Mphaniɔ 1 - Ɔngana á Kɛ̌kɛ

Mɔ̌ á nyɔngɔ

¹ Ɓuku nde ana mphaniɔ nde Mokonga ɗámophi Yéso Kiísito ka gea, áúbisɛ ka ɓabɛɗanigi nɛkɛ kema nde ambe átɔtɔkɛanɛ kángá iphia. Cɔ, Kiísito ɗánteki malaéka nɛkɛ ka úbisa á mbɛɗanigi nɛkɛ Yoáni nyɔngɔ ndɔɔ.

² Yoáni ɗáɗigimisi nyɔngɔ ndɔ ɓe: «Kema bui nde ɗɛ́ɔni ande Nyɔngɔ á Mokonga n'ande ɗoni gea, Yéso Kiísito aámbé aɗigimisi ú.»

³ Cɔ, maseye ka nkpa nde aotanga ɓuku ndee, maseye ka ɓunde ɓáɔɔ́ka na tɔtɔkisa á nyɔngɔ nde Mokonga ɗáyɔngi, nnde ɓáɗundu wani. Nga, mbenɔ á tɔtɔkɛana á nyɔngɔ ndɔ bui a ye tɔ bíbí.

Nsesɔ ka kanisa ngianjaga iɓɛ (7)

⁴ Eme Yoáni nenóɗundui ɓenu ɓato á kanisa ngianjaga iɓɛ (7), nnde a ka nji á ka Asía. Ambe Mokonga mmbé aɓei, mmbé ɗátú na mmbé abikande ánóphɛ ɓonjánja-ékondi na ɓujɛjɛ. Ɓonjánja-ékondi na ɓujɛjɛ ndɔ átókɛ phɔtɔ ka měma ngianjaga iɓɛ (7), ɓunde ɓáoika mosá á kankaanga á koɓoamɛ nɛkɛ áɓɛ na ɓenu.

⁵ Ɓonjánja-ékondi na ɓujɛjɛ ndɔ átokɛ phɔtɔ ka Yéso Kiísito, nɗigimisi á ɗoni, ánge ka ɓunde ɓájujúki ka kukuwa, na moamɛ á ɓaamɛ á ka mokonda. Yɛ, Kiísito asókondi, magia akɛ aunge ɗásóphúi ka ɓojeɗe nɛsu.

⁶ Kaɓondɔ, áosóbisa ɓato á koɓoamɛ nɛkɛ, na ɓatoɓeigi-phɛ́a ka bɛɗaneaga Abakɛ Mokonga. Cɔ, ɓoombia na ɓukpɛkpɛ, áɓɛ ka Yéso Kiísito ka saga na saga! Áɓɛ ɓó.

⁷ Éngani, Yéso Kiísito aobika k'égugu. Ɓakpa ɓɔbu ɓámɔnande. Ɓunde ɗáɓántúmi n'ekonga, ɓámɔnande phɔtɔ. Ɓato á k'ekuna bui á ka mokonda ɓátaɓokanagande ka nyɔngɔ akɛ. Eya! Áɓɛ ɓó.

⁸ Mɔkɔta Mokonga Mɛna-ɓukpɛkpɛ bui, mmbé aɓei, mmbé ɗátú ɓei na mmbé aobika agi te: «Nende Alpha na Ɔmɛga.»

Yoáni amɔni Kiísito ka mphaniɔ

⁹ Eme nende muna-amanu Yoáni. Ka jukana na Yéso, ne kimoci na ɓenu ka tambaga, néoɓá kimoci na ɓenu ka koɓoamɛ nɛkɛ na ka phiphia á tambaga. Ɓámoge ně ka kesanga nde ɓáɔɔphana Patɛ́mɔ, ka nyɔngɔ nde ɗɛ́phɛí Nyɔngɔ á Mokonga na phɛá á ɗoni nde Yéso ɗáengekisi.

¹⁰ Cɔ, ɗátú esa á Mɔkɔta, Měma á Mokonga ɗámɔgɔni, nɛ́ɔɔ́ka ɛsɔ mbusa ani n'akpɛ ɓea ɛsɔ á mbengu.

¹¹ Ɛsɔ ndɔ ɗáɔyɔnga ɓe: «Kema nde ɔɔna, ɗundua ú suɓi á ɓuku, ótekɛ ɓuku ndɔ ka kanisa ngianjaga iɓɛ (7) ndee: Ɛphɛ́sɔ, Smúna, Pɛɛgámɔ, Tuatɛ́a, Sáadi, Philadɛlphía, na Laɔdikía.»

¹² Mbusa í, néǒpháia ka enga ani mmbé ɗáɔyɔnga n'eme. Ɓî ɗéěphái nɛ́ɔɔna tɛta á ɔbɛa ngianjaga iɓɛ (7) nnde ɓáɓɔngisigi na láté.

¹³ Sɔsɔɓɛ í, nɛɔmɔna nkpa, n'akengeani na Muna-Nkpa. Yɛ, ɗáɔ́li ngɔ́mbɛ éndǎ, nnde akǐ k'écinji. Áɔ̌ɓɔɛa angeɗe k'égogo nnde ɗáɓáɓɔngisigi na láté.

¹⁴ Sekamɔ̌ akɛ ɗátú ábusǔ ɓea sáá á mɔgɔgɔ ímbɔ aábu, â phɔtɔ oɓá ábusǔ ɓea matanda. Iso akɛ ɗáɔbɛnya ɓea ɛɛmbɛ á nsa.

¹⁵ Ecinji akɛ áɔtɔɔka ɓea ngɔa étombe nde atóki ka nsa. Ɛsɔ akɛ áɔɔya ɓea gɔa.

¹⁶ Ɗábɛɗi ɓasɛɛngɔa ngianjaga iɓɛ (7) ka njaga akɛ á mǔku, píndí nde aophea nci gbɔgbɔ áojúana k'aphenɔkɔ akɛ. Keongi akɛ áɔbɛnya akpɛ ɓea maní ka kantende.

¹⁷ Ɓî ɗɛ́mɔni, néogua k'écinji akɛ ɓea nkpa n'aku. Wa, â gǎkɛ obisa njaga akɛ á mǔku gǔ ani, áɔyɔnga ɓe: «Koɓángɛmbɛ! Eme aámbé nende Nkpangeɔ na Sungiaga.

¹⁸ Nende nkpa nde neoenda. Ɗéku, cɔ, kɛ̌kɛnde ne gǎkɛ oenda ka saga na saga. Nɛbɛɗi phembekete á kukuwa na nnde á nji á ɓasí.

¹⁹ Cɔ, ɗundua kema nde ɗɔ́ɔni, na nnde á kɛ̌kɛnde, na nnde abikaeka.

²⁰ Kantíti á ɓɔsɔmɛa ka ɓasɛɛngɔa ngianjaga iɓɛ (7) ndɔ ɗɔ́ɔni ka njaga ani á mǔku, na tɛta á ɔbɛa ngianjaga iɓɛ (7) nde ɓáɓɔngisigi na láté a ɓe: Ɓasɛɛngɔa ngianjaga iɓɛ (7) ande ɓamalaéka ndea Mokonga á ka kanisa ngianjaga iɓɛ (7) ndɔɔ. Ɓatɛta á ɔbɛa ngianjaga iɓɛ (7) ndɔ, ande kanisa ngianjaga iɓɛ (7).