Philɛmɔ́nɔ 1 - Ɔngana á Kɛ̌kɛ

Nsesɔ

¹ Dasu ékondi Philɛmɔ́nɔ, samba! Eme Pɔ́lɔ aámbé neɗundu ɓaoɓa ndee, kimoci na dasu Timɔtɛ́ɔ. Nende nto á mekakɔ ka nyɔngɔ á Kiísito Yéso. Nekoɗundui oɓɛ dasu ékondi na mbɛɗanigi kimoci na ɓesu.

² Ɓeɗundu phɔtɔ k'áwásu Apía, ka Aakípɔ, dasu nto-émani, na ka ɓaɓêki ɓunde ɓáodondanaga k'éndu nɛkɔ.

³ Ɓonjánja-ékondi na ɓujɛjɛ ndea Abasu Mokonga, na Mɔkɔta Yéso Kiísito, áɓɛ na ɓenu.

Pɔ́lɔ aonsega Mokonga ka nyɔngɔ á Philɛmɔ́nɔ

⁴ Cɔ, neonsega Mokonga nɛmɔ esa bui k'ɛ́mɛmi, ɓî neokokanisia oɓɛ Philɛmɔ́nɔ.

⁵ Nga, nɛɔɔ́ka mbino á ekondi na ɓeekea nɛkɔ nde oně ka Mɔkɔta Yéso na ka ɓaɓêki ɓɔbu.

⁶ Ɛmɛmi nɛmɔ ka Mokonga a phɔtɔ gea, ɓeekea nde amojúkanisi n'oɓɛ, áɓɛ na ɓukpɛkpɛ phɛɛ suɓi akɔ, kaɓondɔ unge oúbande ɓonjánja bui nde ɓeně ka jukana asu na Kiísito.

⁷ Dani, ekondi nɛkɔ ɗámopi maseye phɛɛ na gbagisaga měma ani ka nyɔngɔ nde, ɗɔ́phɔngisigi měma á ɓato á Mokonga.

Pɔ́lɔ aonɗengemisaga Philɛmɔ́nɔ ka sesea Ɔnɛsímɔ

⁸ Cɔ, nanga néɓá na kɔkɔta nde Kiísito ɗámopi, ka sosea akɔ kema nde ambe ɔ́tɔtɔkisɛ ú,

⁹ nekondi gǎkɛ ɗengemisaga akɔ ɓó k'ína ékondi. Eya, eme Pɔ́lɔ, ne ye ngbɛga, na kɛ̌kɛnde ne phɔ́tɔ nto á mekakɔ ka nyɔngɔ á Kiísito Yéso.

¹⁰ Nekoɗengemisigi ka nyɔngɔ á Ɔnɛsímɔ, miki nɛmɔ á ka měma mmbé nɛntɔi wani ka mekakɔ.

¹¹ Mosá, ɗákátú na kantíti k'oɓɛ, kɛ̌kɛnde a ye gǎkɛ na kantíti k'oɓɛ na k'éme phɔtɔ.

¹² Cɔ, nenjisi mɔtɛ-akɔ, yɛ, a ye tɔ phaeka á měma ani.

¹³ Netókondi Ɔnɛsímɔ áikɛ bíbí ani ka gea, ámɔbɛɗaneɛgɛ k'ɔ́ma nɛkɔ mbenɔ nde ne suɓi á mekakɔ ka nyɔngɔ á Mbino-Ánjá.

¹⁴ Kétókondi gǎkɛ gea ka kema, kángá oɓɛ ɓeekea. Kétókondi nekososeɛ gea ɓonjánja ka phɔani, netókondi ndiu gea, ɓonjánja ndɔ, atókɛ ka měma akɔ sasakɔ.

¹⁵ Kǎsi ka nyɔngɔ índɔ unge Ɔnɛsímɔ ɗákatani n'oɓɛ ka mbenɔ ábɔa ka gea, ɓóɓɛ goto na yɛ esa bui.

¹⁶ Cɔ, kɛ̌kɛnde, nna ye tɔ ɓea nkɔɓɛ, anyɛ́nyi gǎkɛ nga, a ye muna-amasu ékondi phɛɛ. Eme nenkondi phɛɛ, oɓɛ nkonda goto phɛɛ, ɓea nkpa buakɛ, goto ɓea muna-amasu suɓi á Mɔkɔta.

¹⁷ Cɔ, aoɓá n'ɔmɔbɛɗi ɓea muna-amakɔ, mbɛɗa ɓ'eme.

¹⁸ Aoɓá na ɗákogi ajeɗe, kaɓɛ n'ana nyɔngɔ á phenda akɔ, bisa nndɔ ka mɔ̌ ani.

¹⁹ Eme Pɔ́lɔ aámbé neɗundu nyɔngɔ nde na njaga ani sasani gea: nekophendande. Oɓɛ gǎkɛ, kanisia gea, ona nyɔngɔ nɛmɔ nga, ɗékobikíí na mbino á ɓoamia.

²⁰ Eya dani, gea ka phɔani ɓó ka nyɔngɔ á Mɔkɔta. Phɔngisa měma ani suɓi ékondi ndea Kiísito.

²¹ Cɔ, nekoɗunɗui ka nyɔngɔ nde neoúba ɗoni gea, ɔtɔtɔkisande kema kɔnyɛ́nya nnde nekongoɗi.

²² Gǔ índɔ, ɓɔngisiaga phɔtɔ kani ɔma á tɔ̌. Nga, neseɓei te, Mokonga aɔ́kande ɛmɛmi nɛnu, â goto omojisa mɔtɛ-anu.

Mɔkɔ

²³ Epáphaa mmbé ɓena yɛ ka mekakɔ ka nyɔngɔ á Kiísito Yéso akosambei.

²⁴ Ɓadani ɓabɛɗanigi: Málikɔ, Aistákɔ, Dɛ́ma na Lóka, ɓánósambei phɔtɔ.

²⁵ Cɔ, ɓonjánja-ékondi ndea Mɔkɔta Yéso Kiísito, áɓɛ na ɓenu.