Mphaniɔ 21 - Ɔngana á Kɛ̌kɛ

Koba á kɛ̌kɛ na mokonda á kɛ̌kɛ

¹ Mpɔ, nɛ́ɔɔna koba á kɛ̌kɛ na mokonda á kɛ̌kɛ nga, koba á kala na mokonda á kala, ɗándǐ. Oɓenge ɗákátú ye ɓei.

² Néɔɔna ntanga-nji á kanga ɓojeɗe, Yɛusalɛ́ma á kɛ̌kɛ n'aodida ka toka na koba mɔtɛ á Mokonga n'aɛphɔni ɓea nke n'aomɓondeaga munyakɛ.

³ Nɛ́ɔɔ́ka ɛsɔ akpɛ n'aotóka ka kankaanga á kɔkɔta na koba áɔyɔnga ɓe: «Ɔma á ɓoiki ndea Mokonga a ye tɔ sɔsɔɓɛ á ɓakpa. Yɛ, aikande kimoci na ɓɔ, ɓáoɓá ɓakpa nɛkɛ. Mokonga sasakɛ, aɓande Mokonga nɛɓɔ, áoɓá kimoci na ɓɔ.

⁴ Akɔmbɛande iɓo á ngamɔ bui á k'íso aɓɔ. Kukuwa, oiɔ, ngamɔ, ɛyɔka káɓɛku ye nga, mokonda á kala ɗándǐ.»

⁵ Cɔ, mmbɔ aiki ka kankaanga á kɔkɔta áɔyɔnga te: «Nɛɓɔngisigi ye tɔ kema bui á kɛ̌kɛ.» Áomongoɗea gea: «Ɗundua nyɔngɔ nde nga, Mbino nɛmɔ aánjá áoɓá á ɗoni á ɗoni.»

⁶ Â goto ɔyɔnga gea: «Así! Eme nende Alpha na Ɔmɛga, nkpangeɔ na sungiaga. Mmbé ana ɛnyɔta, nemophande kema á noa ecici ka ntogɔ á iɓo á enda.

⁷ Mmbé akíndande, nenkɔmande, neɓande Mokonga nɛkɛ, yɛ áoɓá miki-mǒko nɛmɔ.

⁸ Ka ɓato á kɔɓɔɓɔkɔ, ɓato á kanga ɓeekea, ɓato á jɔɔkana, ɓato á kaiso, ɓato á iɛɓɛ, ɓato á ɓiji-ɓiji, ɓato á gbukaga muanku aɓɔ mosá á tɔnkɛngɛ na ɓato á mbɛa gǎkɛ ɔma nɛɓɔ ande k'ɛɛmbɛ á nsa n'ande kukuwa á mongɔ á ko iɓɛ.»

Yɛusalɛ́ma á kɛ̌kɛ

⁹ Ka Ɓamalaéka ndea Mokonga ngianjaga iɓɛ (7), ɓundɔ ɗáɓábɛɗi cǎ n'atúmi na tambaga á sungiaga ngianjaga iɓɛ (7) áobika omongoɗea gea: «Bika, nekophangiande nke á mbanje, nke-éyamani ndea Muna-mɔgɔgɔ.»

¹⁰ Mpɔ, Měma á Mokonga áɔmɔgɔna, malaéka ndɔ áomokumba súa ntɔnga á mamba éndǎ phɛɛ. Áomophangia ntanga-nji á kanga ɓojeɗe, Yɛusalɛ́ma, n'aodida ka toka na koba mɔtɛ á Mokonga.

¹¹ Ntanga-nji kau áophenuaga ka ɓophombia ndea Mokonga. Owanga á ntanga-nji áoɓá ɓea ɛtɛ á esombi akpɛ, Yáspi nnde áɔbɛnya ɓea ngaɛ́.

¹² Áoɓá na ɓǔkendu ángbó nde atáí k'égo phɛɛ na kǐo nkama na iɓɛ (12). Ɓamalaéka ndea Mokonga nkama na iɓɛ (12) ɗáɓáoɓondeaga kǐo ndɔɔ. Ɗáɓáɗundu gǔ á kǐo kau, ina á ekuna nkama na iɓɛ (12) ndea Ɓaisilaɛ́li.

¹³ Nci á n'okomo ɗátú na kǐo isaɔ, oyonga kǐo isaɔ, gǔ kǐo isaɔ na kusi kǐo isaɔ.

¹⁴ Ɗáɓáphɛ̌ki moguɓɔ á ntanga-nji ndɔ gǔ á ɛtɛ nkama na iɓɛ (12) nnde ɗáɓáɗundu gǔ í, ina á ɓateki nkama na iɓɛ (12) ndea Muna-mɔgɔgɔ.

¹⁵ Malaéka ndea Mokonga mmbé ɗɛ́ɓɛɔyɔnga na yɛ, ɗábɛɗi ngbángá á láté ka pima ntanga-nji, kǐo í na ɓǔkendu í.

¹⁶ Ntanga-nji ndɔ, ɗátú mulába: Ɓondanda í na ɓogbae í ɗátú tɔ osungiana. Malaéka ndea Mokonga áopima ntanga-nji na ngbángá ndɔ, áoɓá mɛ́tɛɛ ɛlɛphu iɓɛ na mia gena (2.400): Bɔ́mbɔa í, gbaemana í na ɓondanda í ɗátú tɔ osungiana.

¹⁷ Malaéka ndea Mokonga áopima ɓǔkendu ndɔ, bɔ́mbɔa í áoɓá mɛ́tɛɛ nkama ngianjaga (60) ɓíndɔ ɓakpa ɓámôpima n'índe malaéka ɗáobɛɗaneaga.

¹⁸ Ɗáɓáphɛ̌ki ɓǔkendu ndɔ na Yáspi. Ntanga-nji sasakɛ áoɓá jǎi á láté n'aophénuaga ɓea ngaɛ́.

¹⁹ Ɗáɓátɔndí ɛtɛ nde ɓáɔphɛka moguɓɔ á endu gǔ í n'etéte bui á ɓ'ɛtɛ ésombi akpɛ: Á k'ama mosá-mosá, Yáspi. Á ko iɓɛ, Saphílɔ. Á ko isaɔ, Kalɛdɔ́ni. Á ko gena, Ɛmɛlɔ́dɛ.

²⁰ Á ko ɓɔku, Sadɔníki. Á ko ngianjaga, Akíki. Á ko ngianjaga iɓɛ, Kisolítɛ. Á ko ngianjaga isaɔ, Bɛlúlɔ. Á ko ngianjaga gena, Tɔpájɔ. Á ko nkama, Kisopaájɔ. Á ko nkama na moci, Aikíntɔ. Á ko nkama na iɓɛ, Ametístɔ.

²¹ Kǐo nkama na iɓɛ (12) ndɔ ɗátú ɛtɛ nde ɓáɔɔphana nsángá, nkama na iɓɛ (12). Kǐo moci áoɓá nsángá moci. Ntanga-nji áoɓá jǎi á láté n'aophénuaga ɓɛa ngaɛ́.

²² Ɗɛ́kɛ́ɔni gǎkɛ endu ɛ́mɛmi ka ntanga-nji ndɔ nga, Mɔkɔta Mokonga, Mɛna-ɓukpɛkpɛ na Muna-mɔgɔgɔ ɓáunge ɓánde ú.

²³ Ntanga-nji ndɔ, ɗákátú na ɓuyɛnɛ á maní na songe nga, ɓophombia ndea Mokonga aunge ɗáojegia na Muna-Mɔgɔgɔ áɔbɛnya ɓea ɔbɛa.

²⁴ Ɓato á ka mokonda ɓátambeande owanga nɛkɛ na ɓaamɛ á ka mokonda ɓábikande n'ɛtɔi nɛɓɔ suɓi í.

²⁵ Kǐo á ntanga-nji ndɔ ajigande base mbenɔ bui nga, keiphe káɓeɛka ye ɓei.

²⁶ Ɓábikande na ɓophombia na ɛtɔi á ka mokonda suɓi í.

²⁷ Ka kema ájeɗe-jeɗe kángieɛka gǎkɛ suɓi á ntanga-nji ndɔɔ. Nto á ɓɔjɔɔkiɔ na mbɛa, nnaɔtɔka n'angí suɓi í, tɔndɔ ɓundɔ ɓáɗundu ina aɓɔ suɓi á ɓuku á enda ndea Muna-Mɔgɔgɔ.