Mphaniɔ 16 - Ɔngana á Kɛ̌kɛ

Cǎ ngianjaga iɓɛ (7) á esúia ndea Mokonga

¹ Mpɔ nɛ́ɔɔ́ka ɛsɔ akpɛ n'atóki k'éndu á Mokonga áǒgea ɓamalaéka ndea Mokonga ngianjaga iɓɛ (7) te: «Gǎni, ɓóɗukiɛ ka mokonda cǎ ngianjaga iɓɛ (7) ésúia ndea Mokonga.»

² Malaéka ndea Mokonga ɓa k'ama mosá-mosá áoga oɗukia nɛkɛ cǎ ésúia ndea Mokonga ka mokonda. Mpɔ, embóɗo áǒguia ɓakpa ɓunde ɗáɓátú na mphangiɔ á nyama ndɔ na beba tɔnkɛngɛ akɛ.

³ Malaéka ndea Mokonga ɓa ko ɓaɓɛ, áoɗukia nɛkɛ cǎ ésúia ndea Mokonga k'óɓenge. Oɓenge áǒgaia ɓea magia á mǒnda. Econji bui nde aoenda á suɓi óɓenge, áokuwa.

⁴ Malaéka ndea Mokonga ɓa ko ɓasaɔ, áoɗukia nɛkɛ cǎ ésúia ndea Mokonga ka ɔɓa na ka ntoɔ á iɓo. Aǒgaia magia.

⁵ Nɛ́ɔmɔ́ka malaéka, mmbé ana kɔkɔta gǔ á iɓo n'aɔyɔnga gea: «Onde nto á koɗoni na nto á kanga ɓojeɗe ɓî oɓei na ɓî ɗótú, nga ɔ̌ɔnisi nteni-nyɔngɔ kángá oɓayɔ.

⁶ Ɓakpa ɗáɓáɗǔkisi magia á ɓakpa nɛkɔ na nnde á ɓaɔtu-nyɔngɔ nɛkɔ. Ɗóɓophi magia ka gea, ɓánoɛ ú. Ɓátɔi nnde akenani na ɓɔ.»

⁷ Mpɔ, nɛ́ɔɔ́ka ɛsɔ n'atóki k'ɛ́tɛ-ɔ́phɛ́ɔ áɔyɔnga te: «Eya, Mɔkɔta Mokonga Mɛna-ɓukpɛkpɛ, ootena nyɔngɔ ánjá kángá oɓayɔ.»

⁸ Mbusa, malaéka ɓa ko gena áoɗukia nɛkɛ cǎ ésúia ndea Mokonga ka maní. Maní áoɓá na ɓukpɛkpɛ á siɗisa á ɓakpa.

⁹ Ɓɛta á maní akpɛ áǒsiɗisa ɓakpa, ɓáombóma Mokonga mmbé ana ɓukpɛkpɛ gǔ á tambaga. Ɓákákondɛ gǎkɛ kětia á tambea aɓɔ na ɗokomisa á Mokonga.

¹⁰ Malaéka ndea Mokonga ɓa ko ɓɔku, áoɗukia nɛkɛ cǎ ésúia ndea Mokonga gǔ á kankaanga á kɔkɔta ndea nyama na koɓoamɛ nɛkɛ áongia suɓi á kaiphiɔ. Ɓakpa ɓáokoka eɗáka ka nyɔngɔ á kokae.

¹¹ Ɓáombóma Mokonga mmbé á na koba ka nyɔngɔ á tambaga nɛɓɔ na ka nyɔgɔ á embóɗo, ɓɔ ɓákákětiɛ gǎkɛ tambea nɛɓɔ.

¹² Malaéka ndea Mokonga ɓa ko ngianjaga áoɗukia nɛkɛ cǎ ésúia ndea Mokonga k'óɓenge angbóngbó Ɛphuláti, Oɓenge áophúa ka ɗeketa aphɛ nde ɓaamɛ ɓunde ɓátóki n'okomo ɓájabande kau.

¹³ Mpɔ, nɛ́ɔ̌ɓɔna ɓansombo ɓasaɔ ɓájeɗe ɓea ɓamɔsɔ na ɓáotóka k'aphenɔkɔ á njɔka angbóngbó, á nyama na á mɔtu-nyɔngɔ á mbɛa.

¹⁴ Ɓansombo ɓáunge ɓáɔtɔtɔkisa ketangaɔ. Ɓáoga mɔtɛ á ɓaamɛ á ka mokonda bui ka dondanisa aɓɔ ka nyɔngɔ á mana etu ángbó ndea Mokonga, Mɛna-ɓukpɛkpɛ.

¹⁵ «Cɔ, ɔ́kani, nebiki ɓea nkukuɓa. Maseye ka mmbé aɔphɛa tɔ̌ na ámbá bɔngɔ nɛkɛ, kágɛku ndúmbú na kuwa na soni mosá á ɓakpa.»

¹⁶ Ɓansombo ɓáǒdondanisa ɓaamɛ k'ɔ́ma nde ɓáɔɔphana ka Kiɛbulanía, Amaagɛdɔ́ni.

¹⁷ Malaéka ndea Mokonga ɓa ko ngianjaga iɓɛ (7) aoɗukia nɛkɛ cǎ ésúia ndea Mokonga ka mpɛna. Mpɔ, ɛsɔ ángbó áɔɔ́kɛkana k'éndu á Mokonga n'atóki ka kankaanga á kɔkɔta áogea: «Mpɔ así ye tɔ.»

¹⁸ Phénua, gbungbua áoɓá, ɓáoka á mbua na ɓaningina akpɛ nde kágeanimbɛ mɔnɔ kpanga ɓî nkpa áɓɛ ka mokonda.

¹⁹ Ntanga-nji ángbó áogabekana ka phaeka isaɔ na ntanga-nji bui á ka nji áɔngbɔɔkana. Mokonga ɗákanisi Babɛ́li ángbó. Áonsosea noa makana ésúia ángbó á ka cǎ nɛkɛ.

²⁰ Kesanga bui na mamba áondia.

²¹ Matanda á ɗoko-ɗoko ka toka na koba, áǒguia ɓakpa. Ɓɔ, ɓáɔmphɔ́ta Mokonga, ka nyɔngɔ á tambaga na matanda ndɔ. Nga, tambaga ndɔ ɗátú akpɛ phɛɛ.