Mphaniɔ 12 - Ɔngana á Kɛ̌kɛ

Nke na njɔka angbóngbó

¹ Mphangiɔ ángbó áɔsɛnɛka na koba: Maní n'ankombei nke, songe n'akusi á ecinji akɛ na kekombó á ɓasɛɛngɔa nkama na iɓɛ (12) n'aka mɔ̌ akɛ.

² Ɗákumbi eme, áotaɓokanaga ka nyɔngɔ á kokae á ɓoaé.

³ Mpɔ, mphangiɔ nɛngbo áɔsɛnɛka na koba: Njɔka angbóngbó ánjɛ n'ana mɔ̌ ngianjaga iɓɛ (7) na ndeka nkama (10). Mɔ̌ ngianjaga iɓɛ (7) ndɔ bui ɗátú na kekombó moci-moci.

⁴ Moci ka isaɔ á ɓasɛɛngɔa, nkondo á njɔka angbóngbó ndɔ, áoɓota, áomaka ú ka mokonda. Yɛ, áomama mosá á nke á ɓoaé ka ɓondea miá á mɔɛmba mbenɔ nde aɓɔkɔtɛanande.

⁵ Nke ndɔ, áɔmɓɔkɔta miki-mǒko mmbé amameande nji bui na kɔkɔta á ngɔa. Miki ndɔ ɓâ gǎkɛ ontáisa na koba, ɓáombisa bíbí á kankaanga á kɔkɔta ndea Mokonga.

⁶ Nke ndɔ áotea ka nkanda, ɔma nde Mokonga ɗámɓɔngisíígi ka isa akɛ k'ésa Ɛlɛphu moci mia iɓɛ na nkama ngianjaga (1.260).

⁷ Cɔ, mpɔ etu áogua na koba. Malaéka ndea Mokonga Mikaɛ́lɛ na ɓamalaéka nɛkɛ, ɓáommanisa njɔka angbóngbó ndɔɔ. Njɔka kayɛ kimoci na ɓamalaéka nɛkɛ, â phɔtɔ omana na ɓɔ.

⁸ Njɔka angbóngbó ndɔ ɗákákíndi gǎkɛ. Yɛ, kimoci na ɓamalaéka nɛkɛ, ɓákátɔɛ ye k'ɔ́ma na koba.

⁹ Ɓáomɓeaga njɔka angbóngbó ndɔ, ɓáommaka yɛ na ɓamalaéka nɛkɛ ka mokonda, njɔka angbóngbó á kala ndɔ mmbé ɓáɔmɔphana nketi phɔtɔ Sɛtáni nga, aǒdema ɓato á ka mokonda ɓɔbu.

¹⁰ Mpɔ, nɛ́ɔɔ́ka ɛsɔ akpɛ n'aotóka na koba, áogea ɓe: «Mpɔ ye tɔ mbenɔ á ɓoamia á ka měma, ɓukpɛkpɛ, koɓoamɛ ndea Mokonga ajú na kɔkɔta á Kiísito nɛkɛ. Nga, ɓámmaki ka mokonda ntɔngi á ɓana-amasu mmbé ɗáɔ̌tɔngaga ɓɔ keiphe n'esa mɔtɛ á Mokonga.

¹¹ Kaɓɛ ɓana-amasu ɓátónkíndí ande ka ɓukpɛkpɛ á magia á Muna-mɔgɔgɔ na ka nyɔngɔ índe ɗáɓáɗigimisi. Ɗáɓákáuníí enda aɓɔ, ɗáɓátú bíbí á kukuwa.

¹² Kaɓondɔ, maseye áɓɛ na koba, ɓáni n'iyoma ɓunde ɓoiki na koba. Ande gǎkɛ ngomi ka mokonda n'oɓenge! Ka nyɔngɔ nde, Sɛtáni adidi ko. Yɛ, atúmi n'esúia nga, aúbi gea, mbenɔ nɛkɛ nna ye ásii.»

Etu agú ka mokonda

¹³ Ɓî njɔka angbóngbó ɗáúbi gea, ɓámmaki ka mokonda, áokpanga ɓeá á nke mmbé ɗámɓɔkɔti miki-mǒko.

¹⁴ Nke ndɔ â gǎkɛ kɔtɔa kepupe iɓɛ ángbóngbó á ndia nnde ayaande ně k'ɔ́ma nde ɗáɓámɓɔngisíí ka nkanda nga, kó unge ɓámophande kema á ko eea ka ɓasaga ɓasaɔ na gbútuka n'a tɔ ka mbagɔ á njɔka angbóngbó.

¹⁵ Njɔka ndɔ â gǎkɛ osúa iɓo ásii k'aphenɔkɔ akɛ, mbusa á nke ndɔɔ, áoɓá ɓea oɓenge ka gea, án'yokisɛ.

¹⁶ Mokonda â gǎkɛ onenga nke ndɔɔ. Oɗo áǒkeka, áomia iɓo ásii ndɔ njɔka angbóngbó atósú.

¹⁷ Njɔka ndɔ, áɔmɓɛɛa nke ndɔ phɛɛ. Áoga ǒmanisa ɓana-nke ndɔ ɓuangbo. Ɓaniki ndɔ ɓáunge ɓáoamba ɛɔphi ndea Mokonga na ɓeá á ɓɔphɛi ndea Yéso.

¹⁸ Mpɔ, njɔka angbóngbó ndɔ, áomama ka mpɛphɛ óɓenge.