Mphaniɔ 2 - Ɔngana á Kɛ̌kɛ

Múbisɔ ka kanisa á ka Ɛphɛ́sɔ

¹ Nɗunduia malaéka á kanisa á ka Ɛphɛ́sɔ ɓe: Mmbé ɛ̌bɛɗi ɓasɛɛngɔa ngianjaga iɓɛ (7) ka njaga akɛ á mǔku, n'aotamba sɔsɔɓɛ á tɛta á ɔbɛa ngianjaga iɓɛ (7) á láté ayɔngi ɓe:

² Neoúba ekuma nɛkɔ, na tambea nɛkɔ, na phiphia á tambaga nde ophiphíí. Ne phɔtɔ oúba gea kɔ́ɔtɔka n'ogamani na ɓato á ɓojeɗe. Ɗóǒtombigi ɓunde ɗáɓáǒgea sasaɓɔ, ɓánde ɓateki na ɓáká gǎkɛ ɓateki, ɗóǒɓúbi gea, ɓánde ɓato á mbɛa.

³ Eya! Ona měma á phiphia, otambigi ka nyɔngɔ á ina ani, kángá ɛla.

⁴ Cɔ, nyɔngɔ nde ne gǎkɛ ně ka phɔakɔ a ɓe: Kó ye omokonda ɓíndɔ ɗômokonda mosá.

⁵ Cɔ, kanisia phɔ́ tambea akɔ á mosá, kɛ̌kɛnde gǎkɛ, ogu. Cɔ, kětia tambea akɔ ájeɗe, ótambeɛ ɓíndɔ ɗótú otambea mosá. Kaɓɛ na kókěti tambea akɔ ájeɗe, ámbé nekobikiande, néophúia ɔbɛa nɛkɔ k'ɔ́ma í.

⁶ Kema nde a gǎkɛ ánjá k'óɓɛ a ɓe: Okangei ekuma ndea Ɓanikɔlái, ɓíndɔ eme nekangei phɔtɔ ú.

⁷ Cɔ, mmbé ana kecue, áɔ́kɛ nyɔngɔ nde Měma á Mokonga angoɗi kanisa bui. Mmbé akíndande, nensoseande gea, áeɛ mbuka á me á enda, nnde a ka Paadísɔ ndea Mokonga.

Múbisɔ ka kanisa ndea ka Smúna

⁸ Nɗunduia malaéka á ka kanisa ndea ka Smúna ɓe: Mmbé ande Nkpangeɔ na Sungiaga, mmbé ɗáku, áojujuka ka kukuwa, ayɔngi ɓe:

⁹ Neoúba tambaga na ɓuyɛnɛ nɛkɔ, o gǎkɛ ntɔi! Ne phɔtɔ oúba kitɔngi á mbɛa nde ɓunde ɓáǒgea sasaɓɔ ɓánde Ɓayúda na ɓáná Ɓayúda ɓáɔkɔtɔnga. Ɓatɔngi ndɔ, ɓá ndiu madondanɔ á ɓakpa nde ɓamɓeeki Sɛtáni.

¹⁰ Cɔ, koɓangɛmbɛ gǎkɛ tambaga nde akodondande. Ka nyɔngɔ nde, Nketi aemakeande ɓakpa ɓuangbo sɔsɔɓɛ anu ka mekakɔ ka tombaga anu. Akondi engekisa á ɓukpɛkpɛ á ɓeekea nɛnu. Otambagande gǎkɛ ɓ'esa nkama (10). Cɔ, ɓá tɔ mɓêki á ɗoni na ɓî ogande okuwa, na eme, nɛkɔkɔmande na kekombó á enda á mɛyɔ.

¹¹ Cɔ, mmbé ana kecue, áɔ́kɛ nyɔngɔ nde Měma á kanga ɓojeɗe angoɗi kanisa bui! Mmbé akíndande, kákuwɛku ye ka mɔngɔ á ko iɓɛ.

Múbisɔ ka kanisa ndea ka Pɛɛgámɔ

¹² Nɗunduia malaéka á ka kanisa ndea ka Pɛɛgámɔ ɓe: Mmbé ana píndí nde aophea nci gbɔgbɔ ayɔngi ɓe:

¹³ Neoúba ɔma nde oiki. Wa unge ande kankaanga á koɓoamɛ ndea Sɛtáni. Nanga a ɓó, otétemisi tɔ ɓeekea ani kángá á ngana á ɓeekea ndɔ. Oɓɛ, kóɗeketi ɓeekea ani mbenɔ nde ɗáɓámowe Antípa, nɗigimisi nɛmɔ á ɗoni mɔtɛ-anu, ɔma nde Sɛtáni aiki.

¹⁴ Cɔ, ne gǎkɛ na oyeyɔ ábɔa k'óɓɛ: Mɔtɛ-akɔ, ona ɓakpa nde ɓáɓeeki ɓɔphɛi ndea Baláma. Baláma aámbé ɗángoɗi Baláka ábisɛ ephiphi ájeɗe ka Ɓaisilaɛ́li ka ɓɔnga aɓɔ gea, ɓáeɛ nyama nde ɓáphúi ka phɛ́a á ɓamokonga á mbɛa, na ɓágɛ k'aphe ótungɔ.

¹⁵ Ɔ phɔtɔ mɔtɛ-akɔ na ɓakpa nde ɓáɔtɔtɔkisa ɓɔphɛi ndea Ɓanikɔlái.

¹⁶ Cɔ, kětiani tambea anu. Kaɓɛ na nna ɓó, nekamisagande bika á mɔtɛ-anu, néomana na ɓakpa ndɔ na píndí ndɔ aotóka k'aphenɔkɔ ani.

¹⁷ Cɔ, mmbé ana kecue, áɔ́kɛ nyɔngɔ nde Měma á Mokonga angoɗi kanisa bui! Mmbé akíndande, nemophande mana nde ɗɛ́sɔmi. Nemophande phɔtɔ ɛtɛ ábu, na neɗundu ina á kɛ̌kɛ gǔ í, nnde nkpa ɓaangbo nnaoúba na nna tɔndɔ mmbé ɓámophi ú.

Múbisɔ ka kanisa ndea ka Tuatɛ́a

¹⁸ Nɗunduia malaéka á ka kanisa ndea ka Tuatɛ́a ɓe: Muna-Mokonga mmbé iso akɛ aɔbɛnya ɓea owanga á nsa, ecinji akɛ aophenuaga ɓea ngɔa nde ɓáphɔni ánjá phɛɛ, ayɔngi gea,

¹⁹ neoúba ekuma nɛkɔ, ekondi nɛkɔ, ɓeekea nɛkɔ, tambea nɛkɔ, na phiphia á tambaga nɛkɔ. Neúbi phɔtɔ gea ǒyamei ka bɛɗaneaga ani kɛ̌kɛnde kɔnyɛ́nya mosá.

²⁰ Cɔ, ne gǎkɛ na oyeyɔ k'óɓɛ. Oomɓɛya nke ndɔ Yɛjɛbɛ́li gea ábɛɗanɛgɛ, mmbé aɔyɔnga sasakɛ gea, ande nke mɔtu-nyɔngɔ ndea Mokonga. A gǎkɛ ɔ̌phɛa ɓabɛɗanigi nɛmɔ na ɓungisaga aɓɔ k'aphe ótungɔ, na ea á nyama nde ɓáphúi ka phɛ́a á ɓamokonga á mbɛa.

²¹ Ɗémophi mbenɔ ka gea ákětiɛ tambea akɛ ájeɗe, nna gǎkɛ okonda ɗeketa nyɔngɔ á iɛɓɛ.

²² Kaɓondɔ, yɛ na ɓadakɛ ɓato á iɛɓɛ, němakande k'éka á tambaga á ngobo, aoɓá na ɓákákěti tambea nɛɓɔ ájeɗe.

²³ Kaɓɛ na ɓákáɗeketi, němowande ɓakpa nde ɓágamani na yɛ. Mpɔ, ɓato á ka kanisa ɓɔbu ɓáúbande gea, neoengekisa mɔphɛ á ɓakpa na kanisia aɓɔ. Úbani gea, nemphendande nkpa na nkpa sɔsɔɓɛ anu ka ɓeana na tambea akɛ.

²⁴ Cɔ, ka ɓenu ɓato á ka kanisa á ka Tuatɛ́a, ɓunde ɓókótóɓeeki ɓɔphɛi ndea nke ndɔ Yɛjɛbɛ́li, na ɓókóoúba kema nde ɓakpa ndɔ ɓáɔɔphana ‹kema á ɓɔsɔmɛa ndea Sɛtáni›, nenóngoɗi gea, kénokumbisɛku nkumba nɛngbo.

²⁵ Ambani ndiu tɔ ánjá nyɔngɔ nde ɓo kau na ka ɓî nejaeka.

²⁶ Nkpa nde atɔkande tambaga ndɔ, na tambea ɓíndɔ nekondi, ka sungiaga nemophande kɔkɔta gǔ á ekuna bui.

²⁷ Nkpa ndɔ abɛɗanagande na kɔkɔta ndɔ na ɓukpɛkpɛ phɛɛ, ɓíndɔ ɓáobomaga mbeka-toko.

²⁸ Cɔ, ɓondɔ unge eme phɔtɔ, ɗɛ́tɔi kɔkɔta mɔtɛ-Abɛ. Nemophande phɔtɔ sɛɛngɔa á kamɓimba.

²⁹ Cɔ, mmbé ana kecue, áɔ́kɛ nyɔngɔ nde Měma á Mokonga angoɗi kanisa bui.