Mphaniɔ 20 - Ɔngana á Kɛ̌kɛ

Kpeengeana á ɓasaga ɛlɛphu moci (1.000)

¹ Mpɔ, Nɛɔmɔna malaéka ndea Mokonga n'aodida ka toka na koba, n'abɛɗi phembekete á mininga na ngoi á ngɔa átete.

² Áondunga njɔka angbóngbó, njɔka á kala n'ande nketi ímbɔ Sɛtáni, áomɓóaga ka ɓasaga ɛlɛphu moci (1.000).

³ Malaéka ndea Mokonga ndɔ, áommaka suɓi á mininga, áophembeketea ú na ɓɛta á mutúti gǔ akɛ ka gea te, njɔka ndɔ kaetombɛgɛmbɛ ye ɓato á ka mokonda na ka ɓî ɓasaga ɛlɛphu moci (1.000) akpeengeanaeka. Mbusa índɔ, ɓánkoɗande ka mbenɔ ábɔa.

⁴ Mpɔ nɛ́ɔɔna kankaanga á kɔkɔta. Ɓunde ɗáɓáoikiɗia ú, ɗáɓátɔi kɔkɔta á tena á nyɔngɔ. Nê phɔtɔ ɔɔna měma á ɓunde ɗáɓáeteni ka nyɔngɔ nde Yéso ɗáengekisi na Mbino-Ánjá ndea Mokonga. Ɓɔ, ɗáɓákágbúki muanku aɓɔ mosá á nyama kaɓɛ tɔnkɛngɛ akɛ. Ɗáɓákábisi phɔtɔ mphangiɔ á nyama ndɔ k'éndóndó kaɓɛ ka njaga aɓɔ. Ɓɔ, ɓáunge ɗáɓájujúki ka kukuwa, ɓáomamea nji kimoci na Kiísito suɓi á ɓasaga ɛlɛphu moci (1.000).

⁵ Ɓasí ɓuangbo ɗáɓákájujúki gǎkɛ mosá á kpeengeana á ɓasaga ɛlɛphu moci (1.000). Cɔ, nndɔ ande jujúka á k'ama mosá-mosá ka kukuwa.

⁶ Maseye phɛɛ ka ɓunde ɓáɓande ka mɔɔmba á jujúka á k'ama mosá-mosá ka kukuwa. Kukuwa á ko iɓɛ nna na ɓukpɛkpɛ gǔ aɓɔ. Ɓáɓande ndiu ɓatoɓeigi-phɛ́a na Kiísito. Ɓámameande nji kimoci na yɛ suɓi á ɓasaga ɛlɛphu moci (1.000).

Tugbanaga á Sɛtáni

⁷ Mbenɔ nde ɓasaga ɛlɛphu moci (1.000) akpeengeanande, aunge ɓánjuanisande Sɛtáni suɓi á mekakɔ.

⁸ Yɛ, agande k'aphe á tombaga ɓakpa ɓunde ɓá nkɛkɛɔ gena á mokonda ande gea te: Gogi na Magogi. Aedondanisagande ɓakpa ndɔ ka nyɔngɔ émani na ɓáɓikande ɓea mbúme á k'óɓenge.

⁹ Ɓáoɛmba mokonda bui, ɓáotimba endu á ɓato á kanga ɓojeɗe, ntanga-nji nde Mokonga ɗáseɓei. Nsa â gǎkɛ otóka na koba, áǒgoga.

¹⁰ Mpɔ, nketi mmbé ɗáedemigi, ɓáommaka k'ɛɛmbɛ á nsa kuɓî ɗáɓáemaki nyama na mɔtu-nyɔngɔ á mbɛa. Ɓátambagande kó keiphe n'esa nkongopha na nkongopha.

Tena á nyɔngɔ á ka sungiaga

¹¹ Mpɔ, nɛ́ɔɔna kankaanga ángbó á kɔkɔta ábu na mmbé ɗáikiɗíí. Koba na mokonda, áondia mosá akɛ kaɔnɛkanɛ ye,

¹² nɛ́ɔ̌ɓɔna ɓasí, ɓagbɛga na ɓaniki na ɓámamege mosá á kankaanga á kɔkɔta. Ɓuku á enda áoúkukana base. Ɓáotena nyɔngɔ á ɓasí ka ɓeana na nnde ɗáɓági ɓíndɔ ɗáɓáɗundu suɓi á ɓuku á enda.

¹³ Oɓenge áǒjuanisa ɓasí ínɛkɛ. Kukuwa na nji á ɓasí ɓáǒjuanisa ɓasí íɓuaɓɔ. Ɓáotena nyɔngɔ á nkpa na nkpa ka ɓeana na nnde ɗági.

¹⁴ Ɓáǒmaka kukuwa na nji á ɓasí k'ɛɛmbɛ á nsa, nnde ande kuwa mɔngɔ á ko iɓɛ.

¹⁵ Ɗáɓáemaki ka ɛɛmbɛ á nsa, ɓakpa ɓɔbu ɓunde ɗáɓákáɗundu ina aɓɔ suɓi á ɓuku á enda.