Málikɔ 16 - Ɔngana á Kɛ̌kɛ

Yéso ajujúki ka kukuwa

¹ Saɓáto asi ye, Salɔ́mɛ, Malía Magadála, na Malía ama-Yakɔ́ɓɔ, ɗáɓásombi nkoki ka gǎ á saɓisa na mǒnda á Yéso.

² Aɓi ye esa á yenga kamɓimba, ka juana á maní, ɓáoga ka bóta.

³ Ɓáoúsianaga te: «Cɔ, ani mmbé atingisiande k'asu etae k'aphe á iso á bóta?»

⁴ Ɓî ɓákiɗi ye, ɓáoenga, ɓáɔɔna gea te, ɛtɛ angbóngbó ndɔ ɗáɓátiɓi ú ka mpɛphɛ.

⁵ Mpɔ, ɓáongia suɓi á bóta, ɓáɔmɔna moganda moci n'aiki ka njaga á mǔku, n'aɔ́li ngɔ́mbɛ ábu. Ɓáoyayama.

⁶ Mpɔ, moganda ndɔ áǒngoɗea te: «Ɓókóɓɛmbɛ na kɔɓɔɓɔkɔ. Yéso ɓa Najalɛ́ti, mmbɔ ɗáɓánkɔkɛigi gǔ á moyangɔ, aámbé ɓoonkaɓa. Ajujúki gǎkɛ ka kukuwa. Ɔma nde ɗáɓábisi mǒnda akɛ aungee. Nna ye wa.

⁷ Gǎni ndiu ɓóóngoɗeɛ ɓagoigi nɛkɛ, phɔtɔ Pɛ́tɛɛ gea te, agě mosá aɓɔ na Galiláya. Kó unge ɓɔmɔnande ɓíndɔ Yéso ɗánongoɗi.»

⁸ Ɓake ndɔ ɓáojuana ka bóta, ɓáoga mbangɔ. Ɗáɓáɔkpɔkpɔmaga, ɓáoyayama. Ɗáɓákámúbisi nkpa nyɔngɔ ndɔ nga, ɗáɓá na kɔɓɔɓɔkɔ. [

Yéso ěphangisi ka Malía Magadala

⁹ Yéso ɗájujúki ye ka kukuwa, kamɓimba esa á yenga, â phɔ́ ǒphangisia ka Malía Magadala, mmbɔ ɗámphúi ɓansombo.

¹⁰ Yɛ áoga ɔ̌tɔmia ɓunde ɗáɓátú na Yéso, kuɓî ɗáɓátú ogáma ka kekusa.

¹¹ Ɓî ɓáɔ́ki ye Malía n'ěngoɗi gea, amɔni Yéso n'aoenda, ɓɔ ɗáɓákáɓeeki yɔnga nɛkɛ.

Yéso ěphangisi ka ɓagoigi ɓaɓɛ

¹² Mbusa á wa, ɓagoigi ɓaɓɛ ɗáɓátú otoka ka ntanga-nji, Yéso áǒkiɗianea ka keongi nɛngbo.

¹³ Ɓáoja, ɓáɔ̌tɔmia ɓadaɓɔ. Ɓákěɓeekeɛ phɔtɔ ɓundɔ.

Yéso ěphangisi ka ɓagoigi nkama na moci (11)

¹⁴ Ka sungiaga, Yéso áǒphangisia ka ɓagoigi nɛkɛ nkama na moci (11) na ɓáoeaga. Yéso áǒkeea ka nyɔngɔ á kanga ɓeekea nɛɓɔ. Měma aɓɔ ɗágbagi phɔtɔ nga, ɗáɓákáɓeeki ɓî ɓadaɓɔ ɗáɓěngoɗi gea, ɓámɔni Yéso mbusa á jujúka akɛ ka kukuwa.

¹⁵ Mpɔ, Yéso áǒngoɗea: «Gǎni ka mokonda bui, ɓɔ́tɔ̌miɛ ɓakpa ɓɔbu Mbino-Ánjá ndea Mokonga.

¹⁶ Nkpa nde aɓeekeande, ɓáomɓatisa, yɛ aámbé Mokonga anamisande. Cɔ, mmbé káɓeekeɛku, Mokonga atenande nyɔngɔ nɛkɛ akpɛ.

¹⁷ Ɓágeande ketangaɔ ndee: Ka ina ani, ɓáphúiande ɓansombo suɓi á ɓakpa, ɓáyɔngande k'ɛ́yɔngi á kɛ̌kɛ.

¹⁸ Ɓáedungande ɓanjɔka. Aoɓá na ɓánu kema nde nkpa aokuwa ně, kéegeɛku kema. Ɓábisande njaga aɓɔ gǔ á ɓasambi, ɓundɔ ɓáoama.»

Yéso atái na koba

¹⁹ Ɓî Mɔkɔta Yéso agɔɓi ye ngoɗea aɓɔ ɓó, Mokonga áontáisa na koba. Yɛ, áoika ka njaga á mǔku á Mokonga.

²⁰ Ɓagoigi gǎkɛ, ɓáoga ɔtɔmiaga Mbino-Ánjá k'ɔ́ma bui. Mɔkɔta Yéso áoɓá na ɓɔ k'ékuma bui. Áoɗokomisa ɓɔphɛi nɛɓɔ ka ketangaɔ nde ɗáɓátú ɔtɔtɔkisa.]