Málikɔ 2 - Ɔngana á Kɛ̌kɛ

Yéso anamisi nɗɔti

¹ Mbusa á ɓ'esa ábɔa, Yéso áosikianaga na Kapɛɛnaúmu. Ɓakpa ɓáɔɔ́ka te a mɔtɛ-aɓɔ.

² Kaɓondɔ, ɓakpa ɓásii ɓáodondanaga wa, na ka ɓî ɓakpa ɗáɓáɓɔkani suɓi éndu phɔtɔ k'íso á mpume, Yéso n'aɔ̌phɛa nyɔngɔ á Mokonga.

³ Mpɔ ɓakpa gena ɓáobika mɔtɛ á Yéso na ɓánkumbigi nɗɔti.

⁴ Ɗáɓákátɔki gǎkɛ bîmisia á Yéso ka nyɔngɔ á ɓika á ɓakpa. Kaɓondɔ, ɓáoɗapha gǔ á endu, ɓáobaa ntɔndɔ, ɓáondidisa nɗɔti ka nsinɔ n'aɗe k'éka.

⁵ Yéso aɔni ye ɓeekea nɛɓɔ, áongoɗea nɗɔti te: «Mukuamɔ, ɓojeɗe nɛkɔ aímiki.»

⁶ Cɔ, ka ɓaɗundu-ɛɔphi ɓunde ɗáɓáiki wa, ɓáoianaga suɓi aɓɔ te:

⁷ «Mogaa nde ayɔngi ɓo ka ɓo? Ambómi Mokonga nga, ani mmbé aɔtɔka n'aími ɓojeɗe na nna tɔndɔ Mokonga sasakɛ?»

⁸ Kɛ̌kɛndɔ Yéso áoúba ianaga aɓɔ. Mpɔ, áǒngoɗea: «Ɓona ianaga ndɔ ka měma anu ka ɓo?

⁹ Cɔ, kema sina nde aáphǒ ka ngoɗea á nɗɔti te: ‹Ɓojeɗe nɛkɔ aímiki›, na yɔnga: ‹Má, kumba kɛsɛ nɛkɔ, ótambɛ›?

¹⁰ Ka gea ɓóúbɛ te, eme Muna-Nkpa, nena kɔkɔta á ima á ɓojeɗe ka mokonda.» Mpɔ, áǒpháia, áongoɗea nɗɔti te:

¹¹ «Má, bɛɗa kɛsɛ nɛkɔ, ósikianɛgɛ mɔtɛ-akɔ.»

¹² Mɔngɔ moci, áoma, áokumba kɛsɛ nɛkɛ, áojuana mosá á ɓakpa ɓɔbu. Ɓɔ, ɓáotangaaga, ɓáombeba Mokonga, ɓáogea: «Ɓékéɔnimbɛ mɔnɔ k'índe!»

Yéso amɔphani Láwi

¹³ Yéso â goto oga ka mpɛphɛ á etǔ Galiláya. Ɓakpa ɓásii ɓáobika ondonda. Yɛ, áǒgoisaga.

¹⁴ Cɔ, ɓî ɗátúotamba, áɔmɔna Láwi, Muna Alpháyɔ, n'aiki ka ntua á phendisaga á manjanja. Yéso áɔmɔphana, áongea: «Ómoɓea!» Kɛ̌kɛndɔ, Láwi áoma, áomɓea.

¹⁵ Mbusa, Yéso áoeaga mɔtɛ á Láwi. Ɓaphendisigi-manjanja ɓásii na ɓato á ɓojeɗe ɓáoeaga kimoci na Yéso na ɓagoigi nɛkɛ nga, ɓakpa ɓásii á etéte ndɔ unge ɗáɓáomɓea.

¹⁶ Ɓaphaisáyɔ ɓunde ɓánde ɓaɗundu-ɛɔphi ɓáɔni ye ɓî Yéso ɗátú oeaga na ɓato á ɓojeɗe na ɓaphendisigi-manjanja, ɓáǒngoɗea ɓagoigi nɛkɛ te: «Ka nyɔngɔ sina nde Yéso aoeaga na ɓaphendisigi-manjanja na ɓato á ɓojeɗe?»

¹⁷ Yéso aɔ́ki ye músiɔ nɛɓɔ, áǒgea: «Ɓasambi ɓáunge ɓána siki á nsaku. Nna ɓunde ɓánáosamba. Kébiki k'aphe á ɔphana á ɓato á ɓonjánja. Nebiki ndiu ka ɔphana á ɓato á ɓojeɗe.»

Yéso aɔphɛa ka nyɔngɔ á ika kángá á eaga ka nyɔngɔ á mɛma á Mokonga

¹⁸ Esa moci, ɓagoigi ndea Yoáni na Ɓaphaisáyɔ ɓáoika kángá á eaga ka nyɔngɔ á mɛma á Mokonga. Kaɓondɔ, ɓakpa ɓáondonda Yéso, ɓáomúsia te: «Nyɔngɔ sina nde ɓagoigi ndea Yoáni na Ɓaphaisáyɔ, ɓáoika kángá á eaga ka nyɔngɔ á mɛma á Mokonga, ɓagoigi nɛkɔ ɓákáogea ɓó ka ɓo?»

¹⁹ Yéso áǒsikisia te: «Ɓato á ɛkɛka ɓáikimbɛ mɔnɔ kángá á eaga na mǒko-ɛ́kɛka a kimoci na ɓɔ? Ɓɛɛndɔ. Ka mbenɔ bui nde mǒko-ɛ́kɛka a kimoci na ɓɔ, ɓánáɔtɔka na ɓáiki kángá á eaga.

²⁰ Aɓande n'esa nde ɓámphúiande mǒko-ɛ́kɛka sɔsɔɓɛ aɓɔ, k'ésa ndɔ unge ɓáikande kángá á eaga.»

²¹ «Nna na nkpa nde aophopha phaeka á bɔngɔ á kɛ̌kɛ gǔ á bɔngɔ á kala. Aogea ɓó, phaeka á bɔngɔ á kɛ̌kɛ nnde ɓáyami abomande nnde á kala, bomoka í áondanda phɛɛ.

²² Nna phɔtɔ na nkpa nde aoɗukia divai á kɛ̌kɛ suɓi á mboso á kala nnde ɓáɓɔngisigi na mpoko á nyama. Aogea ɓó, divai á kɛ̌kɛ abomande mboso. Divai na mboso bui áoújukana. Akeni ndiu ɗukia á divai á kɛ̌kɛ suɓi á mboso á kɛ̌kɛ.»

Yéso ande Mɔkɔta á saɓáto

²³ Esa á saɓáto, Yéso na ɓagoigi nɛkɛ ɗáɓáɔnyɛ́nya ka ciko á nganɔ. Ɓagoigi nɛkɛ ɓáokpanga kɔɗaga á mbuka í ka mpɛphɛ á aphe.

²⁴ Mpɔ, Ɓaphaisáyɔ ɓáongoɗea Yéso te: «Ɛnjia phɔ́! Ɓagoigi nɛkɔ ɓáɔbɛɗanaga esa á saɓáto na ɓáphení bɛɗanaga k'ésa ndɔ ka ɓo?»

²⁵ Yéso áǒsikisia te: «Ɓókótangimbɛ mɔnɔ kema nde Daúdi na ɓakpa nɛkɛ ɗáɓági mbenɔ nde ɗáɓáku na nja?

²⁶ Ɗátú mbenɔ nde Abiatáli ɗátú ngbɛga á ɓatoɓeigi-phɛ́a. Ka nyɔngɔ á nja, Daúdi ɗángí suɓi éndu ndea Mokonga, áoea mokati á ɔphɛɔ. Â phɔtɔ ǒgabea ɓakpa nɛkɛ. Nanga eea ndɔ ɗátú tɔ ka ɓatoɓeigi-phɛ́a sasaɓɔ.»

²⁷ Yéso â phɔtɔ ɔ̌tɔmia te: «Mokonga ɗábisi saɓáto ka phɔa á nkpa. Ɗákámbisi gǎkɛ nkpa ka phɔa á saɓáto.

²⁸ Úbani gea te, Muna-Nkpa aámbé ande phɔtɔ Mɔkɔta á saɓáto.»