Mphaniɔ 19 - Ɔngana á Kɛ̌kɛ

¹ Mbusa índɔ, nɛ́ɔɔ́ka ógoma ɓea ógoma á ɓakpa ɓásii na koba áogea: «Obebɔ ka Mokonga nɛsu! Yɛ ande mɛna-ɓoamia, ɓophombia na ɓukpɛkpɛ.

² Aotena nyɔngɔ ka koɗoni kángá oɓayɔ. Atenima nyɔngɔ á nke á iɛɓɛ akpɛ mmbé ɗátoɓu mokonda na iɛɓɛ nɛkɛ. Áogisia nyɔngɔ á magia á ɓabɛɗanigi nɛkɛ ka nke ndɔɔ.»

³ Ɓâ goto ɔyɔnga: «Obebɔ ka Mokonga nɛsu! Maki á abambongo-mbongo á ntanga-nji nde asiɗima aophúphuta ka saga na saga!»

⁴ Ɓagbɛga nkama iɓɛ na gena (24), na econji á enda gena, ɓáogbúka muanku mosá á Mokonga ka ɗokomisa akɛ ɓî aiki ka kankaanga á koɓoamɛ. Ɓáɔyɔnga: «Mokonga áɓɛ n'obebɔ, áɓɛ ɓó!»

⁵ Ɛsɔ áotóka ka kankaanga á koɓoamɛ, áogea: «Mbebani Mokonga nɛsu, ɓenu ɓabɛɗanigi nɛkɛ ɓɔbu, ɓenu íɓunde ɓoomɓánga, ɓato á koomba na ɓato á jǎi-jǎi.»

⁶ Mbusa, nɛ́ɔɔ́ka eongo ɓea ɓakpa ɓásii, n'aɔɔya ɓea gɔa, ɓea ɓáoka á mbua. Áogea: «Obebɔ ka Mokonga nɛsu! Nga, Mɔkɔta nɛsu Mokonga, Mɛna-ɓukpɛkpɛ, amamei nji bui.

⁷ Ɓéguɛni jaí na maseye. Ɓénɗokomiseni nga, mbenɔ éyamani á Muna-mɔgɔgɔ akpeengeani. Nke éyamani nɛkɛ ɛ̌ɓɔngisigi.

⁸ Ɓáomopha bɔngɔ ánjá phɛɛ ka ɔ́la í, n'aophenuaga.» [Bɔngɔ ndɔ, ande mphangiɔ á tambea ánjá ndea ɓato á kanga ɓojeɗe.]

⁹ Mpɔ, malaéka ndea Mokonga áomongoɗea te, néɗunduɛ: «Maseye ka ɓundɔ ɓáɛɓɔphani ka jaí ɛ́kɛka ndea Muna-mɔgɔgɔ.» Â goto ɔyɔnga: «Nndɔ ande nyɔngɔ á ɗoni nnde atóki mɔtɛ á Mokonga.»

¹⁰ Mpɔ, néogua k'écinji akɛ ka beba akɛ. Â gǎkɛ omongoɗea te: «Kógeɛmbɛ ɓondɔ nga, ne tɔ ka ɓenu ɓabɛɗanigi ande gea te, oɓɛ na ɓana-amakɔ ɓunde ɓáɗigimisi nyɔngɔ á ɗoni ndea Yéso. Mokonga aámbé oɓande ombeba nga, nyɔngɔ nde Yéso aoɗigimisa, ande cina á měma á ɔtɔa á nyɔngɔ.»

Nto-émani akǎmbi gǔ á phalási abúbú

¹¹ Mpɔ, nɛ́ɔɔna koba n'akoɗokani. Phalási abúbú áɔsɛnɛka. Mmbé akǎmbi gǔ akɛ ɓáɔmɔphana Mɓêki na Nto á ɗoni nga, aotena nyɔngɔ na mana ka koɗoni.

¹² Iso akɛ ɗáɔbɛnya ɓea ɛɛmbɛ á nsa. Ɗáɔ́li kekombó á koɓoamɛ ásii ka mɔ̌ akɛ. Ɗáɓáɗundu ina gǔ akɛ. Yɛ sasakɛ tɔndɔ aámbé ɗáúbi ú.

¹³ Ɗáɔ́li ngɔ́mbɛ nde ɗáúphani na magia. Ina akɛ: Mbino á Mokonga.

¹⁴ Ekombo á ɓato émani á na koba, ɓáomɓea na ɓákǎmbi gǔ á ɓaphalási ɓábúbú na ɓáɔ́li bɔngɔ ánjá na abúbú.

¹⁵ Píndí á ophea áojuana k'aphenɔkɔ akɛ, nnde amanisande nji ně. Yɛ, amameande nji ka ɓukpɛkpɛ á ngɔa na akámande mbuka ka kasangɔ n'esúia ndea Mokonga Mɛna-ɓukpɛkpɛ bui.

¹⁶ Ɗáɓáɗundu ka bɔngɔ nɛkɛ na ka kɛbɛ akɛ ina ndee: «Moamɛ ndea ɓaamɛ na Mɔkɔta ndea ɓakɔta.»

¹⁷ Mbusa, Nɛɔmɔna malaéka ndea Mokonga moci n'amame ka maní. Áǒkogea akpɛ ɓambǔ ɓɔbu ɓunde ɗáɓáoyaa ka mpɛna k'égo phɛɛ te: «Bikani, ɓódondanɛgɛ ka jaí ángbó ndea Mokonga.

¹⁸ Ɓóegɛ kesuku á ɓaamɛ, ɓakɔta á ɓato émani na ɓato émani, nnde á ɓa phalási na ɓunde ɗáɓáokambeaga gǔ aɓɔ, nnde á nkpa buakɛ nkɔɓɛ, mmbé nna nkɔɓɛ, miki na ngbɛga.»

¹⁹ Mpɔ, Nɛɔmɔna nyama, ɓaamɛ á ka mokonda n'ekombo á ɓato émani nɛɓɔ na ɓádondanigi ka manisa á mmbɔ ɗákǎmbi gǔ á phalási na ekombo á ɓato émani nɛkɛ.

²⁰ Ɓɔ, ɓâ gǎkɛ ondunga nyama ndɔ kimoci na mɔtu-nyɔngɔ á mbɛa mmbé ɗátɔtɔkisi ketangaɔ mosá akɛ, ka dema á ɓundɔ ɗáɓátú na mphangiɔ á nyama na ɗáɓáogbúka muanku aɓo mosá á tɔnkɛngɛ akɛ. Nyama, na mɔtu-nyɔngɔ á mbɛa, ɓáǒmaka suɓi á ɛɛmbɛ á nsa na ɓáoenda.

²¹ Ɓáǒma ɓunde ɓájigi na píndí nde ɗátóki k'aphenɔkɔ á mmbé ɗákǎmbi gǔ á Phalási émani. Ɓambǔ ɓɔbu ɓáoisana na kesuku aɓɔ.