Mphaniɔ 18 - Ɔngana á Kɛ̌kɛ

Babɛli angbɔɔkani

¹ Mbusa á wa, nɛ́ɔmɔna malaéka ndea Mokonga ɓaangbo n'aodida ka toka na koba. Ɗátú na kɔkɔta ángbó phɛɛ. Ɓophombia akɛ ɗátú ɔbɛnya ka mokonda bui.

² Áoúmba nkogɔ: «Abambongo-mbongo á Babɛli agú áosikia gúá. A ye tɔ ɔma á ɓoiki ndea ɓaketi ɓɔbu na ɓansombo. Ande phɔtɔ ɔma á ɓambǔ ɓɔbu á jɔɔkana na inyɛ́.

³ Nga, ɓato á ka mokonda bui ɗáɓánu makana akae á mambɔ nɛkɛ. Ɓaamɛ ɓɔbu á ka mokonda ɗáɓánɗege ně na ɓasombisigi nkumba á ka mokonda ɗáɓáegani ka nyɔngɔ á ɛtɔi nɛkɛ ásii.»

⁴ Mpɔ nɛ́ɔɔ́ka ɛsɔ nɛngbo n'aotóka na koba áogea: «Tókani ka ntanga-nji ndɔɔ ɓenu ɓakpa nɛmɔ ka gea te, ɓókoúphanɛmbɛ na ɓojeɗe nɛkɛ na kambekana na kema nde ankambande.

⁵ Nga, ɓojeɗe nɛkɛ atúmi súa na koba na Mokonga ɗákáɓosei kema ájeɗe-jeɗe nɛɓɔ.

⁶ Ngeani tɔ sumɓî ɗáegi ɓakpa ɓunɛngbo. Mphendani mɔngɔ iɓɛ k'índe ɗági. Káisani makana á ka cǎ nɛkɛ mɔngɔ iɓɛ kɔnyɛ́nya nndɔ ɗáǒnusa ɓakpa.

⁷ Ɓea ɓî ntanga-nji ndɔ ɗátú na ɓoombia n'ɛtɔi, akeni ɓóntambisɛgɛ na áɓɛ n'oiɔ ɓíndɔ ɗátú na ɓoombia n'ɛtɔi. Yɛ aǒgea sisakɛ gea: Neiki ka kankaanga á koɓoamɛ ɓea moamɛ-nke. Ké nke á kekusa na kékusanɛeka tanda.

⁸ Kaɓondɔ unge atambagande k'ésa moci, áoɓá na kukuwa akpɛ, nja, n'oiɔ. Yɛ, asiɗande ka nyɔngɔ nde, Mɔkɔta Mokonga ana ɓukpɛkpɛ ka tena á nyɔgɔ nɛkɛ.»

⁹ Ɓaamɛ á ka mokonda, ɓunde ɗáɓátungani na ntanga-nji ndɔ, na boma á kpɔngbɔ n'eɗáka na yɛ, ɓátoande ntaɓo na toɓokea á ngamɔ ka phɔakɛ, ɓî ɓáɔnande maki á siɗa á ntanga-nji.

¹⁰ Ɓámamande ɗanga ka ɓánga tambaga akɛ. Ɓáɔyɔnga: «Ngomi ee! Ngomi á mokongo á ntanga-nji Babilɔ́ni, ntanga-nji akpɛ. Ka mbenɔ moci tɔ unge ɓáteni nyɔngɔ nɛkɔ kau.»

¹¹ Ɓasombisigi nkumba á ka mokonda ɓáianagande na gáma nga, nna tanda na nkpa nde asombande nkumba nɛɓɔ,

¹² láté, ngɔa, ɛtɛ ésombi akpɛ, ɛtɛ nde ɓáɔɔphana nsanga, bɔngɔ áphǒ-phǒ, bɔngɔ ɗanga-ɗanga ánjɛ na á ko índa, gáo á su ánjá, kema ɗanga-ɗanga á ndeka, gáo á esombi akpɛ na kema ɗanga-ɗanga ɓea ɛtɛ, ngɔa ɛ́tɛ nnde ɓásɛki.

¹³ Mundalasíni, kema bui á ɛkɛmisa eea, nkoki, uvumba, ngaɛ́, makana, gamba, mpusu á nkɛkɛ, nganɔ, ɓangɔmbɛ, ɓamɔgɔgɔ, ɓamponda, koko émani, ɓakɔɓɛ na ɓato á mekakɔ.

¹⁴ Ɓasombisigi nkumba ɓáyɔngande gea: «Kema nde měma akɔ aseɓeima a ye koɗangamanei. Ɛtɔi nɛkɔ bui andǐ k'íso akɔ, ophiphî!»

¹⁵ Ɓasombisigi nkumba, ɓunde ɗáɓátɔi imɔna ka sombisaga nkumba ka ntanga-nji ndɔ, ɓámamande ɗanga ka ɓánga á tambaga akɛ. Ɓágámande na ɓáɓande ka oiyɔ

¹⁶ ɓágeande: «Ngomi ee! Ngomi ka ntanga-nji ángbó ndɔɔ. Ɗáɔ́lanigi ngɔ́mbɛ ánjɛ, bɔngɔ ɗanga-ɗanga ánjɛ na á ko índa ésombi akpɛ, kema nde ɓáɓɔngisigi na láté, ɓ'ɛtae ɗanga-ɗanga ésombi akpɛ na nsanga.

¹⁷ Ka mbenɔ moci tɔndɔ unge ɛtɔi bui akɔndɔkani!» Ɓatámbisigi-koko ángbóngbó k'óɓenge ɓɔbu na ɓakpa nɛɓɔ ɓunde ɗáɓáekumbi, ɓato á ka iɓo na ɓɔbu ɓunde ɗáɓáoenda ka sombisaga na somɓeanaga k'óɓenge, ɓâ phɔtɔ omama ɗanga.

¹⁸ Ɓáoúmba nkogɔ ɓî ɓáɔni maki á gogokana á ntanga-nji ndɔɔ. Ɓáɔyɔnga te: «Nna na ntanga-nji nde angboti ɓínde.»

¹⁹ Ɓáokpúkpua mpusu á oɗo ka mɔ̌ aɓɔ, ɓáotoɓokea ngamɔ na ianaga ɓáogea: «Ngomi ee! Ngomi á ntanga-nji ángbó ndee. Ɛtɔi bui nde ɓakpa ɓáně kaɓɛ koko ángbó k'óɓenge, atóki tɔ kau. Na ka mbenɔ moci tɔ kema bui áɔkɔndɔkana.»

²⁰ Cɔ, koba, ɓá na maseye ka gua á ntanga-nji ndɔɔ. Ɓáni phɔtɔ na maseye, ɓato á kanga ɓojeɗe, ɓateki na ɓaɔtu-nyɔngɔ ndea Mokonga. Nga, Mokonga ɗáteni nyɔngɔ nɛkɛ ka ɓeana na ɓojeɗe nde ɗági ka phɔanu.

²¹ Mpɔ, malaéka akpɛkpɛ ndea Mokonga áɔbɛɗa moimba n'aɓea nnde ɓáogogea, áomaka ú k'óɓenge ɗǔ! Áɔyɔnga te: «Ɓondɔ unge ɓámakande mokongo á Babilɔ́ni k'akpɛ na káɔnɛkanɛeka ye.

²² Ɓákáɔ́kɛeka mɔtɛ-akɔ, embɔ á ɓaembi na mɓina á ɓaɓɛtigi-ɓaphíí, ɓasúgu-ngbɛ na mbengu. Ka ɓato á ɓɔi káɔnɛkanɛeka ye mɔtɛ-akɔ. Ndu á moimba á gogea, káɔ́kɛkanɛeka ye.

²³ Owanga á ɔbɛa kabɛnyɛeka ye mɔtɛ-akɔ. Ɓákáɔ́kɛeka ye mɔtɛ-akɔ, ɛsɔ á mǒko éyamani na mpakai nɛkɛ nga, ɓasombisigi nɛkɔ ɗáɓáombi ka mokonda phɛɛ. Ka nyɔngɔ á ɓiji-ɓiji nɛkɔ, ɗǒdemi ɓato á ka mokonda bui.»

²⁴ Ɓáɔɔna mɔtɛ-akɔ, magia á ɓaɔtu-nyɔngɔ ndea Mokonga, ɓato á kanga ɓojeɗe na á ɓɔbu ɓunde ɗáɓáemowe ka mokonda.