Mphaniɔ 10 - Ɔngana á Kɛ̌kɛ

Malaéka ndea Mokonga angbóngbó na miki á ɓuku

¹ Mbusa á wa, Nɛɔmɔna malaéka ɓaangbo akpɛkpɛ, n'aodida ka toka na koba. Egugu n'angbukumi ɓea bɔngɔ, akema n'atimbi mɔ̌ akɛ. Keongi akɛ áophenuaga ɓea maní, ecinji akɛ ɗátú ɓea ngeɔ á nsa.

² Ɗábɛɗi miki á ɓuku ka njaga na ɓáúku. Áɔɗɛtɛa oɓenge n'ecinji akɛ á mǔku, áɔɗetɛa oɗo n'ecinji akɛ á nkei.

³ Áokoga akpɛ ɓea simba n'aɔgɔuma! Ɓî akogi, ɛsɔ á ɓaoka á mbua ngianjaga iɓɛ (7), áɔɔ́kɛkana.

⁴ Mbusa á ɔ́kɛkana á ɛsɔ á ɓaoka á mbua ngianjaga iɓɛ (7) ndɔ, néogea néɗunduɛ nyɔngɔ ndɔɔ. Nê gǎkɛ ɔɔ́ka ɛsɔ, n'atóki na koba, gea: «Koɗunduɛmbɛ nyɔngɔ ndɔ ɓáoka á mbua ngianjaga iɓɛ (7) ayɔngi, áɓɛ ndiu kema á ɓɔsɔmɛa.»

⁵ Mpɔ, malaéka nde ɗɛ́mɔni n'amame k'óɓenge na oɗo, áomesa njaga akɛ á mǔku na koba.

⁶ Áɔɔpha k'ína á Mokonga mmbé aoenda mɛyɔ, mmbé aconji koba na kema bui nde ana koba, mmbé aconji mokonda na kema bui nde a ka mokonda, mmbé aconji oɓenge na kema bui nde asuɓi í, na kema nde a suɓi í bui. Malaéka ndea Mokonga ndɔ áɔyɔnga gea: «Mbenɔ nna ye ɓei.

⁷ Cɔ, esa nde malaéka ɓa ko ngianjaga iɓɛ (7) asúande gǎkɛ mbengu, Mokonga atɔtɔkisande moangɔ nɛkɛ á ɓɔsɔmɛa, ɓíndɔ ɗɛ́tɔ̌mi ɓabɛɗanigi nɛkɛ, ɓaɔtu-nyɔngɔ.»

⁸ Mpɔ, nɛ́ɔɔ́ka goto ɛsɔ ndɔ ɗɛ́ɔ́ki n'atóki na koba, áomogea: «Gǎ, ɔ́bɛɗɛ ɓuku ábɔa ndɔ aúkukani, a ka njaga á malaéka ndɔ amame k'óɓenge na oɗo.»

⁹ Néoga kuɓî malaéka aɔ, néongoɗea ámopɛ ɓuku ábɔa ndɔɔ. Áomongoɗea: «Bɛɗa ú, óeɛ. Aɓande ájia ka sɔphɔ akɔ, aɓande gǎkɛ aɛkɛ̌ ɓea ɓoki k'aphenɔkɔ akɔ.»

¹⁰ Nɛ́ɔbɛɗa ɓuku ábɔa ndɔ ka njaga á malaéka, néoea ú. Áoɓá áɛkɛ̌ k'aphenɔkɔ ani ɓea ɓoki. Mbusa á ea í, áoɓá ájia ka sɔphɔ ani.

¹¹ Mpɔ, ɓáomongoɗea: «Akeni ɔ́ɔtɔɛ nyɔngɔ mosá á ɓakpa ɓásii, nji ásii, mosá á ɓato á k'ekuna, ɛyɔngi bui na ɓaamɛ ɓɔbu.»