Málikɔ 7 - Ɔngana á Kɛ̌kɛ

Asii ndea Ɓayúda n'ɛɔphi ndea Mokonga

¹ Esa moci, Ɓaphaisáyɔ na ka ɓaɗundu-ɛɔphi ɓunde ɗáɓátóki na Yɛusalɛ́ma, ɗáɓádondanigi mosá á Yéso.

² Ɓáɔ̌ɓɔna ka ɓagoigi ndea Yéso na ɓáoeaga njaga aɓɔ n'ajɔɔkani, ande gea te kángá á sokosa á njaga ɓíndɔ asii nɛɓɔ asosi.

³ Nga, Ɓaphaisáyɔ ɓea Ɓayúda ɓɔbu, ɓákáoeaga kángá á sokosa á njaga ánjá. Nndɔ ande asii á ɓatataɓɔ.

⁴ A phɔtɔ ɓó aoɓá na ɓátóki ka mosomba, ɓákáoeaga kángá á sokosa njaga. Ɓá phɔtɔ oɓea moangɔ ásii á asii nɛɓɔ ɓea: Sokosa á kiɓe, mbeka-toko na mbeka nde ɓáconji na ngɔa.

⁵ Kaɓondɔ unge, Ɓaphaisáyɔ na ɓaɗundu-ɛɔphi ɓáomúsia Yéso te: «Ka nyɔngɔ éke nde ɓagoigi nɛkɔ ɓánáoɓea asii ndea ɓatatasu, ɓáoeaga kángá á sokosa á njaga aɓɔ ka ɓo?»

⁶ Yéso áǒsikisia te: «Ɓato á maibe nde ca! Isáya ɗági ánjá ka tɔ̌mia á nyɔngɔ ka phɔa anu nga ɗáɗundu: ‹Mokonga ayɔngi ɓe: ɓakpa nde ɓá tɔ omoɗokomisa k'aphenɔkɔ, měma aɓɔ a gǎkɛ ɗanga n'eme.

⁷ Obebɔ nɛɓɔ k'éme a tɔ á jǎi nga, goisaga nde ɓáogoisaga a tɔ á kokpa.›»

⁸ Yéso â goto ǒngoɗea te: «A phɔtɔ ɓó ka ɓenu. Ɓoɗeketi ɛɔphi ndea Mokonga, ɓóotetemisa asii á kokpa.

⁹ Eya, ɓogi ánjá ka ya ɛɔphi ndea Mokonga ka gea te ɓótetemisɛ asii nɛnu.

¹⁰ Cɔ, Mósa ɗáyɔngi gea: ‹Nɗokomisa abakɔ n'amakɔ.› Ɗáyɔngi phɔtɔ: ‹Mmbé aɔmphɔ́ta abakɛ, kaɓɛ amakɛ ɓámmowɛ, ákuwɛ.›

¹¹ Cɔ, ɓenu ɓɔɔyɔnga gea, nkpa aɔtɔka n'angoɗi abakɛ kaɓɛ amakɛ gea: ‹Nkumba bui nde neně ka enga akɔ, nebisi ye ú ka Kɔɔbani (ande gea te, nebisi ú k'ɛkɔmi ka Mokonga).›

¹² Aoɓá n'ayɔngi ɓo, ɓóonsosea nkpa ndɔ gea, kageɛ kema ka ɓaɓɔkɔti akɛ.

¹³ Kaɓondɔ, ɓomowe nyɔngɔ á Mokonga ka nyɔngɔ á asii nde ɓoophánaga. Ɓo phɔtɔ ogea kema ásii nnde akengeani ně.›»

Kema ɗanga-ɗanga nde aɔnjɔɔkisa nkpa

¹⁴ Mbusa á wa, Yéso â goto kɔ ɔphana usɛsɛ á ɓakpa, áǒgea te: «Ɔ́mɔɔ́kani ánjá ɓenu ɓɔbu, engekisani ɓoabi ndee:

¹⁵ Nna kema nde nkpa aoea aunge aɔnjɔɔkisa mosá á Mokonga. A ndiu nnde aojuana suɓi akɛ aunge aɔnjɔɔkisa. [

¹⁶ Mmbé ana kecue ka ɔkapha, áɔ́kɛ.]»

¹⁷ Wa, Yéso áoɗeketa usɛsɛ á ɓakpa, áongia k'éndu. Mbenɔ nde angí, ɓagoigi nɛkɛ ɓáomúsia kantíti á mɛní ndɔɔ.

¹⁸ Yéso áǒsikisia te: «Ɓenu phɔtɔ, ɓókóoúbapha? Ɓókóoengekisa gea, kema nde aotóka na nsɛngɛ n'angí suɓi á nkpa nnaɔtɔka na anjɔɔkisi?

¹⁹ Nga, eea nna ongia suɓi á měma á nkpa. A ndiu ongia suɓi á sɔphɔ. Mbusa, eea ndɔ áoga ka ɓɔɔga.» Ka yɔnga akɛ ɓó unge Yéso ɗáengekisi gea, ɓakpa ɓáeɛ eea bui.

²⁰ Yéso â goto ogea te: «Kema nde aotóka suɓi á nkpa, aunge aɔnjɔɔkisa.

²¹ Nga, suɓi á měma á nkpa, aunge kanisia ájeɗe aojuana kaɓɛ: mambɔ, kuɓa, mowa á nkpa,

²² gúa n'etoa, kuma, kokae, maibe, iɛɓɛ, nsengo, ɛphɔti, ébeba, kobóbó.

²³ Kema ájeɗe-jeɗe ndɔ bui a ye ojuana suɓi á nkpa, áɔnjɔɔkisa.»

Nke nde nna Moyúda amɓeeki Yéso

²⁴ Yéso, atóki ye na Galiláya, áoga ka phaeka á ntanga-nji á Tílɔ. Akiɗi ye, áongia suɓi éndu. Ɗákákondi ɓakpa ɓáúbɛ nndɔ. Nanga a ɓó, nyɔngɔ á kiɗia akɛ áoúbikana.

²⁵ Nke moci mmbé nseka nɛkɛ ɗátú na kukuwa á ɓansombo, áɔɔ́ka nyɔngɔ á Yéso, kɛ̌kɛndɔ áombikia, áogua k'écinji akɛ.

²⁶ Nke ndɔ ɗákátú Moyúda, ɗátú ndiu nto á ka ntanga-nji á Phɔinikía ka nji á Sulía. Yɛ, áonɗengemisaga Yéso gea, étokisɛ ɓansombo suɓi á nseka nɛkɛ.

²⁷ Yéso â gǎkɛ onsikisia te: «Ɓeekea phɔ́ gea, ɓaniki ɓákutɛ. Nga, nna na kantíti ka bɛɗa eea nɛɓɔ, óǒmakea ɓaniki á mbwa.»

²⁸ Nke ndɔ áonsikisia te: «Eya Mɔkɔta, ɓaniki á mbwa ndiu tɔ ɓáunge ɓáoea phúnju-phúnju nde ɓaniki ɓáogusa kusi á mɛja.»

²⁹ Mpɔ, Yéso áonsikisia te: «Ka nyɔngɔ á ɓoabi ndɔ ɔyɔngi, gǎ, ɓansombo ɓájuani suɓi á nseka nɛkɔ.»

³⁰ Nke ndɔ áoja mɔtɛ-akɛ, áondonda anakɛ n'ěnanu k'éka, ɓansombo na ɓájúani ye suɓi akɛ.

Yéso anamisi nɗakekanigi-kecue

³¹ Mbusa á wa, Yéso áotóka ka phaeka ntanga-nji á Tílɔ, áɔnyɛ́nya ka Sidɔ́na, na ka Ntanga-nji nkama, ka gǎ jua n'etǔ Galiláya.

³² Kó, ɓáombikia na nɗakekanigi-kecue, n'ande phɔtɔ kauma. Ɓáonɗengemisaga ka gea te, ámbisiɛ njaga.

³³ Yéso â gǎkɛ ɔmbɛɗa nkpa ndɔ ka nkíndí á ɓakpa, áonga ně ka mpɛphɛ, áongisa njaga ka kecue akɛ, áosúa sóki ka njaga, áonsia nkpa ndɔ k'éɗáka.

³⁴ Mpɔ, áoenga na koba, áosúa ɛphɛu. Mpɔ áongoɗea nkpa ndɔ k'ɛ́yɔngɛi nɛkɛ: «Ɛphata» Ande gea: «Kóɗokana!»

³⁵ Kɛ̌kɛndɔ, kecue á nkpa ndɔ áoúkukana. Aphenɔkɔ akɛ áokoɗokana. Aɔyɔnga ánjá.

³⁶ Yéso â gǎkɛ ǒngoɗea te, ɓákantɔ̌miɛ mɔnɔ nkpa. Cɔ, nanga ɓî aengoɗi gea, ɓákantɔ̌miɛmbɛ nkpa, ɓâ ndiu oga na ɓáɔ̌tɔmia ɓakpa phɛɛ.

³⁷ Ɓakpa ɓáotangaaga phɛɛ. Ɓáogea te: «Aɔtɔtɔkisa kema bui ánjá phɛɛ. Ɓaɗakekanigi-kecue ɓá ye tɔ ɔɔ́kapha na ɓakauma ɓá ye tɔ ɔyɔnga.»