Mphaniɔ 13 - Ɔngana á Kɛ̌kɛ

Ɓanyama ɓákae ɓaɓɛ á ɓangisa

¹ Mpɔ, Nɛɔmɔna Nyama n'ajúani k'óɓenge. Ɗátú na ndeka nkama (10) na mɔ̌ ngianjaga iɓɛ (7). Kekombó ɗáɛmbi tɔ ndeka akɛ bui. Gǔ á mɔ̌ ndɔ bui, ɓáoɗunduaga ina á bóma á Mokonga.

² Nyama kayɛ ɗátú tɔ ɓea mabianga. Ecinji akɛ â gǎkɛ oɓá ɓ'índe á dubu. Aphenɔkɔ akɛ áoɓá ɓ'índe á simba. Njɔka angbóngbó áomopha nyama ndɔ ɓukpɛkpɛ, kɔkɔta ángbó na kankaanga nɛkɛ á koɓoamɛ.

³ Ka mɔ̌ á nyama ndɔ moci ɗátú n'aphɛphɔa nde ɗátú nto á kuwa ně. Aphɛphɔa ndɔ â gǎkɛ obiɗa. Ɓakpa ɓɔbu á ka mokonda ɓáoyayama, ɓáomɓea.

⁴ Kaɓondɔ, ɓakpa ɓɔbu ɓáombeba njɔka angbóngbó ka nyɔngɔ á opha á nyama kɔkɔta nɛkɛ. Ɓâ phɔtɔ ombeba nyama na gea: «Ani mmbé akengeani phɔ́ na nyama ndee? Ani mmbé aɔtɔka n'ammanisi ee?»

⁵ Ɓáonsosea nyama ndɔ yɔnga á nyɔngɔ á eɗokoa na bóma á Mokonga. Ɓáomopha kɔkɔta á bɛɗanaga ka ɓasaga ɓasaɔ na gbútuka.

⁶ Nyama ndɔ, áoikia yɔnga á nyɔngɔ ájeɗe-jeɗe ka phɔa Mokonga, áobóma ina akɛ n'ɔma á ɓoiki nɛkɛ na bóma á ɓɔbu ɓunde ɓáiki na koba.

⁷ Ɗáɓánsosei nyama ndɔ gea te, áemanisɛ ɓato á Mokonga na kínda aɓɔ. Áɔtɔa ɓukpɛkpɛ gǔ ékuna bui, ɓakpa ɓɔbu, etéte á ɛyɔngi bui na nji bui á ka mokonda.

⁸ Cɔ, ɓato á ka mokonda ɓɔbu ɓámbebande nyama ndɔ, ɓɔbu ɓunde ɗáɓákáɗundu ina aɓɔ kpanga nkpangeɔ á Mokonda suɓi á ɓuku á enda á Muna-mɔgɔgɔ mmbé ɗáɓánteni.

⁹ Cɔ, mmbé ana kecuɛ á ɔ́kapha, áɔ́kɛ!

¹⁰ Kaɓɛ nkpa n'akeni ngia ka mekakɔ, angiande ka mekakɔ. Kaɓɛ nkpa n'akeni kuwa na mɓɛngɛ, akuwande na mɓɛngɛ. Ɓɔndɔ unge akeni ɓato á Mokonga ɓáɓɛ na měma á phiphia á tambaga na ɓeekea.

¹¹ Mpɔ, Nɛ́ɔmɔna nyama ɓaangbo n'aojuana ka oɗo. Yɛ n'ana ndeka iɓɛ, ndeka kau n'akengeani n'índe á muna-mɔgɔgɔ. Ɗátúɔyɔnga ɓea njɔka angbóngbó.

¹² Ɗábɛɗaneigi kɔkɔta bui á nyama ndɔ ɓa k'ama mosá-mosá akɛ. Áǒsosea ɓakpa ɓɔbu á ka mokonda na kema bui gea te, ɓámbebɛ nyama ndɔ ɓa k'ama mosá-mosá, mmbé ɗátú n'aphɛphɔa ka mɔ̌ akɛ nnde ɗátúogea ákuwɛ ně.

¹³ Nyama ndɔ ɓa ko ɓaɓɛ áɔtɔtɔkisa mphangiɔ á ketangaɔ. Aɔkisisa nsa ka toka na koba ka mokonda k'íso á ɓakpa ɓɔbu.

¹⁴ Ka nyɔngɔ á ketangaɔ ángbó nnde ɗáɓámophi ka tɔtɔkisa í k'íso á nyama ndɔ ɓa k'ama mosá-mosá, áǒdema ɓato á ka mokonda gea, ɓáɓɔngisiɛgɛ tɔnkɛngɛ ka ɗokomisa á nyama ndɔ ɗáote na píndí na áoama.

¹⁵ Mpɔ nyama angbóngbó ndɔ ɓa ko ɓaɓɛ, ɓáomopha kɔkɔta á ophia mpophɛ akɛ suɓi á tɔnkɛngɛ á nyama ndɔ ɓa k'ama mosá-mosá ka gea te, áyɔngɛ na kusisa á ɓunde ɗáɓákáombeba.

¹⁶ Nyama ndɔ, áǒsosea ɓakpa ɓɔbu, ɓaniki na ɓagbɛga, ɓatɔi na ɓaúki, ɓakɔɓɛ na ɓunde ɓáná ɓakɔɓɛ gea, ɓábisɛ mphaniɔ kaɓɛ k'éndóndó kaɓɛ ka njaga á mǔku.

¹⁷ Ka ɓakpa ɗákáɔtɔka somba kaɓɛ sombisa á kema, na nna na mphangiɔ nde ɗátú n'ina á nyama kaɓɛ mɔɔmba nde aingimiani n'ina akɛ.

¹⁸ Cɔ, akeni ɓá na kɔɓɔɔngɛ. Mmbé aoúbapha, aɔtɔka n'aengekisi mphangiɔ á mɔɔmba á nyama nga, mɔɔmba ndɔ aingimiani n'ina á nkpa. Mɔɔmba ndɔ ande mia ngianjaga nkama ngianjaga na ngianjaga (666).