Mphaniɔ 17 - Ɔngana á Kɛ̌kɛ

Nke á mambɔ angbóngbó

¹ Mpɔ ka ɓamalaéka ndea Mokonga ngianjaga iɓɛ (7) ɓundɔ ɗáɓábɛɗi cǎ ngianjaga iɓɛ (7), moci áobika omongoɗea te: «Bika, nekophangiande ɓî ɓátenande nyɔngɔ á nke nde mambɔ ampháki mmbé aiki sɔsɔɓɛ á ɓaniki á iɓo.

² Ɓaamɛ á ka mokonda ɗáɓánɗege ně na ɓato á ka mokonda, ɓáonoa makana á komusɔngɔ nɛkɛ áɔ̌bɛɗa.»

³ Malaéka ndea Mokonga ndɔ, ɗámokumbi ka Měma á Mokonga, áomoga ně ka nkanda. Nɛ́ɔmɔna nke n'aiki gǔ á nyama ánjɛ na ɓáɗundu gǔ akɛ nyɔngɔ á bóma á Mokonga. Nyama ndɔ ɗátú na mɔ̌ ngianjaga iɓɛ (7) na ndeka nkama (10).

⁴ Nke ndɔ ɗáɔ́li bɔngɔ á koɓoamɛ, n'atáni tɔ boo! N'ana esombi akpɛ. Â phɔtɔ ɔ̌tɔnda na láté, nsángá, n'ɛ́tɛ ésombi akpɛ. Ɗábɛɗi cǎ á láté, n'atúmi na ɓosoɛ á ɓɔjɔɔkiɔ á mambɔ nɛkɛ.

⁵ Ka keongi akɛ, ɗáɓáɗundu nyɔngɔ á ɓɔsɔmɛa ɓe: «Mokongo á Babɛ́li, ama-ɓato á mambɔ na ɓosoɛ á ka mokonda.»

⁶ Nɛ́ɔɔna gea, magia á ɓato á kanga ɓojeɗe n'índɔ á ɓunde ɗáɓátú ɓaɗigimisi ndea Yéso ambɛɗi. Ɓî nɛmɔni nke ndɔ, néoyayama phɛɛ.

⁷ Mpɔ malaéka áomongoɗea gea: «Oyayami ka ɓo? Nɛkɔɔnisande base nyɔngɔ á ɓɔsɔmɛa ndea nke nde na nnde á nyama nde ankumbi n'ana mɔ̌ ngianjaga iɓɛ (7) na ndeka nkama (10).

⁸ Nyama ndɔ ɔmɔnima, ɗátú na enda mosá, nna ye gǎkɛ ɓei. Ajuanande suɓi á mininga, â gǎkɛ oga oɓúngaga. Ɓato á ka mokonda ɓunde ina á ɓɔ nna suɓi á ɓuku á enda kpanga á ɓî ɗáɓáconji mokonda, ɓáyayamande ka ɔna nyama nga, yɛ ɗátúoenda, áokuwa n'asɛnɛkande goto!

⁹ Wani, ambe ɓá na úbapha na kɔɓɔɔngɛ. Mɔ̌ ngianjaga iɓɛ (7) ndɔ, ande mamba ngianjaga iɓɛ (7) nde nke ndɔ aiki gǔ í. Ú a phɔtɔ ɓaamɛ ngianjaga iɓɛ (7).

¹⁰ Ka ɓaamɛ ndɔ, ɓɔku ɓáokuwa, mmbé ɓa ko ngianjaga áomamea nji. Mmbé ɓa ko ngianjaga iɓɛ aámbé kábikimbɛ. A ye obika, aikande tɔ ka mbenɔ ábɔa.

¹¹ Nyama nde ɗáoenda na nna ye ɓei, yɛ sasakɛ ande moamɛ á ko ngianjaga isaɔ. Ande sɔsɔɓɛ á ɓaamɛ ngia njaga iɓɛ (7) ndɔɔ, mmbé age gǎkɛ oɓúngaga.

¹² Cɔ, ndeka nkama (10) ndɔ ɔɔnima, ande ɓaamɛ nkama (10) ɓunde ɓákáemamisimbɛ. Ɓámameande nji kimoci na nyama, ka mbenɔ ábɔa.

¹³ Ɓaamɛ nkama (10) ndɔ, ɓá tɔ na mɔphɛ mo, ande gea, bɛɗaneaga á nyama ndɔ na kɔkɔta na ɓukpɛkpɛ nɛɓɔ bui.

¹⁴ Ɓɔ, ɓámanande na Muna-Mɔgɔgɔ. Muna-Mɔgɔgɔ aékíndande ka nyɔngɔ nde ande Mɔkɔta ndea ɓakɔta na Moamɛ ndea ɓaamɛ. Akíndande kimoci na ɓunde ɗáɛɓɔphani, ɗáesombi na ɓunde ɓámɓeeki.»

¹⁵ Malaéka ndea Mokonga â goto ɔmɔtɔmia gea: «Iɓo ndɔ ɔɔnima, kuɓî nke nde mambɔ ampháki aiki, ande ɓakpa, usɛsɛ á ɓakpa, ɓato á ka mokonda na ɛyɔngi ɗanga-ɗanga.

¹⁶ Ndeka nkama (10) ndɔ ɔɔnima na nyama, ɓánkangeande nke ndɔ mambɔ ámpháki, ɓáomuta nkumba nɛkɛ bui, ɓáonɗeketa ndumbu. Ɓâ phɔtɔ oea kesuku akɛ, na makea due í ka nsa.

¹⁷ Nga, Mokonga ɗáeɓophi měma á tɔtɔkisa á mɔphɛ nɛkɛ kimoci na bisa á kɔkɔta nɛɓɔ ka bɛɗaneaga á nyama na ka ɓî nyɔngɔ ndea Mokonga atɔtɔkɛanande.

¹⁸ Na nke ndɔ ɔmɔnima, ande ntanga-nji ángbó nde ana ɓukpɛkpɛ gǔ á ɓaamɛ á ka mokonda.»