Mphaniɔ 11 - Ɔngana á Kɛ̌kɛ

Ɓaɗigimisi ɓaɓɛ

¹ Mbusa, ɓáomopa gbútuka á me n'a ɓea motumbɔ, ka úba á ɓondanda á kema, ɓáomongoɗea te: «Gǎ, ɔ́bɛɗɛ ɓondanda éndu ndea Mokonga na ɓondanda ɛ́tɛ-ɔ́phɛ́ɔ, ótangɛ phɔtɔ ɓunde ɓáonɗokomisa Mokonga suɓi í.»

² «Cɔ, kɔbɛɗɛmbɛ gǎkɛ ɓondanda á ntanga éndu ndea Mokonga, ka nyɔngɔ nde, kó, ande ɔma á ɓunde ɓáná Ɓayúda. Ɓɔ, ɓáɗɛtɛagande nji á kanga ɓojeɗe ka ɓasonge nkama gena na iɓɛ (42).

³ Nětekande ɓaɗigimisi nɛmɔ ɓaɓɛ na ɓáɔ́li ngɔ́mbɛ á kekusa. Ɓáɔtɔande nyɔngɔ á Mokonga ka ɓ'esa ɛlɛphu moci mia iɓɛ na nkama ngianjaga (1.260).»

⁴ Ɓaɗigimisi ɓaɓɛ ndɔ, ɓánde ɓame ɓaɓɛ á mijɛitúni na ɓangeo ɓaɓɛ á kpatikisa ɔbɛa ɓunde ɓámamege mosá á Mɔkɔta á ka mokonda.

⁵ Aoɓá ka ɓakpa n'aokonda geea aɓɔ ájeɗe, nsa nde aojuana k'aphenɔkɔ aɓɔ, áɔ̌ɛkɛkisaga ɓaɓiɓia nɛɓɔ. Eya, ɓondɔ unge mɓiɓia nɛɓɔ akuwande.

⁶ Ɓaɗigimisi ndɔ ɓána kɔkɔta á ɗaka á koba ka gea, mbua kaɔkɛmbɛ ka matú nde ɓáɔɔtɔa nyɔngɔ á Mokonga. Ɓáoɓá phɔtɔ na kɔkɔta á gaía á iɓo ka magia, na kɔkɔta á ɓɛta á mokonda n'etéte á tambaga ásii ka mbenɔ bui nde ɓákondi.

⁷ Cɔ, ɓá ye gǎkɛ ɔgɔɓa ɗigimisa á nyɔngɔ nɛɓɔ, nyama atáiande ka mininga, amanande na ɓɔ, aekíndande na aemowande.

⁸ Mǒnda aɓɔ ajigagande ka ntanga á ntanga-nji ángbó nnde ɓáɔɔphana Sɔdɔ́ma na Mísii, nji nde ɗáɓánkɔkɛigi Mɔkɔta nɛɓɔ ka moyangɔ.

⁹ Cɔ, ɓakpa ɓɔbu, ɓato á k'ekuna bui, ɛyɔngi bui, na ɓato á ka nji bui, ɓáɔnjiande mǒnda aɓɔ ka esa isaɔ na gbútuka. Ɓákakondɛ úmba á mǒnda aɓɔ.

¹⁰ Ɓato á ka mokonda ɓáɓande ndiu na maseye na gúa á jaí ka nyɔngɔ á kukuwa aɓɔ. Ɓato á ka mokonda ɓátekisianagande ɛkɔmi, ka nyɔngɔ nde, ɓaɔtu-nyɔngɔ ndea Mokonga ɓaɓɛ ndɔ, ɗáɓětambisigi ɓato á ka mokonda.

¹¹ Mbusa á esa isaɔ na gbútuka ndɔ, mpophɛ áotóka mɔtɛ á Mokonga, áongia suɓi á mǒnda á ɓaɔtu-nyɔngɔ nɛkɛ ndɔɔ, ɓâ goto omama. Ɓakpa ɓɔbu ɓunde ɗáɓɛ̌ɓɔni, ɓáoɓá na kɔɓɔɓɔkɔ phɛɛ.

¹² Mpɔ, ɓaɔtu-nyɔngɔ ndea Mokonga ɓaɓɛ ndɔ ɓáɔɔ́ka ɛsɔ akpɛ n'aotóka na koba, áǒngoɗea gea: «Ɗáphani koni!» Ɓáoɗápha na koba suɓi égugu, ɓaɓiɓia nɛɓɔ na ɓáɔ̌ɓɔna.

¹³ Ka mbenɔ ndɔ tɔ, ɓaningina akpɛ, áoɗengisa nji ndɔɔ. Phaeka á ko iɓɛ á ntanga-nji áɔngbɔɔkanaga, ɓakpa ɛlɛphu ngianjaga iɓɛ (7.000) ɓáosia ka nyɔngɔ á ɓaningina ndɔɔ. Ɓakpa nde ɓájigi, ɓáoɓá na kɔɓɔɓɔkɔ phɛɛ, ɓáonɗokomisa Mokonga, mmbé ana koba.

¹⁴ Cɔ, tambaga á ko iɓɛ anyɛ́nyi. Nnde á ko isaɔ a ye tɔ bíbí á bika.

Mbengu á ko ngianjaga iɓɛ (7)

¹⁵ Mpɔ, malaéka ɓa ko ngianjaga iɓɛ (7), áosúa mbengu. Ɛsɔ ángbó áɔɔ́kɛkana n'aotóka na koba gea: «Koɓoamɛ á ka mokonda a ye tɔ ndea Mɔkɔta nɛsu Kiísito na koɓoamɛ nɛkɛ aɓande ka saga na saga!»

¹⁶ Ɓagbɛga nkama iɓɛ na gena (24), ɓunde ɓáiki ka kankaanga á koɓoamɛ mosá á Mokonga, ɓáogbúka muanku aɓɔ na ɓáombeba Mokonga ɓe:

¹⁷ «Mɔkɔta Mokonga, Mɛna-ɓukpɛkpɛ, oɓɛ aámbé oɓei na ɗótú ɓei, ɓeosikisíí ɓosegi nga, omesi koɓoamɛ nɛkɔ, ɔbɛɗaneigi ɓukpɛkpɛ nɛkɔ bui!

¹⁸ Ɓato á k'ékuna bui ɗáɓáɓɛí, oɓɛ ǒphangisi gǎkɛ esúia nɛkɔ. A ye tɔ mbenɔ ka tena nyɔngɔ á ɓasí, ɓakpa nde ɓaku ɓâ gǎkɛ oɓá na ɓukpɛkpɛ. Óphenda ɓakpa nɛkɔ á kanga ɓojeɗe, kimɔci na ɓaɔtu-nyɔngɔ nɛkɔ ɓunde ɗáɓákɔbɛɗaneigi phɔtɔ, óphendɛ ɓakpa ɓɔbu, ɓunde ɗáɓáɔkɔɔ́ka, nanga ɓagbɛga na ɓaniki, ande mbenɔ á kɔndɔkisa ɓunde ɓátúkatúki mokonda.

¹⁹ Mbusa, endu ndea Mokonga áoúkukana na koba, sanduku á iyɔnga áɔsɛnɛka. Mpɔ, phɛnua á mbua, ndu, ɓáoka á mbua, ɓaningina na mbua ángbó á matanda áoɓá ɓei.»