Mphaniɔ 14 - Ɔngana á Kɛ̌kɛ

Muna-Mɔgɔgɔ ndea Mokonga na ɓaɓêki ɛlɛphu mia moci nkama gena na gena (144.000)

¹ Ɓî ɗɛ́nɛɛnji goto, Nɛ́ɔmɔna Muna-Mɔgɔgɔ n'amame gǔ á mamba á Sayúni, kimoci na ɓakpa ɛlɛphu mia moci nkama gena na gena (144.000). Ɗáɓáɗundu ina akɛ n'índe á Abakɛ k'éndóndó aɓɔ.

² Nɛ́ɔɔ́ka ɛsɔ n'atóki na koba, n'aɔɔya ɓea gɔa, n'aɓea ɓáoka á mbua. Ɛsɔ kau ɗátú gǎkɛ ɓ'índe á ɓaphíí na ɓaɓɛtigi ú ɓáɔɓina ně.

³ Ɓakpa ɛlɛphu mia moci nkama gena na gena (144.000) ndɔ ɗáɓáoemba embɔ á kɛ̌kɛ mosá á kankaanga á Mokonga na mosá á econji gena nde aoenda na mosá á ɓagbɛga. Nna na nkpa nde ɗátɔki goaga embɔ ndɔ, na nna tɔndɔ ɓakpa ɛlɛphu mia moci nkama gena na gena (144.000) ɓunde ɗáɓěsombi ka mokonda.

⁴ Ɓɔ, ɓákákondɛ jɔɔkisa á nyama aɓɔ ka dondana na ɓake, ɗáɓáambi nyama aɓɔ kángá jɔɔkisa í. Ɓáomɓea Muna-Mɔgɔgɔ ɔma bui nde aoga. Ɗáɓěsombi sɔsɔɓɛ á ɓakpa ɓunɛngbo ka ɓa ɔphɛ́ɔ á k'ama mosá-mosá ka Mokonga na ka Muna-Mɔgɔgɔ.

⁵ Ɗáɓákáyɔngi tanda mbɛá, ɓáoɓá kángá kisɛki.

Múbisɔ ndea ɓamalaéka ɓasaɔ ndea Mokonga

⁶ Mbusa, nɛ́ɔmɔna malaéka ndea Mokonga ɓaangbo n'aoyaa ka mpɛna phɛɛ. Ɗábiki ɔtɔmia Mbino-Ánjá á Mɛyɔ ka ɓakpa ɓɔbu á ka mokonda, ka nji bui, ekuna bui, etéte á ɛyɔngi bui, na ketoto bui.

⁷ Malaéka ndea Mokonga áɔyɔnga n'ɛsɔ akpɛ te: «Mɓángani Mokonga, ɓónɗokomisɛ, ka nyɔngɔ nde mbenɔ nɛkɛ ka tena á nyɔngɔ ajú. Mbebani nconji á koba, mokonda, oɓenge na ntoɔ á iɓo.»

⁸ Mpɔ malaéka ɓa ko ɓaɓɛ áomɓea mbusa, áogea: «Nji ángbó nde ɓáɔɔphana Babilɔ́ni agú, áosikia gúá! Ɗáenusi ɓato á ka mokonda bui makana á káe, á mambɔ nɛkɛ.»

⁹ Malaéka ndea Mokonga ɓa ko ɓasaɔ, áǒɓea ɓundɔ ɓaɓɛ á k'ama mosá-mosá, áɔyɔnga k'ɛ́sɔ akpɛ te: «Nkpa buakɛ mmbé aogbúka muanku mosá á nyama na tɔnkɛngɛ nɛkɛ n'ana mphangiɔ k'éndóndó na ka njaga akɛ,

¹⁰ anoande makana akáe á esúia ndea Mokonga, nnde ɓáɗuki ka cǎ nde atúmi n'esúia nɛkɛ. Ɓakpa ɓea ɓundɔ ɓátambagande ka ɛɛmbɛ á nsa, mosá á ɓamalaéka ndea Mokonga á kanga ɓojeɗe na mosá á Muna-Mɔgɔgɔ.

¹¹ Maki á nsa á tambisaga aɓɔ, aojuana ka saga na saga. Ɓunde ɓáombeba nyama na tɔnkɛngɛ akɛ na nkpa buakɛ mmbé ana mphangiɔ á ina akɛ ɓákáɓɛku na múmbiɔ kaɓɛ sɔmani kaɓɛ kǐpha.

¹² Cɔ, ka ɓondɔ unge, ɓato á Mokonga, ɓunde ɓáoamba ɛɔphi nɛkɛ, na ɓeekea á Yéso, akeni ɓáphiphiɛ tambaga.»

¹³ Mpɔ, nê goto ɔɔ́ka ɛsɔ n'atóki na koba, áogea: «Cɔ, ɗundua ɓe: Maseye áɓɛ kpanga á kɛ̌kɛnde ka ɓunde ɓáku k'ína á Mɔkɔta!» Měma á Mokonga agi: «Eya, ɓáumbiɛ mbusa ékuma nɛɓɔ akpɛ nga, ekuma nɛɓɔ aeɓeande.»

Ɗúngú á ka mokonda

¹⁴ Nê goto ɔɛnjia, nɛ́ɔɔna egugu ábu. Nkpa moci áoika gǔ í n'akengeani na Muna-Nkpa. Ɗáɔ́li kekombó á láté, áodunga píndí á pheá.

¹⁵ Malaéka ndea Mokonga ɓaangbo áotóka k'éndu á Mokonga, áonkogea mmbɔ ɗáiki gǔ á egugu gea: «Beɗa píndí nɛkɔ, óɗunguɛ! Ka nyɔngɔ nde, mbenɔ á ɗungu ajú ye tɔ, mbó á ka mokonda, amɔti.»

¹⁶ Mpɔ, Malaéka ndea Mokonga ímbe ɗáiki gǔ egugu, áɔɔpha píndí nɛkɛ gǔ á mokonda, ɗúngú áoɓá ka mokonda.

¹⁷ Mpɔ, malaéka ndea Mokonga ɓaangbo áotóka k'éndu á Mokonga nnde á na koba n'adungi phɔtɔ píndí á pheá.

¹⁸ Mpɔ, malaéka ɓaangbo mmbé ana kɔkɔta gǔ á nsa áotóka k'ɔ́ma ɔ́phɛ́ɔ áonkogea mmbɔ ɗádungi píndí á pheá gea: «Bɛɗa píndí ndeakɔ ótenɛ mbuka á mujabíbu nde agɔmbi ka mokonda nga, a ye mɔti.»

¹⁹ Malaéka ndɔ áɔɔpha píndí nɛkɛ gǔ á mokonda, áoɗúngua mujabíbu á ka mokonda. Áomakea suɓi á kasangɔ ángbó ésuia ndea Mokonga.

²⁰ Ɓáokáma mbuka ka kasangɔ ndɔ, mbamba na ntanga-nji, magia áojuana kau, áoyoka ɓ'iɓo, ɓondanda í áoɓá ɓea kilɔmɛtɛɛ mia isaɔ (300), Dǔmana í áoɓá ɓea mɛ́tɛɛ moci na gbútuka.