Málikɔ 14 - Ɔngana á Kɛ̌kɛ

Maca á mowa á Yéso

¹ Cɔ, ɗájigi ye tɔ esa iɓɛ mosá á maseye á mokati, nnde Ɓayúda ɗáɓáɔɔphana Pasáka. Ɓagbɛga á ɓatoɓeigi-phɛ́a na ɓaɗundu-ɛɔphi, ɗáɓáɔɓɔgɔmɛaga mowa á Yéso.

² Ɓáoianaga te, kákeni dunga akɛ ka mbenɔ á maseye ka gea, ɓakpa ɓákayombokɛmbɛ.

Nke moci aɗuki nkoki ka mɔ̌ á Yéso

³ Wandɔ, Yéso ɗátú na Bɛtanía, k'éndu ndea Simɔ́ni, mmbé ɗáami na kukuwa á sǔ. Mbenɔ nde ɗáɓátú oeaga, nke moci áongia kuɓî ɓáiki. Ɗátú na nkoki á Nadɔ, nnde ɗáɓáɓɔngisigi ánjá na esombi í ɗátú akpɛ phɛɛ. Áɔpɛpa ngbanda á nkoki ndɔ, áoɗukia ka mɔ̌ á Yéso.

⁴ Ka ɓakpa nde ɗáɓátú wa, ɓáɔɓɛa, ɓáoúsianaga gea: «Nkoki nde atukani jǎi! Cɔ, ana kantíti sina?

⁵ Ɓátú ndiu osombisa ka imɔna mia isaɔ (300), ɓágabɛ ú ka ɓaúki.» Kaɓondɔ unge, ɗáɓámphekeigi nke ndɔ phɛɛ.

⁶ Mpɔ, Yéso áǒngoɗea te: «Nkambani nke ndɔ, phio! Ɓoma ontambisaga ka ɓo? Amogǐí ánjá phɛɛ.

⁷ Nga, esa bui, ɓoɓande na ɓato á ɓuyɛnɛ. Ɓǒgeeande ánjá ɓíndɔ ɓokondi. Eme gǎkɛ, kéɓɛku ye na ɓenu esa bui.

⁸ Nke nde agi nnde atɔki. Amosǐ nkoki ka ɓɔngisiaga á nyama ani mosá á úmba ani.

⁹ Nenóngoɗi ɗoni gea, ɔma bui nde ɓátɔmiagande Mbino-Ánjá nde ka mokonda, ɓátɔmiagande kema nde nke nde agi na ɓánkanisiande.»

Maca ndea Yúda

¹⁰ Mbusa á wa, Yúda Isikaliɔ́ta, mmbɔ ɗátú ka ɓagoigi nkama na ɓaɓɛ (12), áoga ǒdonda ɓaamɛ á ɓagbɛga á ɓatoɓeigi-phɛ́a ka phangia aɓɔ aphe á dunga á Yéso.

¹¹ Ɓagbɛga ndɔ ɓáoɓá na maseye phɛɛ ka ɔ́ka á nyɔngɔ ndea Yúda. Ɓáongoɗea te, ɓámophande imɔna. Mpɔ, Yúda áokaɓa mbenɔ ánjá ka dungisa Yéso.

Ɓɔngisiaga á maseye á mokati

¹² Ɗáɓi ye esa á ko ímoci á maseye á mokati kángá cacu, esa ndɔ ɗátú esa á tena á ɓana-ɓamɔgɔgɔ á Pasáka. Cɔ, ɓagoigi ɓáomúsia Yéso te: «Okondi ɓégɛ ɓɔngisiɛgɛ k'akɔ eea á Pasáka wani?»

¹³ Mpɔ, Yéso áǒteka ɓagoigi ɓaɓɛ áǒgea: «Gǎni ka ntanga-nji. Nkpa moci anódondande kó n'akumbi mbungu á iɓo. Cɔ, mɓeani.

¹⁴ Angiande k'éndu. Ɔma nde angí, ngoɗeani mɛna-endu ndɔ te: ‹Ngoisigi áoúsia gea, ɔma sina nde aeagande Pasáka na ɓagoigi nɛkɛ?›

¹⁵ Mpɔ, anophangiande k'ɔ́ma á gǔ k'éndu, n'ande ɔma ángbó phɛɛ, kema bui n'a ye tɔ ɓei. Wa unge ɓɔɓɔngisiagande k'asu eea.»

¹⁶ Ɓagoigi ɓáoga, ɓáokiɗia ka ntanga-nji, ɓáodonda kema bui ɓíndɔ Yéso ɗéngoɗi. Ɓáɔɓɔngisia eea á Pasáka kó.

¹⁷ Aɓi ye ɔgɔgɔ, Yéso na ɓagoigi nɛkɛ nkama na ɓaɓɛ (12) ɓáokiɗia.

¹⁸ Ɓî ɗáɓáiki ye k'ɔ́ma á eea, Yéso áǒgea: «Nenongoɗi ɗoni, ka ɓenu moci mmbé ɓeoeaga kimoci na yɛ, amɔtɔngande.»

¹⁹ Ɓagoigi ɓáoɓá na ɓɔmbɛ phɛɛ. Ɓáomúsiaga Yéso moci-moci gea te: «Nna phɔ́ eme?»

²⁰ Yéso áǒsikisia te: «Moci sɔsɔɓɛ anu nkama na ɓaɓɛ (12), mmbé ɓeoeaga na yɛ kimoci, aámbé ageande ɓó.

²¹ Muna-Nkpa akuwande ɓíndɔ ɓáɗundu suɓi á Ɓuku á Mokonga ka phɔakɛ. Ande gǎkɛ ngomi phɛɛ ka mmbé antɔngi Muna-Nkpa. Atúoɓá ɓonjánja ka yɛ, ámbé káɓɔkɔtɛani.»

Yéso aoeaga eea á ɔngana kimoci na ɓagoigi nɛkɛ

²² Ɓî ɗáɓátú oeaga, Yéso áɔbɛɗa mokati, áonsega Mokonga k'ɛ́mɛmi, áoɓúnaga mokati ndɔ, áǒgabea ɓagoigi nɛkɛ, áǒngoɗea te: «Bɛ́ɗani, ɓóeɛ, nnde ande nyama ani.»

²³ Â phɔtɔ ɔbɛɗa kiɓe á divai, áonsega Mokonga k'ɛ́mɛmi, áǒɓopha, ɓáonoa ɓɔbu.

²⁴ Yéso áǒgea: «Divai nde, ande magia ani, magia nde aɗǔkani ka phɔa ɓakpa ɓásii ka engekisa ɔngana ndea Mokonga.

²⁵ Nenóngoɗi ɗoni, kénóɛeka ye tanda divai, na ka ɓî nenoaeka nnde á kɛ̌kɛ ka koɓoamɛ ndea Mokonga.»

²⁶ Mbusa á ɓɔ émbá, ɓáoga ka mamba á Mijɛitúni.

Yéso aɔtu onganɔ ndea Pɛ́tɛɛ

²⁷ Kó, Yéso áǒngoɗea ɓagoigi nɛkɛ te: «Ɓenu ɓɔbu, ɓomoɗeketande. Nga, ɓeotanga suɓi á Ɓuku á Mokonga te: ‹Nemmowande mɓɔndigi-ɓamɔgɔgɔ, ɓamɔgɔgɔ ɓáophanjekana.›

²⁸ Mbusa á jujúka ani ka kukuwa, negande gǎkɛ onoɓondea na Galiláya.»

²⁹ Pɛ́tɛɛ áongoɗea te: «Nanga ɓadani ɓɔbu ɓákosaga, eme kékosagɛeka gǎkɛ.»

³⁰ Yéso áonsikisia te: «Nekongoɗi ɗoni, kǐpha á kesande, mosá á ɔsa á kɔkɔ mɔngɔ á ko iɓɛ, omonganande mɔngɔ isaɔ.»

³¹ Pɛ́tɛɛ â gǎkɛ otétemisa akpɛ te: «Kéonganɛku. Nanga áɓá kukuwa, ɓesíande kimoci.» Ɓagoigi ɓɔbu ɓâ phɔtɔ ɔyɔnga ɓó.

Yéso aɔmɛma ka Gɛtɛsɛmáni

³² Ɓákiɗi ye k'ɔ́ma nde ɓáɔɔphana Gɛtɛsɛmáni, Yéso áǒngoɗea ɓagoigi nɛkɛ te: «Ikani wani. Negeɔmɛma Mokonga.»

³³ Â gǎkɛ oga kimoci na Pɛ́tɛɛ, Yakɔ́ɓɔ, na Yoáni. Áoɓá na ɓɔmbɛ phɛɛ.

³⁴ Aǒngoɗea te: «Měma ani atúmi na ɓɔmbɛ á kukuwa. Ikani wani, ɓókóɗɛmbɛ.»

³⁵ Áɔsɛkɛɗa mosá ábɔa, áogua ka oɗo, áɔmɛma Mokonga gea, aoɓá n'atɔtɔkɛani, kangiɛmbɛ ka mbenɔ á tambaga ndɔɔ.

³⁶ Áɔmɛma ɓe: «Abɛ, nna na kema nde nnaɔtɔtɔkɛana mɔtɛ-akɔ. Tókisa phɔ́ kanu kiɓe á tambaga ndee. Nna gǎkɛ gea, eme aámbé nekondi, a ndiu ka gea, oɓɛ aámbé okondi.»

³⁷ Áosikianaga kuɓî ɓagoigi ɓasaɔ ndɔ ɓáɔ, áǒdonda na ɓá ka tɔ̌. Áongoɗea Pɛ́tɛɛ: «Simɔ́ni ca, o ndiu ka tɔ̌? Kɔ́tɔki phiphia á tɔ̌ ka mbenɔ moci?

³⁸ Cɔ, ɓókóɗɛmbɛ, mɛmani Mokonga gea te, ɓókoguɛmbɛ ka mbenɔ á tombaga. Měma ana ɓukpɛkpɛ, nyama gǎkɛ aunge aɔlɔmani.»

³⁹ Yéso áotóka bíbí aɓɔ, â goto ɔmɛma ɛmɛmi ndɔ tɔ moci.

⁴⁰ Aji ye, â goto ǒdonda na ɓáɗe nga, ɗáɓáoyengia na tɔ̌. Kaɓondɔ, ɗáɓákáoúba nyɔngɔ á sikisia á Yéso.

⁴¹ Ɓî abiki ye mɔngɔ á ko isaɔ, áǒngoɗea te: «Ɓophɔ́ma tɔ ka tɔ̌ na úmbia? Cɔ, así. Mbenɔ akiɗi ye tɔ. Ɓámbisande Muna-Nkpa ka njaga á ɓakpa ɓájeɗe.

⁴² Cɔ, máni, ɓégɛ! Mmbé aomokusisa a ye tɔ bíbí!»

Dunga á Yéso

⁴³ Yéso n'a phɔ́tɔ ɔyɔnga, Yúda, mmbé ɗátú ka ɓagoigi nkama na ɓaɓɛ (12), áɔsɛnɛka. Ɗábiki na ɓakpa ɓásii ɓunde ɗáɓátú na mɓɛngɛ na gbútu. Ɓagbɛga á ɓatoɓeigi-phɛ́a, ɓaɗundu-ɛɔphi, na ɓagbɛga ndea Ɓayúda, ɓáunge ɗáɓěteki.

⁴⁴ Cɔ, ntɔngi ndɔ Yúda, ɗéúbisi ɓakpa mphangiɔ ndee: «Nkpa nde nemumbiagande ka sesea akɛ, aámbɔ! Ndungani. Ɓóngɛ ně. Ɓónambɛ ánjá!»

⁴⁵ Ka kiɗia á Yúda tɔ, áombîmisia Yéso, áongea: «Ngoisigi!» Mpɔ, áomumbiaga.

⁴⁶ Ɓakpa ɓunɛngbo ɓáondunga Yéso.

⁴⁷ Ka ɓunde ɗátú wa, â gǎkɛ ophúia mɓɛngɛ, áotena kecue á mbɛɗanigi ndea ngbɛga á ɓatoɓeigi-phɛ́a cé!

⁴⁸ Yéso áǒngoɗea te: «Ɓokiɗi na mɓɛngɛ na gbútu ka dunga ani ɓea moege-ɓakpa?

⁴⁹ Cɔ, esa bui, ɗétú ka ɔlɔ anu ka goisaga anu k'éndu á Mokonga. Ɗóɓókómodungi. Nnde ɓogi gǎkɛ, a tɔ tɔtɔkisa ɓíndɔ ɗáɓáɗundu suɓi á Ɓuku á Mokonga.»

⁵⁰ Mpɔ, ɓagoigi ɓɔbu ɓáonkamba, ɓáotea.

⁵¹ Moganda moci, mmbé ɗátú phɔtɔ omɓea Yéso, ɗáɔ́li tɔ ngɔ́mbɛ ágbae. Cɔ, ɓáogea, ɓándungɛ.

⁵² Yɛ, áoɗoa ngɔ́mbɛ ndɔ, â gǎkɛ otea ndúmbú.

Yéso a mosá á ɓateni-nyɔngɔ

⁵³ Cɔ, ɓáonga na Yéso mɔtɛ á ngbɛga á ɓatoɓeigi-phɛ́a. Kó, ɓagbɛga á ɓatobeigi-phɛ́a, ɓagbɛga ndea Ɓayúda, na ɓaɗundu-ɛɔphi, ɓɔbu ɗáɓádondanigi.

⁵⁴ Pɛ́tɛɛ ɗáomɓea Yéso ka ɗanga. Áongia ka ntanga á endu ndea ngbɛga á ɓatoɓeigi-phɛ́a. Áoika ka oɗo n'aɔɔta nsa, bíbí á ɓabɛɗanigi.

⁵⁵ Cɔ, ɓagbɛga á ɓatobeigi-phɛ́a, na ɓato á ntua á tena á nyɔngɔ ndea Ɓayúda, ɗáɓátú okaɓa nyɔngɔ ɗanga-ɗanga ka kusisa á Yéso, ɓákaɔnɛ.

⁵⁶ Ɓakpa ɓásii ɓáɔn'yɔngɛa mbɛa, nyɔngɔ nɛɓɔ kaɓɛ kimoci.

⁵⁷ Mpɔ, ɓunɛngbo sɔsɔɓɛ aɓɔ ɓáɔntɔnga na kitɔngi á mbɛa.

⁵⁸ Ɓáogea: «Nkpa nde, ayɔngima ɓe: Nɛngbɔande endu á Mokonga, nnde ɓakpa ɗáɓáphɛ̌ki. Néomesa k'ésa isaɔ. Mɔphɛkɔ kau káɓɛku á njaga á ɓakpa.»

⁵⁹ Ka nyɔngɔ ndɔ phɔtɔ, ɓoabi nɛɓɔ â goto oɓá ɗanga-ɗanga.

⁶⁰ Mpɔ, ngbɛga á ɓatoɓeigi-phɛ́a áomá, phǒi! Áomúsia Yéso: «Cɔ, kó tanda na ka nyɔngɔ á sikisa k'índe ɓaɔkɔtɔnga bui?»

⁶¹ Yéso áɔphɔnga, phioo! Kasikisɛ ka kema. Ngbɛga á ɓatoɓeigi-phɛ́a â goto omúsia: «Oɓɛ, onde Kiísito, Muna-Mokonga Mɛna-obebɔ?»

⁶² Yéso áosikisia: «Eya! Eme yɛ. Ɓenu phɔtɔ, ɓɔmɔɔnande, eme Muna-Nkpa, na neiki ka njaga á mǔku á Mokonga Mɛna-ɓukpɛkpɛ, na neobika k'égugu á na koba.»

⁶³ Ngbɛga á ɓatoɓeigi-phɛ́a aɔ́ki ye ɓó, áoboma ngɔ́mbɛ nɛkɛ cuɛ! Áogea: «Ɓéké ye na siki á nɗigimisi!

⁶⁴ Nga, ɓɛɔ́ki sasasu nyɔngɔ nɛkɛ ɓî ěkengeanisi na Mokonga. Ɓogi gǎkɛ ɓo?» Ɓakpa ɓɔbu ɓáongea: «Akeni tɔ ákuwɛ.»

⁶⁵ Mpɔ, ɓuangbo sɔsɔɓɛ aɓɔ ɓáonsúia Yéso soki, ɓáoɗaka iso akɛ, ɓáɔmɓɛta, ɓáongea: «Ngoɗa phɔ́ nkpa nde aɔɓɛti.» Mbusa, ɓaɓondigi ɓáɔmbɛɗa Yéso, ɓáɔmɓɛta.

Pɛ́tɛɛ angani Yéso

⁶⁶ Wandɔ, Pɛ́tɛɛ ɗátú kusi ka ntanga. Nke moci, ka ɓabɛɗanigi ndea ngbɛga á ɓatoɓeigi-phɛ́a áokiɗia.

⁶⁷ Áɔmɔna Pɛ́tɛɛ n'aɔɔta nsa. Áonenga jaa! Áongoɗea te: «Oɓɛ, ɗótú phɔtɔ kimoci na Yéso mmbɔ ɓa Najalɛ́ti.»

⁶⁸ Pɛ́tɛɛ áongána, áongea te: «Kéoúba, kéoengekisa nyɔngɔ nde oogea ɔ́yɔngɛ!» Mpɔ, áojuana áoga bíbí á aphe á iso á endu nde ana ntanga. [Wandɔ, kɔkɔ áɔɔsa.]

⁶⁹ Ɓî nke ndɔ amɔɔni Pɛ́tɛɛ kó, áǒngoɗea ɓakpa nde ɗáɓátú wa te: «Mmbé ɗátú kimoci na ɓɔ.»

⁷⁰ Pɛ́tɛɛ â goto ongána. Mbusa ábɔa, ɓakpa nde ɗáɓátú wa, ɓâ goto ongoɗea Pɛ́tɛɛ te: «Ɗoni! Oɓɛ phɔtɔ, onde ka ɓakpa ndɔ, ka nyɔngɔ nde, onde nto á ka Galiláya.»

⁷¹ Mpɔ, Pɛ́tɛɛ â ye tɔ ɔɔphá ɓe: «Idɔngɔ ani! Kéomúba mmbé ɓɔɔyɔnga nyɔngɔ akɛ.»

⁷² Kɛ̌kɛndɔ, kɔkɔ áɔɔsa ka mɔngɔ á ko iɓɛ. Pɛ́tɛɛ áokanisia nyɔngɔ nde Yéso ɗángoɗi gea: «Mosá á kɔkɔ ɔsa mɔngɔ á ko iɓɛ, omonganande mɔngɔ isaɔ.» Kaɓondɔ, Pɛ́tɛɛ áotoɓokea ngamɔ.