Málikɔ 3 - Ɔngana á Kɛ̌kɛ

Yéso anamisi nkpa njaga akɛ n'aphɛphi

¹ Mbusa í, Yéso â goto ongia suɓi éndu á madondanɔ ndea Ɓayúda ka nyɔngɔ á Mokonga. Kó, nkpa moci ɗátú na njaga akɛ n'aphɛphi.

² Ɓaphaisáyɔ nde ɗáɓátú wa ɓâ gǎkɛ ɔmɔɔnjia bîbíbí ka gea te, ɓáɔnɛ phɔ́ aoɓá n'anamisande nɗɔti ndɔ esa á saɓáto mpɔ, ɓáɓɛ ye tɔ na nyɔngɔ á tɔnga akɛ ně.

³ Yéso â gǎkɛ ongoɗea nɗɔti te: «Má mosá á ɓakpa!»

⁴ Mpɔ áǒɓúsia te: «Cɔ, kema sina ɛɔphi nɛsu asosi gea í k'ésa á saɓáto? Kaɓɛ gea kema ánjá, kaɓɛ gea kema ájeɗe? Kaɓɛ amisa á nkpa, kaɓɛ kusa akɛ?» Ɓakpa ɓɔbu ɓâ gǎkɛ ɔkɔɓa phio!

⁵ Yéso áǒtimba n'íso áǒenga n'esúia, áoɓá na ɓɔmbɛ ka nyɔngɔ á měma aɓɔ akpɛ. Áongoɗea nɗɔti te: «Cɔ, nanoa njaga akɔ.» Áonanoa njaga akɛ, áoama.

⁶ Kɛ̌kɛndɔ, Ɓaphaisáyɔ ɓáojuana, ɓáoga odondana na ɓakpa ndea Moamɛ Ɛlɔ́dɛ ka maca. Ɓáokaɓa moangɔ á kusisa á Yéso.

Usɛsɛ á ɓakpa ɓáomɓea Yéso

⁷ Yéso na ɓagoigi nɛkɛ ɓâ gǎkɛ otóka sɔsɔɓɛ á ɓakpa ndɔɔ. Ɓáoga ka mpɛphɛ á etǔ á ka Galiláya. Ɓakpa ɓásii phɛɛ ɓáomɓea na ɓátóki na Galiláya, Yudɛ́a,

⁸ Yɛusalɛ́ma, phaeka á ntanga-nji á Idumɛ́a, ntanga-nji á kubi á iɓo Yɔɔdáni na ɓunde á ka mpɛphɛ á ntanga-nji á Tílɔ n'índe á ka Sidɔ́na. Ɓɔbu ɓáombikia Yéso nga, ɗáɓáɔ́ki ekuma bui nde ɗátúogea.

⁹ Cɔ, Yéso áǒngoɗea ɓagoigi nɛkɛ, ɓábisɛ kakɛ koko ka gea, ɓakpa ɓákámɓɔkanisɛmbɛ.

¹⁰ Ɓáɔni ye ɓî Yéso aéamisi ɓakpa ɓásii, ɓasambi ɓɔbu ɓáokamisaga sɛkɛɗa ka mpɛphɛ akɛ ka gea, ɓɔbu ɓámbooɛ ka yɛ.

¹¹ Ɓuangbo ɗáɓátú na kukuwa á ɓansombo. Ɓansombo ndɔ, ɓî ɓámɔni ye Yéso, ɓáogua k'écinji akɛ, ɓáokoga, ɓáogea: «Oɓɛ onde Muna-Mokonga.»

¹² Yéso â gǎkɛ ǒimisia akpɛ gea, ɓákaúbisɛmbɛ gea, ande Muna-Mokonga.

Yéso aɛsɔmbu ɓateki nɛkɛ

¹³ Mpɔ Yéso áotáia gǔ á mamba, áɔ̌ɓɔphana ɓunde ɗékondi sɔmbɔa ka ɓɔ ka usɛsɛ á ɓakpa ndɔ, ɓáoga kuɓî yɛ aɔ.

¹⁴ Aɔ̌sɔmbɔa sɔsɔɓɛ aɓɔ ɓakpa nkama na ɓaɓɛ (12), áǒsua ɓateki nɛkɛ ka gea ɓátambɛ kimoci na yɛ na teka aɓɔ ka gǎ á phɛá ɓakpa.

¹⁵ Â phɔtɔ ǒɓopha kɔkɔta á ɓeaga á ɓansombo suɓi á ɓakpa.

¹⁶ Ɓateki nɛkɛ nkama na ɓaɓɛ (12) ɓunde ɗɛ́sɔmbu ina aɓɔ aungee: Simɔ́ni mmbɔ Yéso ɗánsu Pɛ́tɛɛ,

¹⁷ Yakɔ́ɓɔ muna Jɛbɛdáyɔ, na muna-amakɛ Yoáni (ɓundɔ ɓaɓɛ ndɔ, Yéso ɗáesǔ ina Bɔanɛ́gɛ, ande gea te: «ɓáoka á mbua»),

¹⁸ Andeé, Philípɔ, Batɔlɔmáyɔ, Matáyɔ, Tɔmá, Yakɔ́ɓɔ muna Alpháyɔ, Tadɛ́yɔ, Simɔ́ni, manei ekuna nɛkɛ,

¹⁹ na Yúda-Isikaliɔ́ta, mmbé ɗántɔngi Yéso.

Ɓato á k'ékombo ndea Yéso ɓágeombɛɗa

²⁰ Mpɔ, Yéso na ɓagoigi nɛkɛ, ɓáosikianaga mɔtɛ-aɓɔ. Ɓakpa ɓásii ɓâ goto odondana kó na ka ɓî Yéso na ɓagoigi nɛkɛ ɓákáɓɛ ye na ɔma á eaga.

²¹ Mbenɔ nde ɓato á k'ékombo nɛkɛ ɓáɔ́ki ye nyɔngɔ ndɔ, ɓáoga k'aphe á bɛɗa akɛ nga, ɗáɓáogea: «Mɔ̌ akɛ nna ye ánjá.»

Ɓánsǔ Yéso Bɛljɛbúli

²² Mpɔ, ɓaɗundu-ɛɔphi ɓunde ɓátóki na Yɛusalɛ́ma ɓáogea: «Bɛljɛbúli, mɔkɔta á ɓansombo, a suɓi á Yéso. Yɛ aǒjuanisa ɓansombo ka ɓukpɛkpɛ á Bɛljɛbúli.»

²³ Yéso â gǎkɛ ɔ̌ɓɔphana, áǒngoɗea mɛní ndee: Cɔ, Sɛtáni aɔtɔka n'ěɓigi sasakɛ ɓo?

²⁴ Nga aoɓá ɓakpa á ka koɓoamɛ moci na ɓákatanigi ngǔngu aɓɔ, koɓoamɛ ndɔ kámɛku.

²⁵ A phɔtɔ oɓá ɓato á ekombo moci na ɓákatanigi ngǔngu aɓɔ, ekombo ndɔ kámamɛku.

²⁶ Aoɓá Sɛtáni n'aǒmanisa sasakɛ, ɓukpɛkpɛ nɛkɛ n'akatanigi, koɓoamɛ nɛkɛ kámɛku. A ye tɔ sungiaga akɛ.

²⁷ «Cɔ, nkpa nnaɔtɔka n'angí suɓi éndu ndea nto á ɓukpɛkpɛ ka uta nkumba nɛkɛ na kámɓóegembɛ phɔ́. A ye omɓóaga, mpɔ amutande nkumba nɛkɛ.

²⁸ Nyɔngɔ nde nɛɔnɔtɔmia, ande ɗoni. Mokonga aímande ɓojeɗe bui ndea ɓakpa, na mbóma bui nde ɗáɓámbómi ně.

²⁹ Nkpa nde a gǎkɛ ombóma Měma á kanga ɓojeɗe, Mokonga káímɛeka tanda ɓojeɗe ndɔ. Ɓojeɗe nɛkɛ aikande mɛyɔ.»

³⁰ Yéso ɗéngoɗi ɓo nga, ɗáɓági te: «Ɓansombo ɓáiki suɓi akɛ.»

Ɓana-amakɛ na Yéso ɓánde ɓa ani?

³¹ Mpɔ, ama-Yéso na ɓana-amakɛ, ɓáobika omama ka nsɛngɛ. Ɓáonteka nkpa ka ɔphana akɛ.

³² Usɛsɛ á ɓakpa ɗáɓántimbi Yéso, ɓâ gǎkɛ ongoɗea te: «Cɔ, amakɔ, na ɓana-amakɔ, ɓá na nsɛngɛ, ɓáokokaɓa.»

³³ Aǒsikisia te: «Ayi na ɓana-ayi ɓánde ɓa ani?»

³⁴ Mpɔ, áǒtimba n'íso ɓakpa ndɔ ɗáɓántimbi, áǒngoɗea te: «Ayi na ɓana-ayi ɓáungee.

³⁵ Nga, nkpa nde aotambea ɓíndɔ Mokonga akondi, mmbɔ aámbé ande muna-ayi, áwáni na ayi.»