á kamɓimba.»

¹⁷ Měma á Mokonga na Nke-éyamani ɓáɔyɔnga te: «Bika!» Mmbé aɔ́ki, áyɔngɛ phɔtɔ: «Bika!» Mmbé a n'ɛnyɔta, ábikɛ, mmbé ana siki á iɓo á enda ábɛɗɛ ecici.

Nyɔngɔ á ka sungiaga

¹⁸ Eme Yoáni, nenóngoɗi ɓakpa ɓɔbu ɓunde ɓɔɔmɔɔ́ka gea, ɔ́ɛnjiani ánjá ka phɔa nyɔngɔ nde ɓáɔtú suɓi á ɓuku ndee. Aoɓá nkpa n'adaɗu nyɔngɔ nɛngbo gǔ índe, Mokonga andaɗoeande tambaga nde ɓáɗundu suɓi á ɓuku ndee.

¹⁹ Aoɓá nkpa n'aphúi ka nyɔngɔ nde a suɓi á ɓuku nde á ɓaɔtu-nyɔngɔ ndea Mokonga, Mokonga aphúiande phɔtɔ ka keɓu ínɛkɛ á mbuka á me á enda na á ntanga-nji á kanga ɓojeɗe ɓíndɔ a suɓi á ɓuku ndee.

²⁰ Mmbé amamei nyɔngɔ á suɓi á ɓuku ndee, ayɔngi ɓe: «Eya, neobika kɛ̌kɛnde.» Áɓɛ ɓó, Mɔkɔta Yéso, bika!

²¹ Cɔ, ɓonjánja-ékondi ndea Mɔkɔta Yéso áɓɛ kimoci na ɓenu ɓɔbu!