Málikɔ 9 - Ɔngana á Kɛ̌kɛ

¹ Mpɔ, Yéso â phɔtɔ ǒngoɗea te: «Nenóngoɗi ɗoni, ka ɓakpa nde ɓá wani, ɓákákuwɛku na ɓákáɔni koɓoamɛ ndea Mokonga ɓî akiɗiande na ɓukpɛkpɛ.»

Ékětia á keongi á Yéso

² Mbusa á ɓ'esa ngianjaga (6), Yéso áɔ̌bɛɗa Pɛ́tɛɛ, Yakɔ́ɓɔ na Yoáni. Áɔ̌sɔndɔɛa gǔ á mamba nde akoi. Ɓáoɓá sasaɓɔ. Wa, keongi á Yéso áǒketia mosá aɓɔ.

³ Bɔngɔ nɛkɛ â phɔtɔ ophenuaga, áoɓá ábu phɛɛ. Busumana í, ɓákáɔnimbɛ mɔnɔ kau ka mokonda ndee.

⁴ Mpɔ, ɓagoigi ɓáɔ̌ɓɔna Elía na Mósa na ɓáoaba na Yéso.

⁵ Pɛ́tɛɛ áongoɗea Yéso te: «Ngoisigi, aánjá ka ɓesu ika wani. Ɓɛ́phɛ̌kɛ ɛma isaɔ, moci k'óɓɛ, moci ka Mósa, moci goto ka Elía.»

⁶ Pɛ́tɛɛ ɗákáúbi nnde ayɔngi nga, yɛ na ɓadakɛ, ɗáɓátú na kɔɓɔɓɔkɔ phɛɛ.

⁷ Mpɔ, egugu áobika, iimbiɔ í áǒgbukumia. Ɓáɔɔ́ka ɛsɔ n'aotóka suɓi í gea: «Mmbé ande miki nɛmɔ ékondi, mɔ́kani yɛ.»

⁸ Kɛ̌kɛndɔ, ɓagoigi ɓáotimanaga, ɓákamɔnɛ ye nkpa ɓaangbo, ɓâ tɔ ɔmɔna Yéso, n'ajigi ye tɔ sasakɛ na ɓɔ.

⁹ Na ɓá phɔ́tɔ odida mamba, Yéso áɔ̌phɛa ɓagoigi gea, ɓákántɔ̌miɛ mɔnɔ nkpa kema ndɔ ɓáɔni na ka ɓî yɛ Muna-Nkpa ajujukande ka kukuwa.

¹⁰ Ɓagoigi ɓáoamba nyɔngɔ ndɔ. Mpɔ ɓâ gǎkɛ oúsianaga: «Yɔnga ímbɔ á jujúka ka kukuwa, ana kantíti sina?»

¹¹ Mpɔ, ɓáomúsia Yéso: «Eke nde ɓaɗundu-ɛɔphi ɓági te, Elía abikande phɔ́ mosá?»

¹² Yéso áǒsikisia te: «Eya, Elía abikande phɔ́ k'aphe á ɓɔngisiaga goto ánjá kema bui. Cɔ, eke nde Ɓuku á Mokonga aɗigimisi phɔtɔ gea te, eme, Muna-Nkpa, netambagande ásii, ɓáomotondea?

¹³ Nenóngoɗi ndiu gea, Elía a ye biki, ɓakpa ɓâ gǎkɛ ogea kema bui ka phɔakɛ ɓíndɔ ɗáɓákondi. Nndɔ ɗátú ɓíndɔ Ɓuku á Mokonga ayɔngi ka phɔakɛ.»

Yéso anamisi miki n'ana kukuwa á ɓansombo

¹⁴ Ɓî Yéso na ɓagoigi ndɔ ɓasaɔ ɓábiki ye bíbí á ɓadaɓɔ ɓagoigi, ɓáɔɔna usɛsɛ á ɓakpa na ɓáetimbi. Ɓaɗundu-ɛɔphi ɗáɓátú opúa na ɓɔ.

¹⁵ Ɓî usɛsɛ á ɓakpa ndɔ ɓámɔni Yéso, ɓáoagatana, ɓáobika mbangɔ ka sesea akɛ.

¹⁶ Yéso áǒɓúsia ɓagoigi nɛkɛ te: «Ɓoopúa na ɓɔ ka nyɔngɔ eke?»

¹⁷ Mpɔ, nkpa moci sɔsɔɓɛ á usɛsɛ á ɓakpa áonsikisia Yéso te: «Ngoisigi, nekobikíí na miki nɛmɔ nga, ana kukuwa á egǎ.

¹⁸ Ɔma bui nde kukuwa ndɔ aontena, áomaka ka oɗo, phû áonjuanaga miki, áoea minyɔ, nyama akɛ áotendemana. Netóengoɗi ɓagoigi nɛkɔ ɓáephúiɛ ɓansombo ndɔ, ɓákátɔkɛ.»

¹⁹ Yéso áǒngoɗea te: «Hoo! Ɓenu ɛɓɔkɔti á kanga ɓeekea nde ca! Ka mbenɔ ángaáni nde neikande na ɓenu? Ka mbenɔ ángaáni nde nenophiphiande? Cɔ, mbikani kani na miki ndɔɔ.»

²⁰ Ɓáombika na yɛ mɔtɛ á Yéso. Miki ndɔ amɔni ye Yéso, kɛ̌kɛndɔ ɓansombo ɓáonsuga miki akpɛ phɛɛ, áogua ka oɗo, áɔ̌gɛngɛaga na phû n'aonjuanaga.

²¹ Yéso áomúsia aba-miki ndɔ te: «A ye íphí na kukuwa nde?» Aba-miki áonsikisia te: «Kukuwa nde ankpangi ka koniki.

²² Mɔngɔ ásii, ɗátú phɔtɔ ontenaga ɓó, áommaka ka nsa, na suɓi á iɓo gea, ákuwɛ. Cɔ, a gǎkɛ oɓá n'ɔtɔkande ka kema, ɓeoɗengemisigi, ósokuia ngomi na ósoengɛ.»

²³ Yéso áonsikisia te: «Ogi te, aoɓá n'ɔtɔkande ka kema ka ɓo? Cɔ, kema bubui aɔtɔtɔkɛana ka nkpa nde ana ɓeekea.»

²⁴ Kɛ̌kɛndɔ, aba-miki áɔyɔnga akpɛ gea te: «Eya, neɓeeki! Ómoenga ka ngǎka nde ne phɔ́tɔ ně.»

²⁵ Yéso áɔ̌ɓɔna usɛsɛ á ɓakpa n'aóyamea. Kaɓondɔ, áǒkea ɓansombo, áǒgea: «Ɓenu ɓansombo á ko kaúma na ɓunde á kanga ɔ́kapha nde ca! Nenósosi, júanani suɓi á miki ndee. Ɓókósikiɛmbɛ ye ka yɛ.»

²⁶ Ɓansombo ndɔ ɓáonsuga phɛɛ, áokoga. Mpɔ, ɓáotóka suɓi akɛ. Nyama á miki ndɔ áotendemana ɓea nkpa n'aku, ɓakpa ɓáokanisia te aku.

²⁷ Yéso â gǎkɛ ɔmbɛɗa ka njaga, áommesa. Miki áoma.

²⁸ Yéso áoja mɔtɛ-akɛ, ɓagoigi nɛkɛ ɓáomúsia ka mpɛphɛ: «Nyɔngɔ sina nde ɓesu ɓékétɔtɔkisi phúia á ɓansombo suɓi á miki nde?»

²⁹ Yéso áǒsikisia te: «Nkókó á ɓansombo ndɔ ɓánáotóka kángá á mɛma á Mokonga.»

Yéso atɔ̌mi goto nyɔngɔ á kukuwa na jujúka akɛ ka kukuwa

³⁰ Ɓátóki ye wa, Yéso na ɓagoigi nɛkɛ ɓáɔmɛɛa, ɓáɔnyɛ́nyɛa ka Galiláya. Ɗáɓáge ka ɓɔsɔmɛa, ka nyɔngɔ nde Yéso ɗákákondi gea ɓakpa ɓáúbɛ.

³¹ Cɔ, nyɔngɔ nde Yéso ɗáǒgoisaga ɓagoigi nɛkɛ aungee: «Eme, Muna-Nkpa, ɓámongisande ka njaga á ɓakpa ɓunde ɓámomowande. K'ésa á ko isaɔ mbusa á kukuwa ani, nejujukande.»

³² Ɓagoigi ɗáɓáká gǎkɛ oengekisa kantíti á yɔnga ndɔɔ. Ɓáoɓánga úsia akɛ.

Ani mmbé aɓande gǔ á ɓadakɛ?

³³ Mbusa, ɓáokiɗia ka Kapɛɛnaúmu. Ɓáoika suɓi éndu. Mpɔ Yéso áǒɓúsia ɓagoigi nɛkɛ te: «Ɓotú ɔyɔngaga k'aphe gǔ éke?»

³⁴ Ɓagoigi nɛkɛ ɓâ gǎkɛ ɔphɔnga nga, ɗáɓátúopúa k'aphe gea te: «Ani mmbé a gǔ á ɓadakɛ?»

³⁵ Mpɔ, Yéso áoika ka oɗo, áɔ̌ɓɔphana ɓagoigi nɛkɛ nkama na ɓaɓɛ (12), áǒngoɗea te: «Aoɓá nkpa n'aokonda ɓá mɔkɔta, aɓande nkɔɓɛ á ɓɔbu, aɛbɛɗaneagande ɓɔbu.»

³⁶ Mbusa, Yéso áɔmbɛɗa miki abɔbɔa, áomesa sɔsɔɓɛ aɓɔ dɛ! Áonkotoa, áǒgea:

³⁷ «Nkpa nde ansesi miki abɔbɔa ɓea mmbé, ka nyɔngɔ á ina ani, amosesi eme. Cɔ, nkpa a ye omosesea, kámosesi tɔ eme, ansesi phɔtɔ mmbé amoteki.»

Nkpa nde nna mɓiɓia á Yéso ande ka ɓakpa nɛkɛ

³⁸ Mbusa á wa, Yoáni áongoɗea Yéso te: «Ngoisigi, ɓɛmɔni nkpa moci n'aóɓeaga ɓansombo k'ína akɔ, ɓê gǎkɛ onimisia, nga yɛ nna ka ɓesu.»

³⁹ Yéso â gǎkɛ ongea te: «Kónimisiɛmbɛ. Nga, nkpa nnaɔtɔtɔkisa ketangaɔ k'ína ani, mbusa í, áɔyɔnga ájeɗe ka phɔani.

⁴⁰ Kaɓondɔ, aoɓá nkpa na nna mɓiɓia nɛsu, ámbé a ndiu nkpa nɛsu.»

⁴¹ «Aoɓá nkpa n'anophi cǎ moci á iɓo á konoa ka nyɔngɔ nde ɓonde ɓakpa ndea Kiísito, nenóngoɗi ɗoni gea, nkpa ndɔ káúkɛku ophendɔ nɛkɛ.»

Ɓókongiɛmbɛ ka ɓojeɗe

⁴² A gǎkɛ oɓá nkpa n'abisi ephiphi ájeɗe gea te, ka ɓaniki ɓunde ɓámoɓeeki ɓáɓɛtɛkanɛ kau, akeni ɓámɓɔɛɛ nkpa ndɔ n'ɛtɛ ángbó ka kingo, ɓámakɛ k'óɓenge.

⁴³ A gǎkɛ oɓá n'ande njaga akɔ aunge aokogusa ka ɓojeɗe, tena ú ce! Nga, aánjá phɛɛ ngia ka enda á mɛyɔ na ona njaga moci tɔndɔ, kɔnyɛ́nya ɓá na njaga iɓɛ mbusa í, óoga ně na Gɛɛ́na nji á ɓasí, ɓunde ɓáotambaga k'ɛ́ɛmbɛ á nsa. Nsa ndɔ nnaoímika. [

⁴⁴ Kó, ana ɓanguja nde ɓákáokuwa, a phɔtɔ na nsa nde nna tanda koímika.]

⁴⁵ A phɔtɔ oɓá n'ande ecinji akɔ aunge aokogusa, tena ú cé! Nga, aánjá k'óɓɛ ngia ka enda á mɛyɔ n'ona kiɗɔti kɔnyɛ́nya ɓá n'ecinji iɓɛ, mbusa í, ɓáokomaka ně ka Gɛɛ́na. [

⁴⁶ Kó, ana ɓanguja nde ɓákáokuwa, a phɔtɔ na nsa nde nna tanda koímika.]

⁴⁷ A phɔtɔ oɓá, n'ande iso akɔ moci, aunge aokogusa, phongota ú, ómakɛ ɗanga. Nga, aánjá k'óɓɛ ngia ka koɓoamɛ ndea Mokonga n'íso moci, kɔnyɛ́nya ɓá n'íso iɓɛ, ɓáokomaka ně ka Gɛɛ́na,

⁴⁸ oma nde ana ɓanguja nde ɓákáokuwa, a phɔtɔ na nsa nde nna tanda koímika.

⁴⁹ Nga, ɓánciciande nkpa buakɛ na nsa ɓíndɔ ɓáocicia mɔnɛi ka eea.

⁵⁰ Cɔ, mɔnɛi ande kema ánjá. A gǎkɛ oɓá mɔnɛi na nna ye na ɓɔɛkɛ nɛkɛ, eke nde aɛkɛmisande? Ɓáni sɔsɔɓɛ anu ɓea mɔnɛi. Ande gea te endani ka ɓujɛjɛ sɔsɔɓɛ anu.